ଅଯୋଧ୍ୟା : ଆସନ୍ତା ୨୨ ତାରିଖରେ ଅଯୋଧ୍ୟାରେ ହେବ ପ୍ରଭୁ ରାମଲାଲାଙ୍କ ବିଗ୍ରହରେ ପ୍ରାଣ ପ୍ରତିଷ୍ଠା । ଏଥି ପାଇଁ ଦେଶ ବିଦେଶରେ ଶ୍ରଦ୍ଧାଳୁ ମାନେ ବେଶ ଉତ୍ସାହିତ ଅଛନ୍ତି । ଏହି ଭବ୍ୟ ସମାରୋହ ପାଇଁ ଅଯୋଧ୍ୟା ନବବଧୂ ପରି ସଜେଇ ହେଉଛି । ଏହି କ୍ରମରେ ଅଯୋଧ୍ୟା ରେ ପ୍ରତିଷ୍ଠା ହେବ ଦେଶର ପ୍ରଥମ ୭ ଷ୍ଟାର ବିଳାସମୟୀ ହୋଟେଲ, ଯେଉଁଠି କେବଳ ଶୁଦ୍ଧ ଶାକାହାରୀ ଖାଦ୍ୟ ପରିବେଷଣ କରାଯିବ । ଏସମ୍ପର୍କ ରେ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟ ନାଥ ଏକ କାର୍ଯ୍ୟକ୍ରମରେ ଘୋଷଣା କରିଛନ୍ତି । ସେ କହିଛନ୍ତି ଯେ ଅଯୋଧ୍ୟାରେ ହୋଟେଲ ନିର୍ମାଣ ପାଇଁ ଆମକୁ ୨୫ ଟି ପ୍ରସ୍ତାବ ମିଳିଛି ଯେଉଁଥିରେ ଏକ ସମ୍ପୂର୍ଣ୍ଣ ଶାକାହାରୀ ୭ ଷ୍ଟାର ହୋଟେଲର ପ୍ରସ୍ତାବ ମଧ୍ୟ ଆସିଛି । ଏହା ସହ ଅଯୋଧ୍ୟାକୁ ଏକ ଧାର୍ମିକ ପର୍ଯ୍ୟଟନ ହବ ଭାବେ ଗଢି ତୋଳିବାକୁ ପ୍ରୟାସ ହେଉଛି ।
ସେହିପରି ମୁମ୍ବାଇ ସ୍ଥିତ ଏକ ରିଆଲ ଇଷ୍ଟେଟ ଫର୍ମ ଅଯୋଧ୍ୟାରେ ଏକ ୫ ଷ୍ଟାର ହୋଟେଲ ମଧ୍ୟ ଖୋଲିବାକୁ ଯାଉଛି । ସେହିପରି ରାମ ମନ୍ଦିର ପ୍ରତିଷ୍ଠା ଦିବସ ଅର୍ଥାତ ଜାନୁଆରୀ ୨୨ ତାରିଖ ଦିନ ଏକ ହାଉସିଂ ପ୍ରୋଜେକ୍ଟ ମଧ୍ୟ ଲଞ୍ଚ ହେବାକୁ ଯାଉଛି । ରାମ ମନ୍ଦିରର ନିର୍ମାଣ କାର୍ଯ୍ୟ ଆରମ୍ଭ ହେବା ଦିନ ଠାରୁ ଅଯୋଧ୍ୟା ରେ ବିଭିନ୍ନ ବିକାଶମୂଳକ କାର୍ଯ୍ୟ ଚାଲିଛି । ଯେଉଁଥିରେ ବିଭିନ୍ନ ହୋଟେଲ ନିର୍ମାଣ ଓ ହାଉସିଂ ପ୍ରୋଜେକ୍ଟ କାର୍ଯ୍ୟ ସାମିଲ ରହିଛି ।
ଏହା ମଧ୍ୟ ପଢନ୍ତୁ ... ଚର୍ଚ୍ଚାରେ ଶତାୟୁ ମହିଳାଙ୍କ ଅନନ୍ୟ ରାମଭକ୍ତି, ରାମ ମନ୍ଦିରକୁ କରିବେ ସଞ୍ଚିତ ଅର୍ଥ ଦାନ
ଅଯୋଧ୍ୟାରେ ପ୍ରତିଷ୍ଠା ହୋଇଥିବା ନୂଆ ଏୟାର ପୋର୍ଟରୁ ମୁମ୍ବାଇ, ଦିଲ୍ଲୀ ଭଳି ଅନ୍ୟ ମହାନଗରକୁ ବିମାନ ଚଳାଚଳ କରିବାର ବ୍ୟବସ୍ଥା ହୋଇଛି । ଅତ୍ୟାଧୁନିକ ସେବା ସହ ରେଳ ଷ୍ଟେସନ ମଧ୍ୟ କାର୍ଯ୍ୟକ୍ଷମ ହୋଇଛି । ସେହିପରି ରାଜଧାନୀ ଲକ୍ଷ୍ନୌରୁ ଚୋପର ହେଲିକପ୍ଟରର ସେବା ଆସନ୍ତା ଶୁକ୍ରବାର ଠାରୁ ଆରମ୍ଭ ହେବ । ବଲିଉଡ଼ ଶେହେନଶାହ ବିଗ୍ ବି ମଧ୍ୟ ଲକ୍ସରୀ ଏକ୍ସକ୍ଲେଭ 'ଦ ସରୟୁ'ରେ ଏକ ଜମି କିଣିଛନ୍ତି , ଯାହା ମନ୍ଦିର ଠାରୁ ୧୫ ମିନିଟ ର ଦୂରତାରେ ଅବସ୍ଥିତ । ଅନେକ ୫ ଷ୍ଟାର ହୋଟେଲ ସରୟୁ ନଦୀ କୂଳରେ ନିର୍ମାଣ ଚାଲିଛି । ସେହିପରି ୧୧୦ ଟି ଛୋଟ ବଡ଼ ହୋଟେଲ ନିର୍ମାତା ଗୁଡିକ ଅଯୋଧ୍ୟା ରେ ପର୍ଯ୍ୟଟକଙ୍କ ରହଣି ପାଇଁ ହୋଟେଲ ତିଆରି କରିବା ପାଇଁ ଜମି କ୍ରୟ କରିଛନ୍ତି । ସେଠାରେ ଏକ ସୋଲାର ପାର୍କ ମଧ୍ୟ ନିର୍ମାଣ ଚାଲିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
