ଲକ୍ଷ୍ନୌ: ଆସନ୍ତା ଜାନୁଆରୀ ୨୨ ତାରିଖରେ ଅଯୋଧ୍ୟା ରାମ ମନ୍ଦିରର ପ୍ରାଣ ପ୍ରତିଷ୍ଠା । ଏହାର ୨ ଦିନ ପୂର୍ବରୁ ୧୮ ତାରିଖରୁ ପୂଜାବିଦ୍ଧି ଆରମ୍ଭ ହେବ । ଏହି ଭବ୍ୟ ସମାରୋହରେ ୧୫୦ରୁ ଅଧିକ ବିଦ୍ବାନ ସାମିଲ ହେବେ । ଲୋକାରଣ୍ୟ ହେବ କାଶୀ । ତେବେ ପୂଜା ପୂର୍ବରୁ ରାମଲଲାଙ୍କୁ ଔଷଧରେ ସ୍ନାନ କରାଯିବ । ଏ ନେଇ ସୂଚନା ଦେଇଛନ୍ତି ରାମ ମନ୍ଦିରର ସହକାରୀ ପୂଜାରୀ ଲକ୍ଷ୍ମୀକାନ୍ତ ଦୀକ୍ଷିତ ।
କାହିଁକି ଔଷଧରେ ସ୍ନାନ କରିବେ ରାମଲଲା ? :- ପୂଜାରୀ ଜଣକ ଏହି ସୂଚନା ଦେବା ପରେ ଲୋକଙ୍କ ମନରେ ଅନେକ ପ୍ରଶ୍ନ ଉଠିଛି । ପୂଜାରୀଙ୍କ କହିବାନୁସାରେ ମୂର୍ତ୍ତି ନିର୍ମାଣ ସମୟରେ ବିଭିନ୍ନ ଧରଣର ସ୍ପର୍ଶ ସହିତ କିଛି ଦୋଷ ମଧ୍ୟ ରହିଥାଏ । ମୂର୍ତ୍ତିକୁ ସମ୍ପୂର୍ଣ୍ଣ ସୁଦ୍ଧ କରିବା ଲାଗି ବିଭିନ୍ନ ପ୍ରକାର ଜଡିବୁଟିରେ ପ୍ରସ୍ତୁତ ଔଷଧ ଲେପରେ ରାମଲଲାଙ୍କୁ ସ୍ନାନ କରାଯିବ । ଏହି ବିଶେଷ ସ୍ନାନ ସମୟରେ ଯେଉଁ ଜଳର ବ୍ୟବହାର କରାଯିବ ତାହାକୁ ଦେଶର ବିଭିନ୍ନ ସ୍ଥାନରେ ଥିବା ମହତ୍ତ୍ବପୂର୍ଣ୍ଣ ସ୍ଥାନରୁ ସଂଗ୍ରହ କରାଯିବ । ଏଥିରେ ସପ୍ତ ସାଗରର ଜଳ ରହିବ । ଏହି ସ୍ନାନ କରାଯିବା ପରେ ରାମଲଲା ନିଜ ସ୍ଥାନରେ ବିରାଜିବେ ।
ଏହା ବି ପଢନ୍ତୁ- ରାମ ମନ୍ଦିର ପ୍ରତିଷ୍ଠା ଉତ୍ସବରେ ଯୋଗ ଦେବେ ଆଡଭାନୀ ଏବଂ ଯୋଶୀ ! ନିମନ୍ତ୍ରଣ କଲେ ଭିଏଚପି ସଭାପତି
୨୨ ଜାନୁଆରୀରେ ପ୍ରାଣ ପ୍ରତିଷ୍ଠା ଉତ୍ସବ:- ଆସନ୍ତା ଜାନୁଆରୀ ୨୨ ତାରିଖରେ ରାମଲଲାଙ୍କ ପ୍ରାଣ ପ୍ରତିଷ୍ଠା କରାଯିବ । ଏହି ମୁହୂର୍ତ୍ତିକୁ ସନାତନ ଧର୍ମାବଲମ୍ବୀ ଦୀର୍ଘ ୫୦୦ରୁ ଅଧିକ ବର୍ଷ ଧରି ଅପେକ୍ଷା କରିଥିଲେ । ତେବେ ଆଉ କିଛିଟା ଦିନ ପରେ ଅନେକ ଋଷି, ମୁନିଋଷି ଓ ରାମଭକ୍ତଙ୍କ ଇଚ୍ଛା ପୂର୍ଣ୍ଣ ହେବ । ରାମ ଜନ୍ମଭୂମି ଅଯୋଧ୍ୟାରେ ବିଶାଳ ମନ୍ଦିର ନିର୍ମାଣ କାର୍ଯ୍ୟ ଜାରି ରହିଛି । ମନ୍ଦିରର ପ୍ରଥମ ମହଲାରେ ରାମଲଲାଙ୍କ ମୂର୍ତ୍ତିକୁ ସ୍ଥାପିତ କରାଯିବ । ଏହି ଉତ୍ସବରେ ପ୍ରାୟ ୧୫୦ ଜଣ ବିଦ୍ବାନ ସାମିଲ ହେବାକୁ ଥିବା ବେଳେ ଏମାନଙ୍କ ପ୍ରତିନିଧିତ୍ବ କରିବେ ସହକାରୀ ପୂଜାରୀ ଲକ୍ଷ୍ମୀକାନ୍ତ ଦୀକ୍ଷିତ ଓ ପୁଅ ସୁନୀଲ ଦୀକ୍ଷିତ ।
ସହକାରୀ ପୂଜାରୀ ଲକ୍ଷ୍ମୀକାନ୍ତ ଦୀକ୍ଷିତ କିଏ ? :- କାଶୀର ପଣ୍ଡିତ ଲକ୍ଷ୍ମୀକାନ୍ତ ଦୀକ୍ଷିତ ଛତ୍ରପତି ମହାରାଜା ଶିବାଜୀଙ୍କ ରାଜାଭିଷେକ କରିଥିବା ବ୍ରାହ୍ମଣଙ୍କ ବଂଶଜ । ଆଜକୁ ୩୫୦ ପୂର୍ବରୁ ଛତ୍ରପତି ମହାରାଜା ଶିବାଜୀଙ୍କ ରାଜାଭିଷେକ କରିଥିବା ମହାପଣ୍ଡିତ ଗାଗାଭଟ୍ଟଙ୍କ ବଂଶଜ । ଦୀର୍ଘ ବର୍ଷ ଧରି ପିଢି ପରେ ପିଢି ତାଙ୍କ ବଂଶ ପୂଜାପାଠ କରିଆସୁଚନ୍ତି । ସେ ରାମଲଲାଙ୍କ ପ୍ରାଣ ପ୍ରତିଷ୍ଠା ଉତ୍ସବରେ ସାମିଲ ହୋଇଥିବା ବେଳେ ତାଙ୍କ ଗୁରୁତ୍ବପୂର୍ଣ୍ଣ ଦାୟିତ୍ବ ଦିଆଯାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
