ହାଇଦ୍ରାବାଦ: ଜମ୍ମୁ-କାଶ୍ମୀରକୁ ସ୍ବତନ୍ତ୍ର ରାଜ୍ୟର ମାନ୍ୟତା ଦେଉଥିବା ଧାରା 370 ଉଚ୍ଛେଦ ହୋଇଯାଇଛି । ଏହା ସହିତ କେନ୍ଦ୍ର ସରକାର ଜମ୍ମୁ-କାଶ୍ମୀରରୁ ଲଦାଖକୁ ଭିନ୍ନ କରି ଦେଇଛନ୍ତି ଏବଂ ଉଭୟକୁ କେନ୍ଦ୍ରଶାସିତ ଅଞ୍ଚଳର ମାନ୍ୟତା ଦେଇଛନ୍ତି । ଜମ୍ମୁ-କାଶ୍ମୀର କେନ୍ଦ୍ରଶାସିତ ଅଞ୍ଚଳ ହେବା ସତ୍ତ୍ବେ ଦିଲ୍ଲୀ ଏବଂ ପୁଡ୍ଡୁଚେରୀ ଭଳି ଏଠାରେ ବିଧାନସଭା ରହିବ । ତେବେ କେନ୍ଦ୍ର ସରକାରଙ୍କ ଏହି ଐତିହାସିକ ନିଷ୍ପତ୍ତି ପରେ ପାକ୍ ଅଧିକୃତ କାଶ୍ମୀର(ପିଓକେ)ର କ'ଣ ହେବ ସେନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ସମାଜବାଦୀ ପାର୍ଟି ଅଧ୍ୟକ୍ଷ ଅଖିଳେଶ ଯାଦବ ମଧ୍ୟ ଗତ ସୋମବାର ଏହି ପ୍ରଶ୍ନ ଉଠାଇଥିଲେ ।
ଜମ୍ମୁ-କାଶ୍ମୀର ଏବଂ ଲଦାଖ ଅଲଗା ହେବା ସହ ଅବଶ୍ୟ ଉଭୟର ପୁର୍ନଗଠନ ପୁଣିଥରେ ହେଉଛି । କିନ୍ତୁ ଭାରତ ପିଓକେ ଉପରେ ନିଜ ହକ ଏବେ ସୁଦ୍ଧା ବଜାୟ ରଖିଛି । ମଙ୍ଗଳବାର ସଂସଦକୁ ସମ୍ବୋଧିତ କରି ଗୃହମନ୍ତ୍ରୀ ଅମିତ ଶାହା ଏନେଇ ସ୍ପଷ୍ଟ କରିଥିଲେ । ସେ କହିଥିଲେ, ପାକ୍ ଅଧିକୃତ କାଶ୍ମୀର ମଧ୍ୟ ଭାରତର ଅଂଶ ଅଟେ ଏବଂ ଦେଶର ଅନ୍ତରୀଣ ଭୂଭାଗ ଅଟେ । ତେବେ ଜମ୍ମୁ-କାଶ୍ମୀର ବିଧାନସଭାରେ ବର୍ତ୍ତମାନ 107 ଆସନ ରହିଥିବା ବେଳେ ସେଥିରେ ପିଓକେର 24 ଆସନକୁ ପାକିସ୍ତାନ ପାଇଁ ଖାଲି ଛଡାଯାଏ । ଯଦି ପିଓକ ଭାରତରେ ସାମିଲ ହେଉଛି ତ ସେହି 24 ଆସନ ଭାରତର ହେବ ।
ସେପଟେ ପାକ୍ ପ୍ରଧାନମନ୍ତ୍ରୀ ଇମ୍ରାନ ଖାନ କାଶ୍ମୀର ପୁନର୍ଗଠନ ମାମଲାର ବିରୋଧ କରିବା ସହ ଏକ ପ୍ରକାର ଧମକ ମଧ୍ୟ ଦେଇଛନ୍ତି । ଅନ୍ୟପକ୍ଷରେ କେତେକ ବିଶେଷଜ୍ଞ ଏହାକୁ ସମର୍ଥନ କରିବା ସହ ଏହା କାଶ୍ମୀର ସମସ୍ୟାର ସମାଧାନ ପାଇଁ ଆବଶ୍ୟକ ଥିଲା ବୋଲି କହିଛନ୍ତି ।
ତେବେ କାଶ୍ମୀର ସମସ୍ୟାକୁ ନେଇ ପାକ୍ ସହ ଦ୍ବିପାକ୍ଷିକ ଆଲୋଚନାର ପ୍ରସଙ୍ଗ ଏବେ ଭାରତ ମୁଣ୍ଡରୁ ହଟିଯାଇଛି । ଭାରତ ପାଖରେ ବର୍ତ୍ତମାନ କେବଳ ଗୋଟିଏ ପ୍ରସଙ୍ଗ ବାକି ରହିଯାଇଛି । ସେ ହେଉଛି ପିଓକେ ପ୍ରସଙ୍ଗ । ଭାରତ ଏବେ କେବଳ ପିଓକେ ପ୍ରସଙ୍ଗକୁ ନେଇ ପାକ୍ ସହ ଦ୍ବିପାକ୍ଷିକ ଆଲୋଚନାକୁ ଆଗକୁ ବଢାଇବାର ସମ୍ଭାବନା ରହିଛି ।
ସୂଚନା ଯୋଗ୍ୟ, 1947 ମସିହାରେ ପାକିସ୍ତାନ କାଶ୍ମୀରର ଏହି ଅଂଶ ଉପରେ କବ୍ଜା କରିଥିଲା । ପିଓକେର ରାଜଧାନୀ ମୁଜାଫରାବାଦ ଥିବା ବେଳେ ଏଠାରେ 8 ଜିଲ୍ଲା ଏବଂ 19ଟି ତହସିଲ ରହିଛି । ରାଷ୍ଟ୍ରପତି ଏଠାର ମୁଖ୍ୟ ଭାବେ ପରିଗଣିତ ହୁଅନ୍ତି । ପ୍ରଧାନମନ୍ତ୍ରୀ କିଛି ମନ୍ତ୍ରୀଙ୍କ ସହ ମିଶି ସିଇଓ ଭାବରେ ରହିଥାନ୍ତି । ତେବେ ଏଠାରେ ସ୍ବତନ୍ତ୍ର ବିଧାନସଭା ରହିଛି ବୋଲି ପାକିସ୍ତାନ କହି ଆସୁଥିଲେ ମଧ୍ୟ ଏଠାରେ ପାକ୍ ସମ୍ପୁର୍ଣ୍ଣ ଭାବରେ କବ୍ଜା କରି ଆସୁଛି ।
