ନୂଆଦିଲ୍ଲୀ: ଏୟାର ଇଣ୍ଡିଆ ବିମାନକୁ ଧମକପୂର୍ଣ୍ଣ କଲ ଆସିଥିବା ଜଣାପଡିଛି । ମୁମ୍ବାଇରେ ଥିବା ଏୟାର ଇଣ୍ଡିଆ ବିମାନ ନିୟନ୍ତ୍ରଣ କେନ୍ଦ୍ରକୁ ଆସିଛି ଏହି ଧମକପୂର୍ଣ୍ଣ ଫୋନ କଲ । ସମସ୍ତ ଏୟାର ପୋର୍ଟରେ ଏ ନେଇ ହାଇଆଲର୍ଟ ଜାରି ରହିଛି । ଏହାକୁ ଦୃଷ୍ଟିରେ ରଖି ଉଡାଣ ସୁରକ୍ଷା ବ୍ୟୁରୋ ସତର୍କ ରହିବାକୁ ନିର୍ଦ୍ଦେଶ ଦେଇଛି ।
ଫେବୃଆରୀ 23 ରେ ସୁରକ୍ଷା ବ୍ୟୁରୋ ପକ୍ଷରୁ କୁହାଯାଇଛି ଯେ ଷ୍ଟେସନ ଡ୍ୟୁଟି କାର୍ଯ୍ୟାଳୟ, ଏୟାର ଇଣ୍ଡିଆ, ଏଓସିସି ଏବଂ ସିଆଇଏସଏଫ (ଏୟାରପୋର୍ଟ ଅପରେସନ କଣ୍ଟ୍ରୋଲ ଷ୍ଟେସନ) ମୁମ୍ବାଇରୁ ଫୋନ କଲ ଜରିଆରେ ଏକ ମେସେଜ ମିଳିଥିଲା । ଏଥିରେ ଏୟାର ଇଣ୍ଡିଆ ବିମାନକୁ ହାଇଜାକ କରିବାର ଧମକପୂର୍ଣ୍ଣ କଲ ଆସିଥିଲା ।
ତେବେ ଏହି ଧମକ ମିଳିବା ପରେ ସମସ୍ତ ଏୟାରପୋର୍ଟରେ କଡା ସୁରକ୍ଷା ଜାରି କରାଯାଇଛି । ଟର୍ମିନାଲ ବିଲଡିଂ, ଏୟାରସାଇଡ, ସମସ୍ତ ପରିଚାଳନ କ୍ଷେତ୍ର ଏବଂ ଅନ୍ୟାନ୍ୟ ବିମାନ ସୁବିଧାକୁ କଡାକଡି କରି ଦିଆଯାଇଛି । ସେପଟେ କାର ବୋମା ଆକ୍ରମଣ ହେବା ଆଶଙ୍କା କରାଯାଉଛି । ତେଣୁ ପାର୍କିଂକୁ ପ୍ରବେଶ କରୁଥିବା ସମସ୍ତ କାରର ଯାଞ୍ଚ କରାଯାଉଛି । ଏହାସହ ସମସ୍ତ ଯାତ୍ରୀ ଓ ତାଙ୍କ ଲଗେଜକୁ ଯାଞ୍ଚ କରାଯାଉଛି ।
