ନୂଆଦିଲ୍ଲୀ: ରାଜ୍ୟସଭାକୁ ନିର୍ଦ୍ବନ୍ଦ୍ବରେ ନିର୍ବାଚିତ ହୋଇଛନ୍ତି କେନ୍ଦ୍ରମନ୍ତ୍ରୀ ସର୍ବାନନ୍ଦ ସୋନୱାଲ, କେନ୍ଦ୍ରମନ୍ତ୍ରୀ ଏଲ ମରୁଗନ ଓ ତୃଣମୂଳ କଂଗ୍ରେସର ସୁସ୍ମିତା ଦେବ । ଆସାମରୁ ରାଜ୍ୟସଭା ପାଇଁ ନିର୍ଦ୍ବନ୍ଦରେ ନିର୍ବାଚତ ହୋଇଛନ୍ତି ପୂର୍ବତନ ମୁଖ୍ୟମନ୍ତ୍ରୀ ସର୍ବାନନ୍ଦ ସୋନୱାଲ । ଆସାମର ରାଜ୍ୟସଭା ଆସନ ପାଇଁ ଏକ ମାତ୍ର ପ୍ରାର୍ଥୀ ଥିଲେ ସର୍ବାନନ୍ଦ ।
ଏଲ ମୁରୁଗନଙ୍କୁ ମଧ୍ୟପ୍ରଦେଶରୁ ରାଜ୍ୟସଭା ପାଇଁ ନିର୍ଦ୍ବନ୍ଦ୍ବରେ ଚୟନ କରାଯାଇଛି । ସେହିପରି ଗତ ମାସ କଂଗ୍ରେସ ଛାଡି ତୃଣମୂଳ କଂଗ୍ରେସର ହାତ ଧରିଥିବା ସୁସ୍ମିତା ଦେବ ମଧ୍ୟ ପଶ୍ଚିମବଙ୍ଗରୁ ବିଧାନସଭାକୁ ହୋଇଛନ୍ତି ନିର୍ବାଚିତ । ସେପଟେ ପୁଡୁଚେରୀରୁ ପ୍ରଥମ ଥର ରାଜ୍ୟସଭା ସଦସ୍ୟ ପାଇଛି ବିଜେପି । ସେଲଭାଗଣପତି ରାଜ୍ୟସଭାକୁ ନିର୍ବାଚିତ ହୋଇଛନ୍ତି ।
ଆସାମର ପୂର୍ବତନ ମୁଖ୍ୟମନ୍ତ୍ରୀ ସର୍ବାନନ୍ଦ ସୋନୋୱାଲ ଯେଉଁ ଆସନ ପାଇଁ ନାମାଙ୍କନପତ୍ର ଦାଖଲ କରିଥିଲେ, ଆସାମ ବିଧାନସଭା ବାଚସ୍ପତି ବିଶ୍ବଜିତ ଡେମରି ରାଜ୍ୟସଭାରୁ ଇସ୍ତଫା ଦେବା ପରେ ତାହା ଖାଲି ପଡ଼ିଥିଲା । ବିଧାନସଭା ନିର୍ବାଚନରେ ନିର୍ବାଚିତ ହେବା ପରେ ଡେମରି ରାଜ୍ୟସଭାରୁ ଇସ୍ତଫା ଦେଇଥିଲେ ।
ମଧ୍ୟପ୍ରଦେଶର ରାଜ୍ୟସଭା ଆସନ ଚଳିତ ବର୍ଷ ଜୁଲାଇରେ ଥାୱରଚନ୍ଦ ଗେହଲୋଟଙ୍କ ଇସ୍ତଫା କାରଣରୁ ଖାଲି ପଡିଥିଲା। ଗେହଲଟଙ୍କୁ ଜୁଲାଇରେ କର୍ଣ୍ଣାଟକର ରାଜ୍ୟପାଳ କରାଯାଇଥିଲା, ଯେଉଁଥିପାଇଁ ସେ କେନ୍ଦ୍ର ମନ୍ତ୍ରୀ ପଦରୁ ମଧ୍ୟ ଇସ୍ତଫା ଦେଇଥିଲେ । ମୁରୁଗନ ତାମିଲନାଡୁରୁ ଆସିଛନ୍ତି ଏବଂ ନିକଟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାଙ୍କ କ୍ୟାବିନେଟରେ ସାମିଲ ହୋଇଥିଲେ ।
ସେପଟେ କଂଗ୍ରେସ ଛାଡି ଟିଏମସିରେ ସାମିଲ ହୋଇଥିବା ସୁସ୍ମିତା ଦେବଙ୍କୁ ଦଳ ରାଜ୍ୟସଭା ପ୍ରାର୍ଥୀ କରିଥିଲା । ପଶ୍ଚିମ ମେଦିନୀପୁରର ସବାଙ୍ଗରୁ ବିଧାନସଭା ନିର୍ବାଚନରେ ବିଜୟ ହାସଲ ପରେ ଟିଏମସିର ମାନସ ଭୁୟାଁ ରାଜ୍ୟସଭା ସଦସ୍ୟତା ପଦରୁ ଇସ୍ତଫା ଦେଇଥିଲେ । ଏହି କାରଣରୁ ପଶ୍ଚିମବଙ୍ଗ ଆସନରେ ଉପନିର୍ବାଚନ କରାଇବାକୁ ପଡିଥିଲା ।
