ଚେନ୍ନାଇ: ତାମିଲନାଡୁରେ ମକର ସଂକ୍ରାନ୍ତିକୁ ପୋଙ୍ଗଲ ପର୍ବ ନାଁରେ ପାଳନ କରାଯାଏ । ଏହି ପର୍ବ ଅବସରରେ ରାଜ୍ୟରେ ଆରମ୍ଭ ହୋଇଯାଇଛି ଜାଲିକାଟୁ ପ୍ରତିଯୋଗିତା । ଏହି ପ୍ରତିଯୋଗିତାରେ ଜଣେ ଯୁବକ ୨୩ଟି ଷଣ୍ଢ ସହ ଲଢେଇ କରି ଏକ କାର ସହ ୭ଲକ୍ଷ ଟଙ୍କା ପୁରସ୍କାର ପାଇଛନ୍ତି । ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନ ଏହି ପୁରସ୍କାର ରାଶି ପ୍ରଦାନ କରିଥିବା ଜଣାପଡ଼ିଛି । ମଦୁରାଇ ଜିଲ୍ଲା ପାଲାମେଦୁଠାରେ ଏହି ପ୍ରତିଯୋଗିତାରେ ଯୁବକ ଜଣକ ବୀରତା ପ୍ରଦର୍ଶନ କରି ଏହି ପୁରସ୍କାର ଜିତିବାରେ ସକ୍ଷମ ହୋଇଛନ୍ତି ।
ସୋମବାର ସକାଳ ପ୍ରାୟ ୮ଟାରେ ଏହି ପର୍ବର ଆୟୋଜନ ହୋଇଥିବା ବେଳେ ମୁଖ୍ୟମନ୍ତ୍ରୀ ଷ୍ଟାଲିନଙ୍କ ସମେତ ମଦୁରାଇ ଜିଲ୍ଲାପାଳ ଅନିସ ଶେଖର, ଚୋରାବନ୍ଥନ ବିଧାୟକ ଭେଙ୍କଟେସନ ଉପସ୍ଥିତ ରହି ସବୁଜ ପତାକା ଦେଖାଇ ପ୍ରତିଯୋଗିତା ଆରମ୍ଭ କରିଥିଲେ । ଚିନ୍ନାପତି ଗ୍ରାମର ତାମିଲାରସନ ଏହି ପ୍ରତିଯୋଗିତାରେ ଅଂଶଗ୍ରହଣ କରିଥିଲେ । ସେ ପ୍ରାୟ ୨୩ଟି ଲଢୁଆ ଷଣ୍ଢ ସହିତ ବୀରତାର ସହ ଲଢେଇ କରିଥିଲେ । ଏହି ପ୍ରତିଯୋଗିତାରେ ସେ ପ୍ରଥମ ହୋଇଥିବା ବେଳେ ତାଙ୍କୁ ଏହି ପୁରସ୍କାର ପ୍ରଦାନ କରାଯାଇଛି । ଦ୍ବିତୀୟରେ ପାଲାମେଦୁ ଅଞ୍ଚଳର ମଣି ରହିଛନ୍ତି । ଯିଏକି ୧୯ଟି ଷଣ୍ଢ ସହ ଲଢେଇ କରି ଏକ ବାଇକ ଜିତିଛନ୍ତି ।
ଏହା ବି ପଢନ୍ତୁ- 10-Seater Motorbike: ସୌରଚାଳିତ ୧୦ସିଟର୍ ବାଇକ, ଥରେ ଚାର୍ଜ ହେଲେ ଗଡିବ 100KM
ଏହି ପ୍ରତିଯୋଗିତାରେ ମନ୍ଦିରରେ ଥିବା କିଛି ଷଣ୍ଢ ମଧ୍ୟ ଅଂଶଗ୍ରହଣ କରିଥାନ୍ତି । ତେବେ ମଦୁରାଇ ଜିଲ୍ଲାର ରଙ୍ଗରାଜପୁରମ କୃପାସ୍ବାମୀ ମନ୍ଦିରର ଷଣ୍ଢ ପ୍ରଥମ ହୋଇଛି । ଏହି ଷଣ୍ଢ ସହ ଲଢେଇ ହୋଇଥିବା ବେଳେ କୌଣସି ଯୁବକଙ୍କ କ୍ଷତି ଘଟିନାହିଁ । ଏହି ଷଣ୍ଢର ମାଲିକ କାର୍ତ୍ତିକେୟନଙ୍କୁ ପୁରସ୍କାର ଭାବେ ଏକ ବାଇକ ପୁରସ୍କାର ରୂପେ ଦିଆଯାଇଛି । ଏହି ପ୍ରତିଯୋଗିତାରେ ମୋଟ ୮୭୭ଟି ଷଣ୍ଢ ଅଂଶଗ୍ରହଣ କରିଥିଲେ । ଏହି ପ୍ରତିଯୋଗିତାରେ ୩୧ ଜଣ ଆହତ ହୋଇଥିବା ବେଳେ ବାଲମେଟ ଅଞ୍ଚଳର ଅରବିନ୍ଦ ରାଜଙ୍କ ମୃତ୍ୟୁ ଘଟିଛି ।
ତାମିଲନାଡୁରେ ଜାଲିକାଟୁ ପ୍ରତିଯୋଗିତା ବେଶ ଲୋକପ୍ରିୟ । ଏଥିରେ ପ୍ରତି ବର୍ଷ ଅନେକ ଆହତ ହେଉଥିବା ସହ ମୃତ୍ୟୁ ଘଟୁଥିଲେ ମଧ୍ୟ ପ୍ରତ୍ୟେକ ବର୍ଷ ଏହି ପ୍ରତିଯୋଗିତା ଅନୁଷ୍ଠିତ ହେଉଛି । ଏନେଇ ଜଣେ ଦର୍ଶକ କହିଛନ୍ତି, "ମୁଁ ଆଜି ସକାଳେ ଏହି ପ୍ରତିଯୋଗିତା ଦେଖିବାକୁ ଆସିଥିଲି । ମୁଁ ବହୁତ ଖୁସି ଅଛି । ଏହି ପାରମ୍ପରିକ ପର୍ବକୁ ମୁଁ ସମ୍ମାନ ଜଣାଉଛି ।"
