ଜୟପୁର: ଫେରାର ଥିବା କୋରୋନା ଆକ୍ରାନ୍ତ ଅଭିଯୁକ୍ତଙ୍କୁ ଧରିଲା ଚିତ୍ତୌରଗଡ ପୋଲିସ । ଚୋରି ମାମଲାରେ ଗିରଫ ହୋଇଥିବା 2 ଅଭିଯୁକ୍ତ କୋରୋନା ସଂକ୍ରମିତ ହୋଇ କ୍ବାରେଣ୍ଟିନ ସେଣ୍ଟରରେ ରହିଥିଲେ । ସେଠାରୁ ଝରକା ଭାଙ୍ଗି ଖସି ପଳାଉଥିବା ବେଳେ ପୋଲିସ ସେମାନଙ୍କୁ କାବୁ କରିଛି ।
ସୂଚନା ଅନୁଯାୟୀ, କୋତୱାଲି ପୋଲିସ ଏବଂ ସ୍ୱତନ୍ତ୍ର ଶାଖା ଟିମ୍ ଦୁଇ ଚକିଆ ଯାନ ଚୋରି ଅଭିଯୋଗରେ ଅଭିଯୁକ୍ତକୁ ଗିରଫ କରିଥିଲେ। ସେମାନଙ୍କ ମଧ୍ୟରୁ ଦୁଇ ଜଣ କୋରୋନା ଆକ୍ରାନ୍ତ ଥିବା ଜଣାପଡିଥିଲା ।
ଏହି ଖବର ଜଣାପଡିବା ପରେ ସେମାନଙ୍କୁ ଚିତ୍ତୌରଗଡର ଶ୍ରୀ ସାଂବଲିଆଜୀ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ସେମାନଙ୍କ ସମ୍ପର୍କରେ ଆସିଥିବା 59 ପୋଲିସ କର୍ମଚାରୀଙ୍କୁ କ୍ବାରେଣ୍ଟିନରେ ରଖାଯାଇଥିଲା । କିନ୍ତୁ ଗତ ମଙ୍ଗଳବାର ରାତି ପ୍ରାୟ 11 ଟା ସମୟରେ ଡାକ୍ତରଖାନା ୱାର୍ଡର ଝରକା ଭାଙ୍ଗି ଦୁଇ ଅଭିଯୁକ୍ତ ଖସି ପଳାଇଥିଲେ।
ଏହାପରେ ୱାର୍ଡର ନର୍ସିଂ କର୍ମଚାରୀମାନେ ଏ ବିଷୟରେ ଡାକ୍ତରମାନଙ୍କୁ ସୂଚନା ଦେଇଥିଲେ। ଏ ସମ୍ପର୍କରେ ପୋଲିସ ଓ ପ୍ରଶାସନକୁ ସୂଚନା ଦିଆଯାଇଥିଲା। ଏହାପରେ ପୋଲିସ ସେମାନଙ୍କୁ ଖୋଜାଖୋଜି ଆରମ୍ଭ କରିଥିଲେ । ପରେ ସହରଠାରୁ ପ୍ରାୟ 5 କିଲୋମିଟର ଦୂରରେ ଥିବା ସେମାଲିଆ ଗ୍ରାମରେ ପୋଲିସ ସେମାନଙ୍କୁ କାବୁ କରିଥିଲା ।
ଉଭୟ ଅଭିଯୁକ୍ତଙ୍କୁ ଆଣିବାକୁ ଆମ୍ବୁଲାନ୍ସ ପଠାଯାଇଥିଲା। ପିପିଇ କିଟ୍ ପିନ୍ଧି ଘଟଣାସ୍ଥଳରେ ଆମ୍ବୁଲାନ୍ସ କର୍ମଚାରୀ ପହଞ୍ଚିଥିଲେ। ଉଭୟଙ୍କୁ ସତର୍କତାର ସହିତ ଜିଲ୍ଲା ଡାକ୍ତରଖାନାକୁ ଅଣାଯାଇଥିଲା।
ବ୍ୟୁରୋ ରିପୋର୍ଟ, ଇଟିଭି ଭାରତ
