ଶ୍ରୀନଗର: କୋଭିଡ ସଂକ୍ରମଣ କାରଣରୁ ଗତ ଦୁଇ ବର୍ଷ ଧରି ବନ୍ଦ ରହିଥିବା ପ୍ରସିଦ୍ଧ ଅମରନାଥ ଯାତ୍ରା ଚଳିତ ବର୍ଷ ଆୟୋଜିତ ହେବାକୁ ଯାଉଛି । ଜୁନ ୩୦ ତାରିଖରୁ ଏହି ପ୍ରସିଦ୍ଧ ଯାତ୍ରା ଆରମ୍ଭ ହେବା ନେଇ ସୂଚନା ମିଳିଛି । ରାଜଭବନ ପକ୍ଷରୁ ମିଳିଥିବା ସଦ୍ୟତମ ସୂଚନା ଅନୁସାରେ, ଚଳିତ ବର୍ଷ ଏହି ଯାତ୍ରା ୪୩ ଦିନ ଯାଏଁ ଜାରି ରହିବ । ପ୍ରଚଳିତ ପ୍ରଥା ଅନୁସାରେ ଏହି ଯାତ୍ରା ରାକ୍ଷୀ ପୂର୍ଣ୍ଣିମାରେ ଶେଷ ହେବାର ପରମ୍ପରା ରହିଛି ।
ରାଜଭବନର ଜଣେ ବରିଷ୍ଠ ଅଧିକାରୀଙ୍କ ପକ୍ଷରୁ ମିଳିଥିବା ସୂଚନା ଅନୁସାରେ, ଚଳିତ ବର୍ଷର ଯାତ୍ରା ସମ୍ପୂର୍ଣ୍ଣ କୋଭିଡ ପ୍ରୋଟୋକଲ ଅନୁପାଳନ କରାଯାଇ ଅନୁଷ୍ଠିତ ହେବ । ଯାତ୍ରାକୁ ଶୃଙ୍ଖଳିତ ତଥା ବ୍ୟବସ୍ଥିତ ଭାବେ ଶେଷ କରିବା ପାଇଁ ସମସ୍ତ ପ୍ରକାର ଆବଶ୍ୟକୀୟ ପଦକ୍ଷେପ ମଧ୍ୟ ଗ୍ରହଣ କରାଯିବ । ତେବେ ଏହି ପ୍ରସିଦ୍ଧ ଯାତ୍ରାରେ ଦେଶବ୍ୟାପୀ ଶ୍ରଦ୍ଧାଳୁ ଅଂଶଗ୍ରହଣ କରୁଥିବା ବେଳେ କୋଭିଡ ସଂକ୍ରମଣ ପାଇଁ ବର୍ଷ ୨୦୨୦ ଓ ୨୧ ରେ ଏହାକୁ ସ୍ଥଗିତ ରଖାଯାଇଥିଲା । ଚଳିତ ଥର ଯାତ୍ରା ହେବା ନେଇ ସୂଚନା ମିଳିବା ପରେ ଗତ ଦୁଇବର୍ଷ ଧରି ଯାତ୍ରାରୁ ବାଦ ପଡିଥିବା ଶ୍ରଦ୍ଧାଳୁ ଖୁସି ପ୍ରକାଶ କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
