ଚେନ୍ନାଇ: କାଳ ହେଲା ଅଦନିଆ ବର୍ଷା । ପ୍ରବଳ ବର୍ଷା ଯୋଗୁଁ ଚାଲିଗଲା ୩ ଜୀବନ । ଏଭଳି ଅଭାବନୀୟ ଘଟଣା ଘଟିଛି ତାମିଲନାଡୁ ଚେନ୍ନାଇରେ । ଗତାକଲି ଚେନ୍ନାଇରେ ତୁହାକୁ ତୁହା ବର୍ଷା (Heavy Rainfall In Tamil Nadu)ହୋଇଥିବା ବେଳେ ଏଥିରେ ୩ ଜଣଙ୍କ ମୃତ୍ୟୁ ହୋଇଥିବା ସୂଚନା ଦେଇଛନ୍ତି ରାଜ୍ୟ ରାଜସ୍ବ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ।
ସୂଚନାଅନୁଯାୟୀ ରାଜ୍ୟର ଚେନ୍ନାଇ, କାଞ୍ଚିପୁରାମ, ଥିରୁଭାଲୁର, ଏବଂ ଚେଙ୍ଗାଲେପାଟ୍ଟୁ ରେ ଗତ ୨୪ ଘଣ୍ଟା ମଧ୍ୟରେ 20 ସିଏମରୁ ଅଧିକ ବର୍ଷା ହୋଇଥିବା ରେକର୍ଡ କରାଯାଇଛି । ତେବେ ଆହୁରି ମଧ୍ୟ ବର୍ଷା ହେବା ନେଇ ଏହି ଜିଲ୍ଲାଗୁଡିକୁ ରେର୍ଡ ଆଲର୍ଟ ଜାରି କରାଯାଇଛି । ଫଳରେ ଜିଲ୍ଲାଗୁଡ଼ିକରେ ଥିବା ବିଦ୍ୟାଳୟ, କଲେଜ ଏବଂ ସରକାରୀ କାର୍ଯ୍ୟାଳୟଗୁଡ଼ିକ ଆଜି ବନ୍ଦ ରହିବ ।
ପ୍ରବଳ ବର୍ଷା ଯୋଗୁଁ ଚେନ୍ନାଇରେ ବନ୍ୟା ପରିସ୍ଥିତି ସୃଷ୍ଟି ହୋଇଛି । ଫଳରେ ଟ୍ରାଫିକ ସମସ୍ୟା ଦେଖା ଦେଇଛି । ତେବେ ଆଗାମୀ ତିନି ଦିନ ମଧ୍ୟରେ ଉତ୍ତର ଉପକୂଳ ତାମିଲନାଡୁ ଏବଂ ଦକ୍ଷିଣ ଉପକୂଳ ଆନ୍ଧ୍ରପ୍ରଦେଶର ଆଖପାଖ ଅଞ୍ଚଳରେ ପ୍ରବଳ ବର୍ଷା ଜାରି ରହିବ ବୋଲି ଆଇଏମଡି ସୂଚନା ଦେଇଛି ।
