ହାଇଦ୍ରାବାଦ: କେନ୍ଦ୍ରମନ୍ତ୍ରୀ ଅର୍ଜୁନ ମୁଣ୍ଡା ଆର୍ଚରୀ ଆସୋସିଏସନ ଅଫ ଇଣ୍ଡିଆ (ଏଏଆଇ)ର ନୂତନ ଅଧ୍ୟକ୍ଷ ଭାବେ ନିର୍ବାଚିତ ହୋଇଛନ୍ତି । ବିପକ୍ଷରେ ବିଭିପି ରାଓଙ୍କୁ 34-18 ଭୋଟରେ ହରାଇଛନ୍ତି ମୁଣ୍ଡା ।
ଅର୍ଜୁନ ମୁଣ୍ଡାଙ୍କ କାର୍ଯ୍ୟକାଳ 4 ବର୍ଷର ରହିବ । ସେପଟେ ହରିୟାଣାର କ୍ୟାପ୍ଟେନ ଅଭିମନ୍ୟୁ ଶର୍ମାଙ୍କୁ ଉପାଧ୍ୟକ୍ଷ ପଦ ମିଳିଥିବା ବେଳେ ଉତ୍ତରାଖଣ୍ଡର ରାଜେନ୍ଦ୍ର ସିଂହ ତୋମାର କୋଷାଧ୍ୟକ୍ଷ ଭାବେ ନିର୍ବାଚିତ ହୋଇଛନ୍ତି । ଦିଲ୍ଲୀ ଉଚ୍ଚ ନ୍ୟାୟାଳୟଙ୍କ ନିର୍ଦ୍ଦେଶରେ ଭାରତୀୟ ତୀରନ୍ଦାଜୀ ସଂଘର ନିର୍ବାଚନ ଶନିବାର ଦିଲ୍ଲୀ ଠାରେ ଅନୁଷ୍ଠିତ ହୋଇଥିଲା । ବିଗତ ବର୍ଷ ମଧୟ ମୁଣ୍ଡା ଏହି ପଦ ପାଇଁ ଆବେଦନ କରିଥିଲେ କିନ୍ତୁ କୌଣସି କାରଣରୁ ତାଙ୍କ ନାମାଙ୍କନ ପତ୍ର ଖାରଜ ହୋଇଯାଇଥିଲା ।
ସୂଚନା ଯୋଗ୍ୟ ଯେ ମନ୍ତ୍ରୀ ମୁଣ୍ଡାଙ୍କର ତୀରନ୍ଦାଜୀ ସହ ଆଗରୁ ସମ୍ପର୍କ ରହିଛି । 2006ରେ ମୁଣ୍ଡାଙ୍କ ପ୍ରଚେଷ୍ଟା କ୍ରମେ ଝାଡଖଣ୍ଡ ସରେଇକେଲାର ଦୁଗୁନି ଠାରେ ତୀରନ୍ଦାଜୀ ଏକାଡେମୀ ପ୍ରତିଷ୍ଠା କରାଯାଇଥିଲା । ଯେଉଁଠାରେ ଆଦିବାସୀ ତିରନ୍ଦାଜ ମାନଙ୍କୁ ପ୍ରଶିକ୍ଷଣ ଦିଆଯାଏ । ଏହାସହ ମୁଣ୍ଡାଙ୍କ ପ୍ରଚେଷ୍ଟାରେ ଖରସୁଆଁର ଅର୍ଜୁନା ଷ୍ଟାଡିୟମରେ ମଧ୍ୟ ତୀରନ୍ଦାଜୀ ସେଣ୍ଟର ପରିଚାଳିତ ହେଉଛି । ସରେଇକେଲା ଓ ଖରସୁଆଁ ଠାରେ ଅର୍ଜୁନ ମୁଣ୍ଡାଙ୍କ ସ୍ତ୍ରୀ ମୀରା ମୁଣ୍ଡା ସମସ୍ତ ଦାୟିତ୍ବ ସମ୍ଭାଳିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
