ନୂଆଦିଲ୍ଲୀ: କାଶ୍ମୀରବାସୀଙ୍କ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସ୍ବାସ୍ଥ୍ୟ ଉପହାର । କେନ୍ଦ୍ର ସରକାରଙ୍କ ଆୟୁଷ୍ମାନ ଯୋଜନାକୁ କାଶ୍ମୀରରେ ଲଞ୍ଚ୍ କଲେ ପ୍ରଧାନମନ୍ତ୍ରୀ । ଏହାସହ ମୋଦି ବିରୋଧିଙ୍କ ଉପରେ ମଧ୍ୟ ପ୍ରବଳ ବର୍ଷିଥିଲେ । ମୋଦିଙ୍କ ସହ ଭିଡିଓ କନଫରେନ୍ସିଂ ଜରିଆରେ ଗୃହମନ୍ତ୍ରୀ ଅମିତ ଶାହା ମଧ୍ୟ ଯୋଡି ହୋଇଛନ୍ତି । ସମ୍ପୂର୍ଣ୍ଣ ଜାମ୍ମୁ- କାଶ୍ମୀରରେ ୟୁନିଭର୍ସାଲ୍ ସ୍ବାସ୍ଥ୍ୟ କଭରେଜ୍ କରିବା ଏହି ଯୋଜନାର ଉଦ୍ଦେଶ୍ୟ । ସମସ୍ତ ନାଗରିକଙ୍କୁ ସ୍ବାସ୍ଥ୍ୟ ସମ୍ବନ୍ଧୀୟ ସୁରକ୍ଷା ପ୍ରଦାନ କରିବା ସହ ସମସ୍ତଙ୍କୁ ଆର୍ଥିକ ସହାୟତା ଯୋଗାଇଦେବ ଏହି ଯୋଜନା ।
ଏହି ଯୋଜନା ଜାମ୍ମୁ କାଶ୍ମୀରର ସମସ୍ତ ବାସିନ୍ଦାଙ୍କୁ ମାଗଣା ବୀମା ସୁବିଧା ଯୋଗାଇବ । ଏଥିରେ ଗୋଟିଏ ପରିବାର ପାଇଁ 5 ଲକ୍ଷ ଟଙ୍କା ବୀମାରାଶି ଦିଆଯିବ । ଏହି ଯୋଜନା ପ୍ରଧାନମନ୍ତ୍ରୀ ଜନ ଆରୋଗ୍ୟ ଯୋଜନା ସହିତ କାର୍ଯ୍ୟ କରିବ । ଏହି ଯୋଜନାର ବିଶେଷତ୍ବ ହେଉଛି ଏହାର ସୁବିଧା ଦେଶର ଯେକୌଣସି ସ୍ଥାନରେ ସୁବିଧାରେ ମିଳିପାରିବ । ପ୍ରଧାନମନ୍ତ୍ରୀ ଜନ ଆରୋଗ୍ୟ ଯୋଜନା (PM-JAY) ଅଧୀନରେ ଆସୁଥିବା ସମସ୍ତ ଡାକ୍ତରଖାନା ଏହି ଯୋଜନା ଅଧୀନରେ ଆସିବ ।
ଯୋଜନାକୁ ଲଞ୍ଚ୍ କରିବା ପରେ ମୋଦି ଏହାର ଗୁଣବତ୍ତା ବିଷୟରେ ବଖାଣିଛନ୍ତି । ଜାମ୍ମୁ ଓ ଶ୍ରୀନଗରରୁ ଅନେକ ବ୍ୟକ୍ତି ମୋଦିଙ୍କ ସହ ଆଲୋଚନା କରିଥିଲେ ଓ ସ୍ବାସ୍ଥ୍ୟ କାର୍ଡର ଉପକାରିତା ବିଷୟରେ ଜଣାଇଥିଲେ । ତେବେ ଏହି ଯୋଜନା ଅନ୍ତର୍ଗତ 229 ସରକାରୀ ହସ୍ପିଟାଲ ଓ 35ଟି ଘରୋଇ ହସ୍ପିଟାଲ ସ୍ଥାପନା କରାଯିବ । ଏହାସହ ରାଜ୍ୟପାଳ ମନୋଜ ସିହ୍ନାଙ୍କ ପ୍ରଶଂସା କରିଥିଲେ ଶାହା ।
ଏହି ଅବସରରେ ପ୍ରଧାନମନ୍ତ୍ରୀ ମୋଦି କହିଛନ୍ତି, ଆଜି ଜାମ୍ମୁ କାଶ୍ମୀର ପାଇଁ ଏକ ଐତିହାସିକ ଦିନ । ଆଜିଠାରୁ ଜାମ୍ମୁ କାଶ୍ମୀରର ଲୋକେ ଆୟୁଷ୍ମାନ ଭାରତ ଯୋଜନାର ଲାଭ ଉଠାଇ ପାରିବେ। ଏହି ଅବସରରେ ସେ ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀଙ୍କୁ ସ୍ମରଣ କରି କହିଥିଲେ ଯେ ସେ ଜାମ୍ମୁ କାଶ୍ମୀରକୁ ବହୁତ ଭଲ ପାଆନ୍ତି। ଜାମ୍ମୁ କାଶ୍ମୀର ପ୍ରଶାସନ ଲୋକଙ୍କ ଆତ୍ମବିଶ୍ବାସକୁ ମଜବୁତ କରିଛି। ଏଠାରେ ସ୍ବଚ୍ଛ ନିର୍ବାଚନ ହେବା ଗର୍ବର ବିଷୟ।
ପ୍ରଧାନମନ୍ତ୍ରୀ ମୋଦି ଆହୁରି ମଧ୍ୟ କହିଛନ୍ତି, ମହାତ୍ମାଗାନ୍ଧୀ ଗ୍ରାମ ସ୍ବରାଜଙ୍କ ସ୍ଲୋଗାନ ଦେଇଛନ୍ତି। ଆମେ ତାଙ୍କ ସ୍ବପ୍ନକୁ ପୂରଣ କଲୁ । ଏହାସହ ବିରୋଧିଙ୍କୁ ଟାର୍ଗେଟ କରି ମୋଦି କହିଛନ୍ତି, ଦିଲ୍ଲୀରେ ବହୁତ ଲୋକ ଅଛନ୍ତି ଯେଉଁମାନେ ମୋତେ ଅଭିଶାପ ଦିଅନ୍ତି, ମୋ ବିରୁଦ୍ଧରେ ଅପମାନଜନକ ଭାଷାର ବ୍ୟବହାର କରନ୍ତି । କିନ୍ତୁ ଜାମ୍ମୁ କାଶ୍ମୀରରେ ନିର୍ବାଚନ ସଫଳତାର ସହିତ ଅନୁଷ୍ଠିତ ହୋଇଯାଇଛି । ଯେଉଁମାନେ ମୋତେ ଗଣତନ୍ତ୍ର ଉପରେ ଭାଷଣ ଦିଅନ୍ତି ସେମାନେ ମନେ ରଖିବା ଉଚିତ୍ ଯେ ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ମଧ୍ୟ ପୁଡୁଚେରୀରେ ପଞ୍ଚାୟତ ନିର୍ବାଚନ ଅନୁଷ୍ଠିତ ହୋଇନାହିଁ ।
ନିକଟରେ ହୋଇଥିବା ଡିଡିସି ନିର୍ବାଚନରେ ଶାହା କହିଛନ୍ତି ଯେ ଡିଡିସି ନିର୍ବାଚନରେ ଗୋଟିଏ ବୁନ୍ଦା ରକ୍ତ ଝରିନି । ନିର୍ବାଚନ ଶାନ୍ତିପୂର୍ଣ୍ଣ ଏବଂ ସ୍ବଚ୍ଛ ଢଙ୍ଗରେ ଅନୁଷ୍ଠିତ ହୋଇଥିଲା। ଶାହା କହିଛନ୍ତି, ଡିଡିସି ନିର୍ବାଚନ ପରେ ବିକାଶ ଗାଁ-ଗାଁରେ ପହଞ୍ଚିବ। କେନ୍ଦ୍ର ସରକାରଙ୍କ ଟଙ୍କା ବର୍ତ୍ତମାନ ଜାମ୍ମୁ କାଶ୍ମୀର ସରକାର ପରିବର୍ତ୍ତେ ଜିଲ୍ଲା ବିକାଶ ପରିଷଦକୁ ଯିବ । ଫଳରେ ସେମାନେ ଏହି ଅଞ୍ଚଳର ବିକାଶ ପାଇଁ ରୋଡମ୍ୟାପ ପ୍ରସ୍ତୁତ କରିବେ। ସେ କହିଛନ୍ତି ଯେ ପ୍ରଥମ ଥର ପାଇଁ ଜାମ୍ମୁ କାଶ୍ମୀରରେ ବିକାଶ ବୃଦ୍ଧି ପାଇଛି ଏବଂ ସେ ଶାନ୍ତି ଅନୁଭବ କରୁଛନ୍ତି ।
