ନୂଆଦିଲ୍ଲୀ: ସର୍ଜିକାଲ ଷ୍ଟ୍ରାଇକ ନେଇ ବିବାଦ ଥମିବାର ନା ନେଉନାହିଁ । ଏହା ଉପରେ ପ୍ରାୟଦିନ ଆସୁଛି ବିଭିନ୍ନ ରାଜନୈତିକ ମନ୍ତବ୍ୟ । ସର୍ଜିକାଲ ଷ୍ଟ୍ରାଇକକୁ ନେଇ ବିଜେପି ନିର୍ବାଚନରେ ଫାଇଦା ଉଠାଇବାକୁ ପ୍ରୟାସ କରୁଛି ବୋଲି ଅଭିଯୋଗ କରୁଛନ୍ତି ବିରୋଧୀ । ଏହାସହ ମୋଦି ସରକାରଙ୍କୁ ଟାର୍ଗେଟ ମଧ୍ୟ କରୁଛନ୍ତି ବିରୋଧୀ । ମନମୋହନ ସିଂଙ୍କ ସରକାରରେ ୧୧ଥର ସର୍ଜିକାଲ ଷ୍ଟ୍ରାଇକ ହୋଇଛି । ମାତ୍ର ତତ୍କାଳୀନ ସରକାର ଏହାର ନିର୍ବାଚନୀ ଫାଇଦା ପାଇଁ ପ୍ରଚାର କରି ନଥିଲେ ବୋଲି ଦାବି କରିଛନ୍ତି ତେଲେଙ୍ଗାନା ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓ ।
ସେ ଶୁକ୍ରବାର ଦାବି କରି କହିଛନ୍ତି ଯେ, ଯେତେବେଳେ ସେ କଂଗ୍ରେସ ନେତୃତ୍ବାଧୀନ ସଂଯୁକ୍ତ ପ୍ରଗତିଶୀଳ ମେଣ୍ଟ (ୟୁପିଏ) ସରକାରରେ ମନ୍ତ୍ରୀ ଥିଲେ, ସେହି ସମୟରେ ଭାରତ ତରଫରୁ ୧୧ ଥର ସର୍ଜିକାଲ ଷ୍ଟ୍ରାଇକ କରାଯାଇଥିଲା । କେସିଆର ବର୍ଷ ୨୦୦୪ରୁ ୨୦୦୬ ଯାଏଁ ମନମୋହନ ସରକାରଙ୍କ ସମୟରେ ଶ୍ରମ ଓ ରୋଜଗାର ମନ୍ତ୍ରୀ ଥିଲେ ।
ସିରୟାଲଗୁଣ୍ଡାରେ ଏକ ନିର୍ବାଚନୀ ସଭାକୁ ସମ୍ବୋଧନ କରି ସେ ଏହି ଖୁଲାସା କରିଥିବା ବେଳେ ମୋଦି ସରକାର ସର୍ଜିକାଲ ଷ୍ଟ୍ରାଇକକୁ ନେଇ ନିର୍ବାଚନୀ ଫାଇଦା ଉଠାଇବାକୁ ପ୍ରୟାସ କରୁଛନ୍ତି ବୋଲି ଅଭିଯୋଗ ଆଣିଛନ୍ତି କେସିଆର । ଯାହାକୁ ନେଇ ସେ କଡା ସମାଲୋଚନା ମଧ୍ୟ କରିଛନ୍ତି ।
