ଲକ୍ଷ୍ନୌ: ବିବାଦୀୟ ରାମ ଜନ୍ମଭୂମି- ବାବ୍ରି ମସଜିଦ ମାମଲାର ଶୁଣାଣି ଅନ୍ତିମ ପର୍ଯ୍ୟାୟରେ ପହଞ୍ଚିଛି । ଆଗାମୀ ଦୁଇ ଦିନରେ ହିନ୍ଦୁ ପକ୍ଷ ନିଜର ଦଲିଲ ରଖିବା ସହ ଏହାର ଶୁଣାଣି ଶେଷ ହେବ । ଏହା ପରେ ସୁପ୍ରିମକୋର୍ଟ ଏ ମାମଲାରେ ଆସିବାକୁ ଥିବା ରାୟକୁ ସଂରକ୍ଷିତ କରିବେ ।
ଏ ମାମଲାରେ ଚାଲିଥିବା ଶୁଣାଣି ଆଜି 39 ଦିନରେ ପହଞ୍ଚିଛି । ବର୍ତ୍ତମାନ ହିନ୍ଦୁ ପକ୍ଷ ନିଜର ଦଲିଲ ରଖିବେ । ପୂର୍ବରୁ ସୋମବାର ସୁନ୍ନୀ ବୋର୍ଡର ଚେୟାରମ୍ୟାନ ଜଫର ଅହମ୍ମଦ ଫାରୁକୀଙ୍କୁ ସୁରକ୍ଷା ଯୋଗାଇ ଦେବାକୁ ଅଦାଲତ ନିର୍ଦ୍ଦେଶ ଦେଇଥିଲେ । ସୁନ୍ନୀ ବୋର୍ଡର ଚେୟାରମ୍ୟାନ ମଧ୍ୟସ୍ଥତା ପ୍ୟାନେଲର ସଦସ୍ୟ ଥିବା ଶ୍ରୀରାମ ପଞ୍ଚୁଙ୍କୁ ନିଜ ଜୀବନ ପ୍ରତି ବିପଦ ଥିବା କହିଥିଲେ । ବର୍ତ୍ତମାନ ଅଯୋଧ୍ୟାରେ ଜାରି ହୋଇଥିବା 144 ଧାରାକୁ ଆସନ୍ତା ଡିସେମ୍ବର 10 ତାରିଖ ପର୍ଯ୍ୟନ୍ତ ବଳବତ୍ତର ରଖାଯାଇଛି ।
