ନିର୍ବାଚନ ଡ୍ୟୁଟିରେ ଥିବା ବେଳେ ଚାଲିଗଲା ବିଏଲ୍‌ଓଙ୍କ ଜୀବନ - Blo Death On Election Duty

ଯାଜପୁର: ନିର୍ବାଚନ ଡ୍ୟୁଟି ବେଳେ ଅଘଟଣ । ଆଜି ସାରା ରାଜ୍ୟରେ ଅନ୍ତିମ ପର୍ଯ୍ୟାୟ ମତଦାନ ଜାରି ରହିଥିବା ବେଳେ ଜଣେ ବିଏଲ୍‌ଓଙ୍କ ମୃତ୍ୟୁ ଘଟିଛି । ମୃତକ ବିଏଲ୍‌ଓ ମନୋରଞ୍ଜନ ସାହୁ । ବିଞ୍ଝାରପୁର ନିର୍ବାଚନ ମଣ୍ଡଳୀ ଓଳେଇ ଚନ୍ଦନପୁରର ବୁଥ ନମ୍ବର ୧୫୭ରେ କାର୍ଯ୍ୟରତ ଥିଲେ ମନୋରଞ୍ଜନ । ତେବେ ସେ ଡ୍ୟୁଟିରେ ଥିବାବେଳେ ହଠାତ୍ ଛାତିରେ ଯନ୍ତ୍ରଣା ଅନୁଭବ କରିଥିଲେ । ଏହାପରେ ତାଙ୍କୁ ବିଞ୍ଝାରପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ସେପଟେ ଗତ କାଲିଠାରୁ ମନୋରଞ୍ଜନ ସାହୁଙ୍କ ସ୍ୱାସ୍ଥ୍ୟାବସ୍ଥା ଭଲ ନଥିବା କହିଛନ୍ତି ପରିବାର ଲୋକେ । ତେବେ ଆଜି ତାଙ୍କର ଏପରି ଆକସ୍ମିକ ମୃତ୍ୟୁରେ ପରିବାରରେ ଶୋକର ଛାୟା ଖେଳିଯାଇଛି । ଏଥିପାଇଁ ବୁଥ ନମ୍ବର ୧୫୭ରେ କିଛି ସମୟ ଭୋଟ ବାଧାପ୍ରାପ୍ତ ହୋଇଥିଲେ ହେଁ ବର୍ତ୍ତମାନ ଭୋଟିଂ ପ୍ରକ୍ରିୟା ସ୍ବାଭାବିକ ରହିଛି ।

ଏହା ମଧ୍ୟ ପଢନ୍ତୁ: ଯାଜପୁରରେ ଚାଲିଛି ଭୋଟିଂ: ଭୋଟ ଦେଲେ ସଂଧ୍ୟାରାଣୀ-ଶର୍ମିଷ୍ଠା

ଯାଜପୁର, ଇଟିଭି ଭାରତ