ଅନ୍ଧବିଶ୍ବାସର କରୁଣ ପରିଣତି: ଘରୁ ଟାଣି ଆଣି 4 ଜଣଙ୍କୁ ପିଟିପିଟି ହତ୍ୟା

ରାଞ୍ଚିର ଗୁମଲା ଜିଲ୍ଲାରେ ଅନ୍ଧବିଶ୍ବାସ ନେଲା 4 ଜୀବନ । ଗୁଣି-ଗାରେଡି ସନ୍ଦେହରେ ସିସକାରୀ ଗାଁରେ 4 ବ୍ୟକ୍ତିଙ୍କୁ ଲାଠିରେ ପିଟି ପିଟି ହତ୍ୟା କଲେ ଦୁର୍ବୃତ୍ତ । ତେବେ ପୋଲିସ ଘଟଣାସ୍ଥଳରେ ପହଞ୍ଚି ଘଟଣାର ଅସଲ କାରଣ ଖୋଜୁଛି ।

ରାଞ୍ଚି: ଦେଶ ବହୁତ ବିକାଶ କଲାଣି, ହେଲେ ଲୋକଙ୍କ ଚିନ୍ତାଧାରା ଏପର୍ଯ୍ୟନ୍ତ ବିକଶିତ ହୋଇପାରିଲା ନାହିଁ । ଆଜି ବି ଲୋକେ ଅନ୍ଧବିଶ୍ବାସର ସାହାରା ନେଉଛନ୍ତି । ଆଉ ଏହି ଅନ୍ଧବିଶ୍ବାସ ଯୋଗୁଁ ନିଷ୍ପାପଙ୍କ ଜୀବନ ଯାଉଛି । ଝାଡଖଣ୍ଡ ଗୁମଲା ଜିଲ୍ଲାର ସିସଇ ଥାନା ଅନ୍ତର୍ଗତ ସିସକାରୀ ଗାଁରେ ଏଭଳି ଏକ ଅନ୍ଧବିଶ୍ବାସ ଘଟଣା ସାମନାକୁ ଆସିଛି । ଏଠାରେ କେତେକ ଦୁର୍ବୃତ୍ତ ଗାଁ ଭିତରକୁ ପ୍ରବେଶ କରି 4 ଜଣଙ୍କୁ ଲାଠିରେ ପିଟି ପିଟି ହତ୍ୟା କରିଛନ୍ତି ।

ମୃତକଙ୍କ ମଧ୍ୟରୁ 2 ମହିଳା ଏବଂ 2 ପୁରୁଷ ଥିଲେ । ଏହି ମାମଲାଟି ଅନ୍ଧବିଶ୍ବାସ ତଥା ଗୁଣି-ଗାରେଡି ସହ ଜଡିତ ବୋଲି ଅନୁମାନ କରାଯାଉଛି । ଗାଁ ଲୋକଙ୍କ କହିବା ହେଲା ରାତି ଅଧରେ 8ରୁ 10 ମୁଖାଧାରୀ ଗାଁ ଭିତରକୁ ପ୍ରବେଶ କରିଥିଲେ । ସେମାନେ ଉକ୍ତ 4 ବ୍ୟକ୍ତିଙ୍କୁ ଘରୁ ଟାଣି ଆଣି ଗାଁ ମଝିରେ ହତ୍ୟା କଲେ । ଏହି ମାମଲା ସମ୍ପର୍କରେ ପୋଲିସକୁ ସୂଚନା ମିଳିବା ମାତ୍ରେ ପୋଲିସ ଘଟଣାସ୍ଥଳକୁ ପହଞ୍ଚି ଗାଁ ଲୋକଙ୍କୁ ପଚରାଉଚୁରା କରୁଛି । ସେପଟେ ଏହି ଘଟଣାରେ ଗାଁ ଲୋକେ ଭୟଭୀତ ହୋଇଛନ୍ତି । ପୋଲିସର କହିବା କଥା ହେଲା ଉକ୍ତ ମାମଲାଟି ଅନ୍ଧବିଶ୍ବାସ ସହ ଜଡିତ । ଖୁବଶୀଘ୍ର ଏହାର କାରଣ ଖୋଜିବ ପୋଲିସ ।