ଶିମଲା: ଚଣ୍ଡୀଗଡ-ମନାଲି ଜାତୀୟ ରାଜପଥର ସ୍ବାରଘାଟରେ ସଡକ ଦୁର୍ଘଟଣା । ଭାରସାମ୍ୟ ହରାଇ ରାସ୍ତାରେ ଓଲଟିଲା ବସ୍ । ଏଥିରେ ବସରେ ଥିବା 50ରୁ ଅଧିକ ଯାତ୍ରୀ ଗୁରୁତର ଆହତ ହୋଇଛନ୍ତି । ସମସ୍ତଙ୍କୁ ଚିକିତ୍ସା ପାଇଁ ଜିଲ୍ଲା ହସ୍ପିଟାଲରେ ଭର୍ତ୍ତି କରାଯାଇଛି ।
ସୂଚନାନୁସାରେ, ଦୁର୍ଘଟଣାଗ୍ରସ୍ତ ବସଟି ଦିଲ୍ଲୀରୁ ମନାଲି ଯାଉଥିଲା । ଏହି ସମୟରେ ଗମ୍ଭରୋଲା ନିକଟରେ ବସଟି ଭାରସାମ୍ୟ ହରାଇ ରାସ୍ତାରେ ଓଲଟି ପଡିଥିଲା । ତେବେ ବସ ଚାଳକଙ୍କ କହିବାନୁସାରେ ଟାୟାର ପମ୍ପଚର ହେବାରୁ ବସଟି ଭାରସାମ୍ୟ ହରାଇଥିଲା । ସ୍ଥାନୀୟ ଲୋକଙ୍କ ସହାୟତାରେ ବସ ଭିତରୁ ଯାତ୍ରୀଙ୍କୁ ଉଦ୍ଧାର କରାଯାଇଥିଲା । ଏହା ପରେ 108 ଆମ୍ବୁଲାନ୍ସ ମାଧ୍ୟମରେ ସମସ୍ତଙ୍କୁ ଜିଲ୍ଲା ହସ୍ପିଟାଲରେ ଭର୍ତ୍ତି କରାଯାଇ ଚିକିତ୍ସା କରାଯାଉଛି । ଘଟଣାସ୍ଥଳରେ ପୋଲିସ ଅଧିକାରୀଙ୍କ ସହ ପ୍ରଶାସନିକ ଅଧିକାରୀ ମଧ୍ୟ ଉପସ୍ଥିତ ଅଛନ୍ତି । ବସରେ ଥିବା ସମସ୍ତ ଯାତ୍ରୀ କେରଳ କାଲିକଟ ଜିଲ୍ଲାର ଏମଇଏସ ଆର୍ଟସ ଏବଂ ସାଇନ୍ସ କଲେଜର ଛାତ୍ରଛାତ୍ରୀ ବୋଲି ସୂଚନା ମିଳିଛି ।
