ନୂଆଦିଲ୍ଲୀ: ବିଷ ପିଇ ଆତ୍ମହତ୍ୟା କଲେ ଆନ୍ଦୋଳନରତ ଚାଷୀ । ଏଭଳି ଘଟଣା ଦେଖିବାକୁ ମିଳିଛି ସିଙ୍ଘୁ ବର୍ଡରରେ । ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ଘଟଣାସ୍ଥଳରୁ ଏକ ସୁଇସାଇଡାଲ ନୋଟ ଜବତ କରାଯାଇଛି । ମୃତ ଚାଷୀ ଜଣକ ପାଲା ରାମ ବୋଲି ସୂଚନା ମିଳିଛି ।
ସୂଚନା ଅନୁସାରେ, ହରିୟାଣାର ଜିନ୍ଦା ଜିଲ୍ଲାର ଖଟ୍ଟର ଟୋଲ ପ୍ଲାଜାରେ 500ରୁ 700 କୃଷକ ନୂତନ କୃଷି ଆଇନ ବିରୋଧରେ ଆନ୍ଦୋଳନ କରିଆସୁଛନ୍ତି । ହେଲେ ମଙ୍ଗଳବାର ଚାଷୀ ପାଲା ଶୋଇବା ପାଇଁ ରାତିରେ ଏକ ତମ୍ବୁ ଭିତରକୁ ଯାଇଥିଲେ । ସେଠାରେ ସେ ବିଷ ପିଇ ଥିବା କହିଛନ୍ତି ଆନ୍ଦୋଳନକାରୀ । ପାଲା ରାମ ଧାରଣାସ୍ଥଳରେ ଆନ୍ଦୋଳନରତ ଚାଷୀଙ୍କୁ ଖାଦ୍ୟ ଓ ଚା ଯୋଗାଉଥିଲେ। ଗତ କିଛି ମାସ ଧରି ଆନ୍ଦୋଳନରେ ସାମିଲ ହୋଇ ବିକ୍ଷୋଭ ପ୍ରଦର୍ଶନ କରୁଥିଲେ। କୃଷକଙ୍କ ଦାବି ପୂରଣ ହୋଇ ନ ଥିବାରୁ ସେ ଗତ କିଛି ଦିନ ହେବ ନିରାଶ ହୋଇଥିଲେ । ଆନ୍ଦୋଳନ ସମୟରେ ଚାଷୀ ଆତ୍ମହତ୍ୟା କରିବାର କିଛି ମାମଲା ରୁଜୁ ହୋଇଛି । ଗତ ଡିସେମ୍ବରରେ ଜଣେ ଶିଖ୍ ପ୍ରଚାରକ ମଧ୍ୟ ସିଙ୍ଘୁ ବର୍ଡରରେ ଆତ୍ମହତ୍ୟା କରିଥିଲେ ।
