ଇଟାନଗର: ରାହୁଲ ଗାନ୍ଧୀଙ୍କୁ ଟାର୍ଗେଟ କଲେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ । କହିଲେ "ଇଟାଲି ଚଷମା କାଢ଼ିଲେ ରାହୁଲ 8 ବର୍ଷର ବିକାଶ ଦେଖିପାରିବେ" । ଗତକାଲି (ରବିବାର) ଅରୁଣାଚଳ ପ୍ରଦେଶ ଗସ୍ତରେ ଏକ ସମାରୋହକୁ ସମ୍ବୋଧିତ କଲାବେଳେ ରାହୁଲଙ୍କୁ କଟାକ୍ଷ କରି ଏପରି କହିଛନ୍ତି ଅମିତ ଶାହ ।
ଅମିତ କହିଛନ୍ତି, "କେତେକ କଂଗ୍ରେସ ବନ୍ଧୁମାନେ ପଚାରିଛନ୍ତି, ଗତ 8 ବର୍ଷ ଭିତରେ ମୋଦି ସରକାର କଣ କରିଛନ୍ତି ? କିନ୍ତୁ ଅରୁଣାଚଳର ନାଗରିକମାନେ କୁହନ୍ତୁ, ଯିଏ ଆଖି ବନ୍ଦ କରି ଚେଇଁଥାଏ ସେ କିଭଳି ବିକାଶ ଦେଖିପାରିବ । କଂଗ୍ରେସର କିଛି ଲୋକ ଆଖି ବନ୍ଦ କରି ବିକାଶ ଦେଖିବାକୁ ଚେଷ୍ଟା କରୁଛନ୍ତି ।" ଅମିତ ଶାହ ପୁଣି ରାହୁଲ ଗାନ୍ଧୀଙ୍କୁ ଆକ୍ଷେପ କରି କହିଛନ୍ତି "ରାହୁଲ ବାବା, ଦେଶର ବିକାଶ ଦେଖାଯାଉନଥିବାର କାରଣ ହେଉଛି ଇଟାଲିର ଚଷମା । ନିଜ ଆଖି ଖୋଲ ଏବଂ ଭାରତୀୟ ଚଷମା ପିନ୍ଧ । ଏହାପରେ ଗତ 8 ବର୍ଷର ବିକାଶ ଦେଖିବାକୁ ସମର୍ଥ ହେବେ ।" ଦେଶରେ ପର୍ଯ୍ୟଟନ ଓ ଆଇନ ଶୃଙ୍ଖଳା ମଜବୁତ ହୋଇଥିବା ସେ କହିଛନ୍ତି । ଗତ 50 ବର୍ଷ ମଧ୍ୟରେ ଅରୁଣାଚଳ ପ୍ରଦେଶରେ ଯାହା ହୋଇପାରିନାହିଁ ତାହା ମୋଦି ଓ ପ୍ରେମ ଖାଣ୍ଡୁ କରିଦେଖାଇବେ ବୋଲି ଅମିତ ଶାହ କହିଛନ୍ତି ।
