ମୁମ୍ବାଇ: ଦେଶର ପ୍ରମୁଖ ଶିଳ୍ପପତି ତଥା ରିଲାଏନ୍ସ ଇଣ୍ଡଷ୍ଟ୍ରିଜର ଅଧ୍ୟକ୍ଷ ମୁକେଶ ଅମ୍ବାନୀଙ୍କ ସାନ ପୁଅ ଅନନ୍ତ ଅମ୍ବାନୀ ଓ ରାଧିକା ମର୍ଚାଣ୍ଟଙ୍କ ନିର୍ବନ୍ଧ ଶେଷ ହୋଇଛି । ଗତକାଲି(ଗୁରୁବାର) ମୁମ୍ବାଇ ସ୍ଥିତ ଆଣ୍ଟିଲିଆ ବାସଭବନରେ ଦୁଇ ପରିବାରର ଉପସ୍ଥିତିରେ ପାରମ୍ପରିକ ରୀତିନୀତିରେ ଉଭୟଙ୍କ ନିର୍ବନ୍ଧ ହୋଇଛି । ଗୁଜୁରାଟୀ ହିନ୍ଦୁ ପରିବାରର ପରମ୍ପରା ଅନୁସାରେ ଏଥିରେ ଗୋଲ ଧନ ଓ ଚୁନରୀ ବିଧି ପାଳନ ହୋଇଥିଲା । ଏହାସହିତ ଅନନ୍ତ ଓ ରାଧିକା ପରସ୍ପରକୁ ମୁଦି ପିନ୍ଧାଇଥିଲେ । ଏହି ସମୟରେ ଦୁଇ ପରିବାର ମଧ୍ୟରେ ଉପହାର ଓ ମିଠା ଦିଆନିଆ ହୋଇଥିଲା ।
ରାଧିକା ମର୍ଚାଣ୍ଟ ହେଉଛନ୍ତି ଜଣାଶୁଣା ଶିଳ୍ପପତି ବିରେନ ମର୍ଚାଣ୍ଟଙ୍କ ଝିଅ । ୨୦୧୯ରେ ମର୍ଚାଣ୍ଟ ଓ ଅମ୍ବାନୀ ପରିବାର ଦୁହିଁଙ୍କ ବିବାହ ସମ୍ପର୍କରେ ଘୋଷଣା କରିଥିଲେ । ନିର୍ବନ୍ଧ ସମାରୋହରେ ରାଧିକା ଏକ ସୁନେଲୀ ରଙ୍ଗର ଲେହେଙ୍ଗା ସାଙ୍ଗକୁ ଆକର୍ଷଣୀୟ ଅଳଙ୍କାର ପିନ୍ଧିଥିଲେ । ଅନନ୍ତ ଏକ ରୟାଲ ବ୍ଲୁ ରଙ୍ଗର ପୋଷାକରେ ନଜର ଆସିଥିଲେ । ନିର୍ବନ୍ଧ ସମୟରେ ଶାଶୁ ନୀତା ଅମ୍ବାନୀ ନୃତ୍ୟ ପରିବେଷଣ କରିଥିଲେ ।
ଅନନ୍ତ ଓ ରାଧିକା ପରସ୍ପରକୁ ଦୀର୍ଘ ବର୍ଷ ହେଲା ଜାଣିଥିଲେ । ଗତ ଡିସେମ୍ବର ୨୯ ତାରିଖରେ ରାଜସ୍ଥାନର ନାଥବାଦା ସ୍ଥିତ ଶ୍ରୀନାଥଜୀ ମନ୍ଦିରରେ ଉଭୟଙ୍କ ନିର୍ବନ୍ଧ ହୋଇଥିଲା । ହେଲେ ଗୁରୁବାର ପରିବାର ବର୍ଗ ଓ କିଛି ଘନିଷ୍ଠ ବନ୍ଧୁଙ୍କ ଉପସ୍ଥିତିରେ ଔପଚାରିକ ଭାବେ ନିର୍ବନ୍ଧ ଉତ୍ସବ ସମ୍ପନ୍ନ ହୋଇଛି । ଏହି ଉତ୍ସବରେ ବଲିଉଡ ସୁପରଷ୍ଟାର ଶାହାରୁଖ ଖାନ ନିଜ ପତ୍ନୀ ଗୌରୀ ଖାନ, ପୁଅ ଆର୍ଯ୍ୟନଙ୍କ ସହ ସାମିଲ ହୋଇଥିବା ଦେଖିବାକୁ ମିଳିଛି । ଏହି ସମୟରେ ଶାହାରୁଖ ଏକ ବ୍ଲାକ କୁର୍ତ୍ତାରେ ନଜର ଆସିଥିଲେ ।
ଏହାମଧ୍ୟ ପଢନ୍ତୁ: Rakhi Sawant Arrested: ମହଙ୍ଗା ପଡିଲା ଫଟୋ ଭାଇରାଲ, ବନ୍ଧା ହେଲେ ରାକ୍ଷୀ ସାୱନ୍ତ
ଉଲ୍ଲେଖଯୋଗ୍ୟ, ଅନନ୍ତ ଅମ୍ବାନୀ ମୁକେଶ ଅମ୍ବାନୀଙ୍କ ସାନ ପୁଅ । ସେ ଆମେରିକାର ବ୍ରାଉନ ୟୁନିଭିରସିଟିରୁ ସ୍ନାତକ ଶିକ୍ଷା ଶେଷ କରିଛନ୍ତି । ଏବେ ସେ ରିଲାଏନ୍ସ ଇଣ୍ଡଷ୍ଟ୍ରୀଜର ଜିଓ ପ୍ଲାଟଫର୍ମ ବୋର୍ଡ ସଦସ୍ୟ ଓ ରିଲାଏନ୍ସ ରିଟେଲ ଭେନଚର ସଦସ୍ୟ ଭଳି ବିଭିନ୍ନ ଦାୟିତ୍ବ ସମ୍ଭାଳୁଛନ୍ତି । ଶୈଲା ଓ ବିରେନ ମର୍ଚାଣ୍ଟଙ୍କ ଝିଅ ରାଧିକା ମର୍ଚାଣ୍ଟ ନ୍ୟୁୟର୍କ ୟୁନିଭରସିଟିରେ ସ୍ନାତକ କରିଛନ୍ତି ଏବଂ ସେ ଏନକୋର ହେଲଥକେୟାର ବୋର୍ଡରେ ଡାଇରେକ୍ଟର ଭାବେ କାର୍ଯ୍ୟ କରୁଛନ୍ତି ।
