ନୂଆଦିଲ୍ଲୀ: କୋରୋନା କାୟାରେ କବଳିତ ସାରା ଦେଶ । ଦୈନିକ ସଂକ୍ରମଣ ହେଉଛନ୍ତି ଲକ୍ଷାଧିକ ଲୋକ । କ୍ଷିପ୍ର ଗତିରେ ମାଡି ଚାଲିଛି କୋରୋନା ମହାମାରୀର ଦ୍ବିତୀୟ ଲହର । ସାରା ଦେଶରେ ମହାମାରୀକୁ ନେଇ ହାହା କାର । ଏହାରି ମଧ୍ୟରେ ଗତ 24 ଘଣ୍ଟାରେ ଦେଶରେ ନୂଆ 3 ଲକ୍ଷ 52 ହଜାର 991 କୋରୋନା ଆକ୍ରାନ୍ତ ଚିହ୍ନଟ ହୋଇଥିବା ବେଳେ ମୋଟ ଆକ୍ରାନ୍ତଙ୍କ ସଂଖ୍ୟା 1 କୋଟି 73 ଲକ୍ଷ 13 ହଜାର 163ରେ ପହଞ୍ଚିଛି ।
ସେହିପରି ଦେଶରେ ଗୋଟିଏ ଦିନରେ ସର୍ବାଧିକ 2812 ଜଣଙ୍କ ମୃତ୍ୟୁ ହୋଇଥିବା ବେଳେ ମୋଟ ମୃତ୍ୟୁ ସଂଖ୍ୟା 1 ଲକ୍ଷ 95 ହଜାର 123ରେ ପହଞ୍ଚିଛି । ଏପଟେ ଗୋଟିଏ ଦିନରେ 2 ଲକ୍ଷ 19 ହଜାର 272 ଜଣ ସୁସ୍ଥ ହୋଇ ଘରକୁ ଫେରିଥିବା ବେଳେ ମୋଟ ସୁସ୍ଥଙ୍କ ସଂଖ୍ୟା 1 କୋଟି 43 ଲକ୍ଷ 04 ହଜାର 382ରେ ପହଞ୍ଚିଛି । ତେବେ ଏବେ ମଧ୍ୟ 28 ଲକ୍ଷ 13 ହଜାର 658ଟି ସକ୍ରିୟ ମାମଲା ରହିଛି ।
କୋରୋନା ସଂକ୍ରମଣ ବ୍ୟାପି ଚାଲିଥିବା ବେଳେ କେନ୍ଦ୍ର ସରକାର ଟୀକାକରଣ ପ୍ରକ୍ରିୟାକୁ ମଧ୍ୟ ଜାରି ରଖିଛନ୍ତି । ଗତ ରବିବାର ସୁଦ୍ଧା ଦେଶରେ ମୋଟ 14 କୋଟି 19 ଲକ୍ଷ 11 ହଜାର 223 ଜଣଙ୍କୁ ଟିକା ଦିଆଯାଇଛି । ଟୀକାକରଣ ପରେ ମଧ୍ୟ ସଂକ୍ରମଣ ହେଉଥିବାରୁ ଦେଶବାସୀଙ୍କୁ କୋଭିଡ ନିୟମ ସଠିକ ଭାବେ ପାଳନ କରିବା ପାଇଁ ପ୍ରଧାନମନ୍ତ୍ରୀ ମୋଦି ଅନୁରୋଧ କରିଛନ୍ତି । ସମସ୍ତେ ମାସ୍କ ପିନ୍ଧିବା ସହିତ ସାମାଜିକ ଦୂରତା ବଜାୟ ରଖିବା ଓ ବାରମ୍ବାର ହାତ ସାନିଟାଇଜ କଲେ କୋରୋନା ଭାଇରସଠାରୁ ରକ୍ଷା ମିଳିପାରିବ ।
@ANI
