ନୂଆଦିଲ୍ଲୀ: ୟେମାନରେ ହାଉଥି ବିଦ୍ରୋହୀଙ୍କ କବଳରୁ ମୁକ୍ତ ହେଲେ ପଣବନ୍ଦୀ ଥିବା 7 ଭାରତୀୟ ନାଗରିକ । ଗତ ଜାନୁଆରୀରେ ସଂଯୁକ୍ତ ଆରବ ଏମିରେଟ (UAE) ର ଏକ ପଣ୍ୟବାହୀ ଜାହାଜକୁ ୟେମାନ ଉପକୂଳରୁ ଅପହରଣ କରିନେଇଥିଲେ ହାଉଥି ବିଦ୍ରୋହୀ । ଏହି ଜାହାଜରେ 7ଜଣ ଭାରତୀୟ ନାବିକ ରହିଥିଲେ ।
7 ପଣବନ୍ଦୀ ଭାରତୀୟ ନାଗରିକଙ୍କ ମଧ୍ୟରେ 3 ଜଣ କେରଳରୁ ଥିଲେ । ତେବେ ପ୍ରାୟ ଦୀର୍ଘ 3 ମାସ ପରେ ରବିବାର ସମସ୍ତ ଭାରତୀୟଙ୍କୁ ସୁରକ୍ଷିତ ମୁକ୍ତ କରାଯାଇଥିବା ସୂଚନା ମିଳିଛି । ସେତେବେଳେ UAEର ଏହି ଜାହାଜରେ ଯୁଦ୍ଧାସ୍ତ୍ର ପରିବହନ କରାଯାଉଥିବା ଓ ଜାହାଜଟି ୟେମେନ ଜଳସୀମାରେ ଅନୁପ୍ରବେଶ କରିଥିବା ଅଭିଯୋଗରେ ଅପହରଣ କରି ନେଇଥିଲେ ହାଉଥି ବିଦ୍ରୋହୀ ଗୋଷ୍ଠୀ । ପରେ ଘଟଣା ସମ୍ପର୍କରେ ସୂଚନା ମିଳିବା ପରେ ଭାରତ ସରକାର ମଧ୍ୟ ସେମାନଙ୍କ ମୁକ୍ତି ପାଇଁ ପ୍ରକ୍ରିୟା ଆରମ୍ଭ କରିଥିଲେ । ତେବେ ରବିବାର ସମସ୍ତଙ୍କୁ ସୁରକ୍ଷିତ ମୁକ୍ତ କରିଛନ୍ତି ବିଦ୍ରୋହୀ ।
ବ୍ୟୁରୋ ରିପୋର୍ଟ, ଇଟିଭି ଭାରତ
