ଚଣ୍ଡିଗଡ଼: ପ୍ରେମ ବିବାହକୁ ନେଇ ହରିୟାଣାରେ ଚାଞ୍ଚଲ୍ୟ । ଏହି ବିବାହ ହୋଇଛି ୬୭ ବର୍ଷର ଓ ୧୯ ବର୍ଷ ଯୁବତୀଙ୍କ ମଧ୍ୟରେ । ଯାହାକୁ ବିରୋଧ କରିଛନ୍ତି ବିବିପୁର ଗ୍ରାମବାସୀ । ଏହି ମୁସଲିମ ଯୁବତୀ ଜଣକ ପୂର୍ବରୁ ବାହା ହୋଇଥିଲେ ମଧ୍ୟ ଆଉ ଥରେ ବିବାହ କରିଛନ୍ତି ବୋଲି ଜଣାପଡିଛି ।
ଯୁବତୀ ଜଣକ ବୃଦ୍ଧଙ୍କୁ ବିବାହ କରି ଇସଲାମ ଧର୍ମକୁ ବଦନାମ କରିଛନ୍ତି ବୋଲି କହିଛନ୍ତି ଗ୍ରାମବାସୀ । ଉଭୟ ବିବାହ କରିଥିଲେ ମଧ୍ୟ ପୁଣି ବିବାହ ବନ୍ଧନରେ ବାନ୍ଧି ହୋଇଛନ୍ତି । ଉଭୟ କୋର୍ଟରେ ବିବାହ କରିଥିବା ଜଣାପଡିଛି । ତେବେ ଏହା ଏକ ଲଜ୍ଜାଜନକ କାଣ୍ଡ । ଯୁବତୀଙ୍କୁ ଏପରି କରିବାକୁ ବାଧ୍ୟ କରାଯାଇଥିବା ମଧ୍ୟ ଗ୍ରାମବାସୀ କହିଛନ୍ତି । ଘଟଣାରେ ଗ୍ରାମବାସୀମାନେ ସ୍ଥାନୀୟ ପ୍ରଶାସନର ସାହାଯ୍ୟ ମଧ୍ୟ ଲୋଡିଛନ୍ତି । ଏଭଳି ଅଭିଯୋଗ ପରେ ସ୍ଥାନୀୟ ପ୍ରଶାସନ ଘଟଣାର ଯାଞ୍ଚ କରୁଛି ।
ଏହି ବୃଦ୍ଧ ଜଣକ ପଲବଲ ଜିଲ୍ଲା ହୁଞ୍ଚପୁରୀ ଅଞ୍ଚଳବାସୀ । ତେବେ ସେ ତାବିଜ ବ୍ୟବସାୟ କରୁଥିଲେ । ସେ ଜଣେ ତାନ୍ତ୍ରିକ ବୋଲି ମଧ୍ୟ ଗ୍ରାମବାସୀ କହିଛନ୍ତି । ଯୁବତୀଙ୍କ ମାଆ ବହୁ ସମୟଠାରୁ ତାଙ୍କ ନିକଟରୁ ତାବିଜ ତିଆରି କରନ୍ତି । ବୃଦ୍ଧ ଜଣକ ଯୁବତୀ ଓ ତାଙ୍କ ମାଆଙ୍କ ଉପରେ କୌଣସି କାରଣରୁ ଚାପ ପକାଇ ବିବାହ କରିଥିବା ଗ୍ରାମବାସୀ ଅଭିଯୋଗ କରିଛନ୍ତି ।
ଏହି ଘଟଣାରେ ସାମାଜିକ ବୁଦ୍ଧିଜୀବୀ ଓ ରାଜନେତାମାନେ ମିଶି ଏକ ମହାପଞ୍ଚାୟତର ଆୟୋଜନ କରିବେ । ସେଠାରେ ଘଟଣା ସମ୍ପର୍କରେ ଆଲୋଚନା କରାଯିବ । ଏହି ଅଞ୍ଚଳରେ ୩୬ ପ୍ରକାର ଜାତିର ଲୋକ ରହୁଥିଲେ ମଧ୍ୟ ପୂର୍ବରୁ ଏଭଳି ଘଟଣା ଘଟିନାହିଁ ବୋଲି ଗ୍ରାମବାସୀ କହିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
