ଲକ୍ଷ୍ନୌ: କୋଝିକୋଡ ବିମାନ ଦୁର୍ଘଟଣାରେ ପ୍ରାଣ ହରାଇଥିବା କୋ ପାଇଲଟ ଅଖିଳେଶ କୁମାରଙ୍କ ମର ଶରୀର ଆଜି ସକାଳେ ମଥୁରାରେ ପହଞ୍ଚିସାରିଛି । ଏତିକିବେଳେ ମୃତ ପାଇଲଟଙ୍କ ବାପା ତାଙ୍କ ବୋହୂ ଅର୍ଥାତ ଅଖିଳେଶଙ୍କ ପତ୍ନୀଙ୍କୁ ଚାକିରି ଦେବା ପାଇଁ ଦାବି କରିଛନ୍ତି ।
ସେ କହିଛନ୍ତି ଯେ, ମୁଁ ଚାହୁଁଛି ଯେ ତାଙ୍କ ପତ୍ନୀଙ୍କୁ ନିଯୁକ୍ତି ଦିଆଯାଉ, ଯାହାଫଳରେ ସେ ତାଙ୍କ ସନ୍ତାନର ଯତ୍ନ ନେଇପାରିବେ । ମୃତ ପାଇଲଟଙ୍କ ପତ୍ନୀ ଏବେ ଗର୍ଭବତୀ ଅଛନ୍ତି । ଆଗାମୀ ଦିନରେ ଯେପରି ତାଙ୍କ ସନ୍ତାନର ଉଚିତ ଦେଖାଶୁଣା ହେବ ସେ ନେଇ ପାଇଲଟଙ୍କ ବାପା ଦାବି ଜରିଥିବା ଜଣାଯାଉଛି ।
ପାଇଲଟଙ୍କ ମୃତଦେହକୁ କୋଚିରୁ ଦିଲ୍ଲୀ ବିମାନବନ୍ଦରକୁ ରବିବାର ବିଳମ୍ବିତ ରାତ୍ରିରେ ଅଣାଯାଇଥିଲା । ସେଠାରେ 100 ରୁ ଅଧିକ ପାଇଲଟ ତାଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ । ଦୁଇ ମିନିଟ୍ ର ନିରବ ପ୍ରାର୍ଥନା କରି ତାଙ୍କ ଆତ୍ମାର ସଦଗତି ପାଇଁ ପ୍ରାର୍ଥନା କରିଥିଲେ ।
ଶୁକ୍ରବାର ସନ୍ଧ୍ୟାରେ କୋଝିକୋଡ ବିମାନ ବନ୍ଦରରେ ଅବତରଣ କରିବା ସମୟରେ 10 ଶିଶୁଙ୍କ ସମେତ 190 ଯାତ୍ରୀଙ୍କୁ ନେଇ ଏୟାର ଇଣ୍ଡିଆ ଏକ୍ସପ୍ରେସ ବିମାନ ଦୁର୍ଘଟଣା ଗ୍ରସ୍ତ ହୋଇଥିଲା । ଏହି ଘଟଣାରେ ଦୁଇ ପାଇଲଟଙ୍କ ସମେତ ଅତିକମରେ 19 ଜଣ ପ୍ରାଣ ହରାଇଛନ୍ତି ।
