ପକ୍ଷୀମାନେ ସାଧାରଣତଃ ମଣିଷକୁ ଖୁବ ପସନ୍ଦ ଥିବା ବେଳେ ବାଦୁଡିକୁ ନେଇ ମନରେ ବସା ବାନ୍ଧିଛି ଅନେକ ଅନ୍ଧବିଶ୍ବାସ । ଏହାକୁ ଅଧିକାଂଶ ଲୋକେ ନିଶାଚର ବା ଭୂତ ପ୍ରେତ ବୋଲି ମାନୁଥିବା ବେଳେ ସାଧାରମରେ ଏହାକୁ ଅଶୁଭ ବୋଲି ଧରାଯାଏ । ନିକଟ ଅତୀତରେ କେରଳରେ ବାଦୁଡି ଜନିତ ନିପା ଭୂତାଣୁରୁ ସଂକ୍ରମଣ ଆରମ୍ଭ ହୋଇଥିଲା । ଏହା ଦ୍ବାରା ଅନେକ ଲୋକଙ୍କର ମୃତ୍ୟୁ ହୋଇଥିବା ବେଳେ ବର୍ତ୍ତମାନର କୋରୋନା ମହାମାରୀ ପଛରେ ମଧ୍ୟ ବାଦୁଡି ମୁଖ୍ୟ ଦାୟୀ ବୋଲି ବିଶ୍ବାସ କରାଯାଉଛି । ଏମିତିରେ ଭାରତରେ ହିଁ ରହିଛି ଏକ ଏପରି ଗାଁ, ଯେଉଁଠାରେ ବାଦୁଡିକୁ ଶୁଭ ମାନିବା ସହ ସେମାନଙ୍କ ପାଇଁ ସ୍ବତନ୍ତ୍ର ମନ୍ଦିର ରହିଛି । ଏହି ମନ୍ଦିରରେ ବାଦୁଡିମାନଙ୍କୁ ପୂଜା କରାଯାଇଥାଏ ।
ସାଧାରଣତଃ ବାଦୁଡି ନାମ କହିବା ମାତ୍ରେ ଗଛରେ ଝୁଲୁଥିବା ଏହାର ଓଲଟା ଶରୀର ଓ କିଛି ନକାରାତ୍ମକ ଭାବନା ମନକୁ ଆସିଥାଏ । ଏମିତିରେ ବିହାରର ବୈଶାଲୀ ଜିଲ୍ଲାରେ ଏକ ଏପରି ଗାଁ ରହିଛି ଯେଉଁଠି ବାଦୁଡିମାନଙ୍କୁ ଗ୍ରାମ ଦେବତା ପରି ପୂଜା କରାଯାଏ । ଏହି ଗାଁରେ ବିଶ୍ବାସ କରାଯାଏ କି ବାଦୁଡିମାନେ ହେଲେ ସମ୍ପନ୍ନତାର ପ୍ରତୀକ । ଏମାନେ ଯେଉଁ ସ୍ଥାନରେ ରୁହନ୍ତି ସେଠାରେ ସୁଖ, ସମୃଦ୍ଧି ଲାଗି ରହିବା ସହ ସେଠାରେ କେବେ ଧନର ଅଭାବ ହୁଏ ନାହିଁ ।
ବୈଶାଲୀ ଜିଲ୍ଲାର ସରସଈ ଗ୍ରାମରେ ଏପରି ଭିନ୍ନ ବିଶ୍ବାସ ଦେଖିବାକୁ ମିଳେ । ଏହି ଗାଁରେ ଗ୍ରାମବାସୀଙ୍କ ଏପରି ବିଶ୍ବାସ ଯୋଗୁଁ ହଜାର ହଜାର ସଂଖ୍ୟାରେ ବାଦୁଡି ଏଠାରେ ବସବାସ କରନ୍ତି । କହିବାକୁ ଗଲେ ବାଦୁଡିମାନଙ୍କ ପାଇଁ ଏହି ଗାଁଟି ସାରା ଦେଶରେ ପ୍ରସିଦ୍ଧି ଲାଭ କରିଛି । ଏଠାକାର ଲୋକଙ୍କ ବିଶ୍ବାସ ରହିଛି ବାଦୁଡିମାନେ ପୁରା ଗାଁକୁ ସୁରକ୍ଷା ପ୍ରଦାନ କରିଛନ୍ତି । ଯେବେଠାରୁ ବାଦୁଡିମାନେ ଗାଁରେ ରହୁଛନ୍ତି ସେବେଠାରୁ ଗାଁରେ ସୁଖ ସମୃଦ୍ଧି ଲାଗି ରହିଛି । ଏନେଇ ଗାଁରେ କୌଣସି ଶୁଭ କାର୍ଯ୍ୟ ପୂର୍ବରୁ ବାଦୁଡିଙ୍କୁ ପୂଜା କରାଯିବାର ବିଧି ରହିଛି । କେବଳ ସେତିକି ନୁହେଁ, ଖାସ ବାଦୁଡିମାନଙ୍କୁ ଦେଖିବା ପାଇଁ ଲୋକେ ଏହି ଗାଁକୁ ଆସିଥାଆନ୍ତି ।
ତେବେ ଗ୍ରାମବାସୀଙ୍କ କହିବା ଅନୁଯାୟୀ ଏହି ବାଦୁଡିମାନଙ୍କୁ ଦେଖିବାକୁ ଦୂର ଦୂରାନ୍ତରୁ ଲୋକେ ଆସୁଥିଲେ ସୁଦ୍ଧା ବାଦୁଡି କେବେ କାହାର କ୍ଷତି କରିନାହିଁ । ସେପଟେ ବିଳମ୍ବିତ ରାତିରେ ଯଦି ଗାଁରେ କିଛି ଅଘଟଣ ହୁଏ କିମ୍ବା କେହି ଅଜଣା ବ୍ୟକ୍ତି ଗାଁରେ ପ୍ରବେଶ ଉଦ୍ୟମ କରେ, ତେବେ ବାଦୁଡି ଗର୍ଜନ ଆରମ୍ଭ କରିଦିଅନ୍ତି ।
ସରସଈ ଗ୍ରାମର ଏକ ପୋଖରୀ କୂଳରେ ଥିବା ଅଶ୍ବତ୍ଥ ଗଛରେ ଏହି ବାଦୁଡିମାନେ ରହୁଥିବା ବେଳେ ଏହି ପୋଖରୀଟି 1402 ଶତାବ୍ଦୀର ବୋଲି ବିଶ୍ବାସ ରହିଛି । ରାଜା ଶିବ ସିଂ ଏହି ପୁସ୍କରିଣୀକୁ ଖୋଳାଇଥିଲେ । ଏହି ପୋଖରୀ ପାଖରେ ଏକ ଶିବ ମନ୍ଦିର ମଧ୍ୟ ରହିଛି । ସେପଟେ ଆଖପାଖରେ ପ୍ରାୟ 50 ଏକର ପର୍ଯ୍ୟନ୍ତ ସବୁଜିମା ରହିଛି । ଯେଉଁଠାରେ ବାଦୁଡିମାନେ ବସବାସ କରନ୍ତି । ତେବେ ଏହି ଗ୍ରାମବାସୀ ଯେ କେବଳ ବାଦୁଡିର ପୂଜା କରନ୍ତି, ତାହା ନୁହେଁ ବରଂ ବାଦୁଡିଙ୍କ ସୁରକ୍ଷା ପ୍ରତି ମଧ୍ୟ ବିଶେଷ ଧ୍ୟାନ ଦେଇଥାଆନ୍ତି ।
