ପାଟନା: କୁହାଯାଏ ଶିକ୍ଷା ପାଇଁ ଆଗ୍ରହ ଥିଲେ ବାଧକ ହୋଇପାରେନି କୌଣସି ବୟସ ସୀମା । ପାଟନାର ଆଶା କୁମାରୀ ଏହି ଉକ୍ତିକୁ ବାସ୍ତବରେ ପ୍ରମାଣିତ କରି ଦେଖାଇଛନ୍ତି । ୫୮ ବର୍ଷୀୟା ଆଶା ପାଟନାର ଇନ୍ଦିରା ଗାନ୍ଧୀ ଜାତୀୟ ମୁକ୍ତ ବିଶ୍ବବିଦ୍ୟାଳୟରୁ (IGNOU) ରାଜନୀତି ବିଜ୍ଞାନରେ ସ୍ନାତ୍ତକୋତର (ମାଷ୍ଟର ଡିଗ୍ରୀ) ହାସଲ କରିଛନ୍ତି ।
ଆଜି IGNOUର ୩୫ତମ ସମାବର୍ତ୍ତନ ଉତ୍ସବରେ ପ୍ରମାଣପତ୍ର ଗ୍ରହଣ କରିବା ଅବସରରେ ଆଶା କୁମାରୀ କହିଛନ୍ତି, ଯେ ଶିକ୍ଷା ହେଉଛି ଏକମାତ୍ର ମାଧ୍ୟମ ଯାହା ପ୍ରତ୍ୟେକ ଶ୍ରେଣୀ ମଧ୍ୟରେ ଥିବା ପାର୍ଥକ୍ୟକୁ ଦୂର କରେ । ସମାଜରେ ଅସମାନତାକୁ ଦୂର କରେ, ତେଣୁ ଶିକ୍ଷା ଠାରୁ ବଡ଼ କିଛି ନାହିଁ ।
ମଙ୍ଗଳବାର ରାଜଧାନୀ ପାଟଣାର ବିଦ୍ୟାପତି ଭବନରେ IGNOU ପାଟଣାର ଆଞ୍ଚଳିକ କାର୍ଯ୍ୟାଳୟ ଦ୍ବାରା ୩୫ତମ ସାମାବର୍ତ୍ତନ ଉତ୍ସବ ଆୟୋଜିତ ହୋଇଥିଲା । ଏହି କାର୍ଯ୍ୟକ୍ରମରେ ଆଶା କୁମାରୀ ଆକର୍ଷଣର କେନ୍ଦ୍ର ପାଲଟିଥିଲେ । ଯେତେବେଳେ ଆଶା କୁମାରୀ ମଞ୍ଚକୁ ଆସି ପ୍ରମାଣପତ୍ର ଗ୍ରହଣ କରିଥିଲେ, ସେତେବେଳେ ସମଗ୍ର ଅଡିଟୋରିୟମ କରତାଳିରେ କମ୍ପି ଉଠିଥିଲେ ।
ଏଠାରେ ଆଉ ଏକ ରୋଚକ କଥା ହେଉଛି, ଏହା ହେଉଛି ଆଶାଙ୍କର ଦ୍ବିତୀୟ ମାଷ୍ଟର ଡିଗ୍ରୀ । କିଛି ବର୍ଷ ପୂର୍ବେ ସେ ଦୂର ନିରନ୍ତର ଶିକ୍ଷା ମାଧ୍ୟମରେ IGNOU ରୁ ଇତିହାସରେ ମଧ୍ୟ ମାଷ୍ଟର ଡିଗ୍ରୀ ହାସଲ କରିଥିଲେ ଏବଂ ବର୍ତ୍ତମାନ ରାଜନୀତି ବିଜ୍ଞାନରେ ମାଷ୍ଟର ଡିଗ୍ରୀ ହାସଲ କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
