ଜୟପୁର: ମହାବିଦ୍ୟାଳୟକୁ ଟିସି ପାଇଁ ଆସିଥିବା ଛାତ୍ରୀଙ୍କୁ ବନ୍ଧୁକ ଦେଖାଇଲେ ଶିକ୍ଷକ । ରାଜସ୍ଥାନ ପାଲି ଜିଲ୍ଲା ସ୍ଥିତ ବିଶ୍ବ ବିଖ୍ୟାତ ଜାଡନ ଆଶ୍ରମର ସ୍ବାମୀ ପରମାନନ୍ଦ ମହାବିଦ୍ୟାଳୟରେ ଏହି ଘଟଣା ପ୍ରକାଶ ପାଇଛି । ଏଠାରେ କାର୍ଯ୍ୟରତ ଶିକ୍ଷକ ଜଣେ ଛାତ୍ରଙ୍କୁ ଦେଶୀ ବନ୍ଧୁକ ଦେଖାଇ ଭୟଭୀତ କରିଛନ୍ତି । ଶୁକ୍ରବାର ରାତିରେ ଦୁହିଁଙ୍କ ମଧ୍ୟରେ ବଚସା ପରେ ଏଭଳି ପରିସ୍ଥିତି ସୃଷ୍ଟି ହୋଇଥିବା ସୂଚନା ମିଳିଛି । ପୋଲିସ ସମ୍ପୃକ୍ତ ଗୁରୁକୁଳ ଶିକ୍ଷକଙ୍କୁ ଗିରଫ କରିବା ସହ ତାଙ୍କ ନିକଟରୁ ବନ୍ଧୁକ ଓ ଦୁଇଟି ଜୀବନ୍ତ ଗୁଳି ଜବତ କରିଛି ।
ସୂଚନାଯୋଗ୍ୟ, ଛାତ୍ର ଜଣକ ମହାବିଦ୍ୟାଳୟରେ ବିଏ ଡିଗ୍ରୀ ପୁରା କରିବା ପରେ ଟିସି ନେବାକୁ ଆସିଥିଲେ । ଏତିକି ବେଳେ କୌଣସି କାରଣକୁ ନେଇ ଶିକ୍ଷକ ହୀରା ପ୍ରକାଶଙ୍କ ସହ ତାଙ୍କର କଥା ବଚସା ହୋଇଥିଲା । ଏହାପରେ ଶିକ୍ଷକ ଯୁବକଙ୍କୁ ସେଠାରୁ ବାହାର କରିଦେଇଥିଲେ । ଏଥିରେ ରାଗିଯାଇ ଛାତ୍ର ଜଣକ ପରଦିନ ନିଜର କିଛି ସାଙ୍ଗକୁ ଧରି ଆଶ୍ରମ ପହଞ୍ଚିଥିଲେ ଏବଂ ଗଣ୍ଡଗୋଳ କରିବା ଆରମ୍ଭ କରିଥିଲେ । ବିବାଦ ଏତେ ଉଗ୍ର ରୂପ ନେଇଥିଲା ଯେ ଶିକ୍ଷକ ହୀରା ପ୍ରକାଶ ଦେଶୀ ବନ୍ଧୁକ ବାହାର କରି ଛାତ୍ରଙ୍କୁ ଭୟଭୀତ କରିଥିଲେ । ଏନେଇ ଖବର ପାଇବା ପରେ ପୋଲିସ ଘଟଣାସ୍ଥଳରେ ପହଞ୍ଚି ଶିକ୍ଷକ ଏବଂ ପାଟିତୁଣ୍ଡ କରୁଥିବା କିଛି ଛାତ୍ରଙ୍କୁ ଗିରଫ କରିଥିଲା ।
