ହାଇଦ୍ରାବାଦ: ତିନି ଦିନ ତଳେ ହଜିଥିବା ସାତବର୍ଷର ଶିଶୁ କନ୍ୟାର ମୃତଦେହ ଉପ୍ପୁଟେରୁ କେନାଲ ପାଖରୁ ଏକ ଅଖାରେ ମିଳିଥିଲା । ସୋମବାର ଇନ୍ଦ୍ରାପାଲମ ନାଳ ପାଖରୁ ପୋଲିସ ମୃତଦେହ ଉଦ୍ଧାର କରିଥିଲା ।
ଗତ ଶୁକ୍ରବାର ଶ୍ୟାମ ପ୍ରସାଦଙ୍କ 7 ବର୍ଷୀୟ ଝିଅ ଦିପ୍ତୀ ଶ୍ରୀ ନିଖୋଜ ହୋଇଯାଇଥିଲେ । ସନ୍ଦେହ ଆଧାରରେ ପୋଲିସ ଶିଶୁର ସାବତ ମାକୁ ପଚରା ଉଚରା କରିଥିଲା । ତେବେ ସିସିଟିଭି ଫୁଟେଜ ମିଳିବା ପରେ ପୋଲିସ ତଦନ୍ତ ଆରମ୍ଭ କରଥିଲା । ଫୁଟେଜରେ ଦେଖାଯାଇଥିଲା ଯେ ଶିଶୁ କନ୍ୟା ଜଣକ ଖାଇବା ଛୁଟି ସମୟରେ ଜଣେ ମହିଳାଙ୍କ ସହ ସ୍କୁଲରୁ ବାହାରକୁ ଆସିଛି ।
ତେବେ ଦିପ୍ତୀର ସାବତ ମା ଶାନ୍ତି କୁମାରୀ ପଚରା ଉଚରା ସମୟରେ ନିଜ ଅପରାଧ ମାନି ନେଇଥିଲେ । ସ୍କୁଲର ଖାଇବା ଛୁଟି ସମୟରେ ଦିପ୍ତୀକୁ ଅପହରଣ କରି ନେଇ ତାକୁ ହତ୍ୟା କରିଥିବା କହିଥିଲା ଶାନ୍ତି ।
ଯାହାପରେ ପୋଲିସ ଦିପ୍ତୀ ଶ୍ରୀଙ୍କ ମୃତ ଦେହ ଖୋଜିବା ପାଇଁ ଉପ୍ପୁଟେ, ଇନ୍ଦ୍ରପାଲମ ଅଞ୍ଚଳରେ ସର୍ଚ୍ଚ ଅପରେସନ କରିଥିଲା । ରବିବାର ସକାଳୁ ସର୍ଚ୍ଚ ଅପରେସନ ଆରମ୍ଭ ହୋଇଥିଲା ଯାହା ଶେଷ ହୋଇଥିଲା ସୋମବାର ଅପରାହ୍ନରେ ।
କାକିନାଡାର ସଞ୍ଜୟ ନଗର ଠାରେ ରହୁଥିବା ଶ୍ୟାମ ପ୍ରସାଦ ନିଜ ପ୍ରଥମ ସ୍ତ୍ରୀଙ୍କ ମୃତ୍ୟୁ ପରେ ଦ୍ବିତୀୟ ବିବାହ ଶାନ୍ତି କୁମାରୀଙ୍କୁ କରିଥିଲେ । ଉଭୟଙ୍କର ଏକ ବର୍ଷର ଶିଶୁ ପୁତ୍ର ମଧ୍ୟ ରହିଛି । ତେବେ ମୃତ ଶିଶୁ ଦିପ୍ତୀଶ୍ରୀର ଦେହ ଖରାପ ଥିବାରୁ ନିଜ ସମ୍ପର୍କୀୟଙ୍କ ଘରେ ରହୁଥିଲେ । ପୋଲିସ ଅଭିଯୁକ୍ତଙ୍କୁ ହେପାଜତରେ ନେଇ ଦିପ୍ତୀ ଶ୍ରୀଙ୍କ ହତ୍ୟା ମାମଲା ରୁଜୁ କରିଛି । ଏହି ଘଟଣାରେ ସମ୍ପୃକ୍ତ ଥିବା ଅନ୍ୟ ବ୍ୟକ୍ତିଙ୍କୁ ମଧ୍ୟ ଖୋଜୁଛି ପୋଲିସ ।
ବ୍ୟୁରୋ ରିପୋର୍ଟ, ଇଟିଭି ଭାରତ
