ଅଯୋଧ୍ୟା: ମହ ମହ ବାସିଲାଣି ରାମ ନଗରୀ ଅଯୋଧ୍ୟା । ସତେଜ ଗେଣ୍ଡୁଫୁଲର ସାଜସଜ୍ଜା ମାହୋଲକୁ ଆହୁରି ରଙ୍ଗୀନ କରୁଛି । ଚାରିଆଡେ ଉତ୍ସବର ମାହୋଲ । ରାମ ଜନ୍ମଭୂମିକୁ ନବବଧୂ ଭଳି ସଜେଇବା ଲାଗି ସମସ୍ତେ ତତ୍ପର । ରାମ ମନ୍ଦିର ପ୍ରାଣ ପ୍ରତିଷ୍ଠାକୁ ଆଉ କେଇଟା ଦିନ ବାକି ଥିବା ବେଳେ ଆସନ୍ତାକାଲି (ଶନିବାର) ଅଯୋଧ୍ୟା ଗସ୍ତ କରୁଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ନିର୍ଦ୍ଦେଶରେ ପ୍ରଧାନମନ୍ତ୍ରୀଙ୍କୁ ସ୍ବାଗତ କରିବା ଲାଗି ସମସ୍ତ ପ୍ରସ୍ତୁତି ପ୍ରାୟ ଶେଷ ପର୍ଯ୍ୟାୟରେ ପହଞ୍ଚିଥିବା ବେଳେ ଆକ୍ସନ ମୋଡରେ ରାଜ୍ୟ ସଂସ୍କୃତି ବିଭାଗ ।
ମୋଦିଙ୍କ ସ୍ବାଗତ ପାଇଁ ବିଶେଷ ବ୍ୟବସ୍ଥା:- ଅଯୋଧ୍ୟା ବିମାନ ବନ୍ଦରଠାରୁ ଧର୍ମ ପଥ ଓ ରାମ ପଥଠାରୁ ରେଳ ଷ୍ଟେସନ ପର୍ଯ୍ୟନ୍ତ ପ୍ରଧାନମନ୍ତ୍ରୀ ମୋଦିଙ୍କୁ ସ୍ବାଗତ କରିବା ଲାଗି ପ୍ରାୟ ୧୪୦୦ ସ୍ଥାନୀୟ କଳାକାର ନୃତ୍ୟ ପରିବେଷଣ କରିବେ । ଏଥିଲାଗି ୪୦ଟି ଷ୍ଟେଜ ନିର୍ମାଣ କରାଯାଇଛି । ସେହିପରି ଏୟାରପୋର୍ଟରେ ବୈଠକ ହେବାକୁ ଥିବା ସ୍ଥାନରେ ପ୍ରାୟ ୩୦ ଜଣ କଳାକାର ନିଜର ପ୍ରତିଭା ପ୍ରଦର୍ଶନ କରିବେ । ଏ ନେଇ ମୁଖ୍ୟମନ୍ତ୍ରୀ ଯୋଗୀ ସମସ୍ତ କାର୍ଯ୍ୟ ଉପରେ ନଜର ରଖିଥିବା ବେଳେ ସଂସ୍କୃତି ବିଭାଗକୁ ସମସ୍ତ ଦାୟିତ୍ବ ଦେଇଛନ୍ତି ।
ପ୍ରଧାନମନ୍ତ୍ରୀଙ୍କୁ ଭବ୍ୟ ସ୍ବାଗତ କରିବା ଲାଗି କରାଯାଉଥିବା ସମସ୍ତ ବ୍ୟବସ୍ଥା ନେଇ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ପ୍ରେସ ବାର୍ତ୍ତାରେ କୁହାଯାଇଛି ଯେ ପ୍ରଧାନମନ୍ତ୍ରୀଙ୍କ ରୋଡ ଶୋ' ସମୟରେ ଏହି ୧୪୦୦ ଜଣ ନୃତ୍ୟଶିଳ୍ପୀ ନୃତ୍ୟ ପରିବେଷଣ କରିବେ । ବିମାନବନ୍ଦରର ଗେଟ ନଂ-୩ରେ ଏକ ବଡ଼ ଷ୍ଟେଜ ନିର୍ମାଣ କରାଯାଇଛି । ଏହାବାଦ ଏୟାରପୋର୍ଟର ଅନ୍ୟ ସ୍ଥାନ ଏବଂ ସାକେତ ପେଟ୍ରୋଲ ପମ୍ପ ନିକଟରେ ମୋଟ ୫ଟି ଷ୍ଟେଜ ନିର୍ମାଣ କରାଯାଉଛି । ଧର୍ମ ପଥ ପର୍ଯ୍ୟନ୍ତ କଳାକାରମାନେ ନିଜର ପ୍ରତିଭା ପ୍ରଦର୍ଶନ କରିବେ ।
ପରିବେଷଣ ହେବ ମଥୁରାର ପ୍ରସିଦ୍ଧ 'ମୟୁର' ନୃତ୍ୟ:- ବିଭିନ୍ନ ଷ୍ଟେଜରେ ମଥୁରାର ପ୍ରସିଦ୍ଧ ମୟୁର ନୃତ୍ୟ ପରିବେଷଣ କରିବେ ନୃତ୍ୟଶିଳ୍ପୀ । ସେହିପରି ସ୍ଥାନୀୟ ଅଞ୍ଚଳରେ ପ୍ରସିଦ୍ଧ କଳାକାର ଦୀପକ ଶର୍ମା, ଗୋବିନ୍ଦ ତିୱାରି, ମାଧବ ଆଚାର୍ଯ୍ୟ ମଧ୍ୟ ନିଜ ପ୍ରତିଭାର ପ୍ରଦର୍ଶନ କରି ଉପସ୍ଥିତ ଦର୍ଶକଙ୍କୁ ବିମୋହିତ କରିବେ । ସେହିପରି ଲକ୍ଷ୍ନୌର କଳାକାର ରାଗିଣୀ ଶ୍ରୀବାସ୍ତବ ଓ ସୁଲତାନପୁରର ବ୍ରଜେଶ ପାଣ୍ଡେ ନିଆରା 'ଅବଧି' ଲୋକକଳା ନୃତ୍ୟ ପରିବେଷଣ କରିବେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
