ଲକ୍ଷ୍ନୌ: ବହୁଚର୍ଚ୍ଚିତ ଉତ୍ତରପ୍ରଦେଶ ପ୍ରୟାଗରାଜ ଉମେଶ ପାଲ ଅପହରଣ ମାମଲା । ଆଜି ରାୟ ଶୁଣାଇଛନ୍ତି କୋର୍ଟ । ଏହି ମାମଲାରେ ଗ୍ୟାଙ୍ଗଷ୍ଟାର ଅତିକ ଅହମ୍ମଦ ସମେତ ୩ ଅପରାଧୀଙ୍କୁ ଏମପି-ଏମଏଲଏ କୋର୍ଟ ବିଚାରପତି ଡକ୍ଟର ଦିନେଶ ଚନ୍ଦ୍ର ଶୁକ୍ଲା ଦୋଷୀ ସାବ୍ୟସ୍ତ କରିଛନ୍ତି । ଏହି ୩ ଜଣଙ୍କୁ ଆଜୀବନ ଦଣ୍ଡାଦେଶ ଶୁଣାଇଛନ୍ତି କୋର୍ଟ । ଅତିକର ଭାଇ ଅଶ୍ରଫ ସମେତ ୭ ଜଣଙ୍କୁ କୋର୍ଟ ଦୋଷମୁକ୍ତ କରିଛନ୍ତି । କୋର୍ଟ ଏହି ଘୋଷଣା କରିବା ପରେ ଅତିକ ଭାଇ ଅଶ୍ରଫକୁ ଆଲିଙ୍ଗନ କରି ଖୁବ ଜୋରରେ କାନ୍ଦିଥିବା ସୂଚନା ମିଳିଛି ।
କୋର୍ଟ ଆଇପିସି ଧାରା ୩୬୪(ଏ) ଅନୁଯାୟୀ ୩ ଅପରାଧୀ ଦୋଷୀ ସାବ୍ୟସ୍ତ ହୋଇଛନ୍ତି । ଦୋଷୀଙ୍କ ବିରୋଧରେ ୫ ହଜାର ଲେଖାଏଁ ଅର୍ଥଦଣ୍ଡ ସହିତ ୧ ଲକ୍ଷ ଲେଖାଏଁ କ୍ଷତିପୂରଣ ଦେବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି । ଅତିକ ସହିତ ଦୋଷୀ ସାବ୍ୟସ୍ତ ହୋଇଥିବା ଅନ୍ୟ ଅପରାଧୀ ତଥା ଅତିକର ସହଯୋଗୀଙ୍କ ନାମ ହେଉଛି ଶୌକତ ହନିଫ ଓ ଦିନେଶ ପାସି । ରବିବାର ଅତିକକୁ ଗୁଜୁରାଟ ସାବରମତୀ ଜେଲରୁ ଅଣାଯାଇଥିବା ବେଳେ କାଲି ସେ ପ୍ରୟାଗରାଜରେ ପହଞ୍ଚିଥିଲା । ଏହାପରେ କଡ଼ା ସୁରକ୍ଷାର ସହିତ ତାକୁ ନୈନି ଜେଲରେ ରଖାଯାଇଥିଲା । ଅତିକର ଭାଇ ଅଶ୍ରଫକୁ ମଧ୍ୟ ବରେଲି ଜେଲରୁ ପ୍ରୟାଗରାଜକୁ ଅଣାଯାଇଥିଲା ।
ଏହା ବି ପଢନ୍ତୁ-Umesh Pal kidnapping case: ଆଜି ଆସିବ ରାୟ, ଜାଣନ୍ତୁ ପୁରା ଘଟଣା
ଆଜି ଅତିକ, ଅଶ୍ରଫ ଓ ଫରହାନକୁ କଡା ସୁରକ୍ଷାର ସହିତ ଜେଲରୁ ଅଲଗା ପ୍ରିଜନ ଭ୍ୟାନରେ ନିଆଯାଇ କୋର୍ଟରେ ହାଜର କରାଯାଇଥିଲା । କିଛି ଆଇନଜୀବୀ ଉମେଶ ପାଲ ହତ୍ୟା ଘଟଣାକୁ ନେଇ ଜୋତା ମାଳ ସହିତ କୋର୍ଟ ପରିସରରେ ପହଞ୍ଚିଥିଲେ । ତେବେ ସ୍ଥିତିକୁ ସମ୍ଭାଳିବା ଲାଗି ପୂର୍ବରୁ ପୋଲିସ, ପିଏସି ଓ ଆରପିଏଫ ଯବାନାମାନେ ଉପସ୍ଥିତ ରହିଥିଲେ । ଆଇନଜୀବୀମାନେ ଅତିକକୁ ଜୋତାମାଳ ପିନ୍ଧାଇବା ଲାଗି ଉଦ୍ୟମ କରୁଥିବା ବେଳେ ସେମାନଙ୍କୁ ସୁରକ୍ଷା ବଳ କୋର୍ଟ ଗେଟ ପୂର୍ବରୁ ଅଟକାଇଥିଲା ।
ସୂଚନା ଥାଉ କି ୨୦୦୫ ମସିହା ଜାନୁଆରୀ ୨୫ ତାରିଖରେ ବିଏସ୍ପି ବିଧାୟକ ରାଜୁ ପାଲଙ୍କ ହତ୍ୟା ହୋଇଥିଲା । ଉମେଶ ପାଲ ଏହି ହତ୍ୟାକାଣ୍ଡର ମୁଖ୍ୟ ସାକ୍ଷୀ ରହିଥିଲେ । ଅତିକ କ୍ରମାଗତ ଭାବେ ଉମେଶ ପାଲଙ୍କୁ ଏ ନେଇ ଧମକଚମକ ଦେଉଥିଲା । ମାତ୍ର ଉମେଶ ପାଲ ଭୟଭୀତ ହୋଇନଥିଲେ । ଏହାପରେ ଉମେଶଙ୍କୁ ରାସ୍ତାରୁ ହଟାଇବା ଲାଗି ଷଡ଼ଯନ୍ତ୍ର କରିଥିଲେ ଅତିକ ଗ୍ୟାଙ୍ଗ । ଏହାପରେ ଗତ ୨୦୦୬ ମସିହା ଫେବୃଆରୀ ୨୮ ତାରିଖରେ ଉମେଶ ପାଲଙ୍କୁ ଅପହରଣ କରାଯାଇଥିଲା । କୋର୍ଟରେ ରାଜୁ ପାଲଙ୍କ ମାମଲାରେ ସାକ୍ଷୀ ନ ଦେବାକୁ କୁହାଯାଇଥିଲା । ମାତ୍ର ସେ ନ ମାନିବାରୁ ତାଙ୍କୁ ନିର୍ଯାତନା ଦିଆଯାଇଥିଲା ।
ଅପହରଣ ମାମଲାରେ ୧୧ଜଣ ଅପରାଧୀଙ୍କୁ ଚିହ୍ନଟ କରାଯାଇଥିଲା । କୋର୍ଟରେ ହାଜର ହେବା ଲାଗି ଅତିକ ଅହମ୍ମଦ ଓ ଭାଇ ଅଶ୍ରଫ ନୈନି ସେଣ୍ଟ୍ରାଲ ଜେଲରେ ପହଞ୍ଚିଥିଲେ । ସେପଟେ ଫରହାନ ପୂର୍ବରୁ ଉକ୍ତ ଜେଲ୍ରେ ସଜା କାଟୁଥିଲା । ମାମଲାରେ ଅନ୍ୟ ଅପରାଧୀ ଜାମିନରେ ଥିବା ବେଳେ ଜଣେ ଅପରାଧୀର ପୂର୍ବରୁ ମୃତ୍ୟୁ ଘଟିସାରିଛି । ମଙ୍ଗଳବାର କୋର୍ଟ ରାୟ ଶୁଣାଇବା ସମୟରେ ୩ଜଣଙ୍କୁ ଆଜୀବନ କାରାଦଣ୍ଡାଦେଶ ଶୁଣାଇଥିବା ବେଳେ ଅନ୍ୟମାନଙ୍କୁ ଦୋଷମୁକ୍ତ କରିଛନ୍ତି ।
