ନୂଆଦିଲ୍ଲୀ: ଅଯୋଧ୍ୟା ମାମଲାରେ ଐତିହାସିକ ରାୟ ପ୍ରକାଶ କରିଥିବା ସୁପ୍ରିମକୋର୍ଟର ପାଞ୍ଚ ଜଣିଆ ସମ୍ବିଧାନିକ ଖଣ୍ଡପୀଠରେ ସାମିଲ ଥିବା ଜଷ୍ଟିସ ଅବ୍ଦୁଲ ନଜୀରଙ୍କ ଜୀବନ ପ୍ରତି ବିପଦ ରହିଛି । ଚରମପନ୍ଥୀ ସଂଗଠନ ପପ୍ୟୁଲର ଫ୍ରଣ୍ଟ ଅଫ ଇଣ୍ଡିଆ ତାଙ୍କ ଉପରେ ଆକ୍ରମଣ କରିପାରେ ବୋଲି ଆଶଙ୍କା ପ୍ରକାଶ ପାଇଛି । ଏହାକୁ ଦୃଷ୍ଟିରେ ରଖି ତାଙ୍କୁ ଏବଂ ତାଙ୍କ ପରିବାରକୁ 'Z' ଶ୍ରେଣୀର ସୁରକ୍ଷା ପ୍ରଦାନ କରିବାକୁ ନିଷ୍ପତ୍ତି ନେଇଛନ୍ତି କେନ୍ଦ୍ର ସରକାର । ଜଷ୍ଟିସ ନଜୀର ଏବଂ ତାଙ୍କ ପରିବାରକୁ ସୁରକ୍ଷା ପ୍ରଦାନ କରିବାକୁ ସିଆରପିଏଫ ଏବଂ ସ୍ଥାନୀୟ ପୋଲିସକୁ ନର୍ଦ୍ଦେଶ ଦେଇଛି ଗୃହମନ୍ତ୍ରାଳୟ ।
କେରଳରେ ସକ୍ରିୟ ଥିବା ପିଏଫଆଇ ଏବଂ ଅନ୍ୟ କିଛି ଚରମପନ୍ଥୀ ସଂଗଠନ ଠାରୁ ଜଷ୍ଟିସ ଅବ୍ଦୁଲ ନଜୀରଙ୍କ ଜୀବନ ପ୍ରତି ବିପଦ ଥିବା ଗୁଇନ୍ଦା ସୂଚନା ମିଳିଛି । ତେଣୁ ପୂର୍ବ ସତର୍କତା ଅବଲମ୍ବନ କରି କର୍ଣ୍ଣାଟକରେ ରହୁଥିବା ଜଷ୍ଟିସ ଅବଦୁଲ ନଜୀର ଏବଂ ତାଙ୍କ ପରିବାକୁ କର୍ଣ୍ଣାଟକ ସମେତ ସାରା ଦେଶରେ 'Z' ଶ୍ରେଣୀର ସୁରକ୍ଷା ଯୋଗାଇବାକୁ ନିର୍ଦ୍ଦେଶ ଦିଆଯାଇଛି । ତେବେ ଅବଦୁଲ ନଜୀର ଏବଂ ତାଙ୍କ ପରିବାରକୁ ବେଙ୍ଗାଲୁରୁ, ମାଙ୍ଗାଲୁରୁ ଏବଂ ରାଜ୍ୟର ଅନ୍ୟ ସ୍ଥାନରେ ମଧ୍ୟ ସୁରକ୍ଷା ଯୋଗାଯିବ । ତାଙ୍କ ସୁରକ୍ଷାରେ 22 ଜଣ ସିଆରପିଏଫ ଯବାନ ନିୟୋଜିତ ହେବେ ।
