ବାଲେଶ୍ବରରେ କମ୍ପିଲା ପ୍ରଚାର ମୈଦାନ, ସବୁ ଦଳର ନେତାଙ୍କ ରୋଡ ସୋ - Election Campaign in Balasore

Election Campaign in Balasore: ବାଲେଶ୍ବର: ଶେଷ ପର୍ଯ୍ୟାୟ ତଥା ରାଜ୍ୟରେ ଜୁନ 1 ତାରିଖରେ ଚତୁର୍ଥ ପର୍ଯ୍ୟାୟ ନିର୍ବାଚନ । ଏହି ପର୍ଯ୍ୟାୟରେ ବାଲେଶ୍ବର ଲୋକସଭା ନିର୍ବାଚନ ମଣ୍ଡଳୀରେ ପଡ଼ିବ ଭୋଟ୍‌ । ଶେଷ ପର୍ଯ୍ୟାୟ ଲଢେଇକୁ ଆଉ କିଛି ଦିନ ବାକି ଥିବା ବେଳେ ଆଜି (ସୋମବାର) କମ୍ପିଛି ପ୍ରଚାର ମୈଦାନ । ବାଲେଶ୍ବରରେ ତିନି ଦଳର ନେତା ନିଜ ପ୍ରାର୍ଥୀଙ୍କ ପାଇଁ ରୋଡ ସୋ' ଜରିଆରେ ଭୋଟ ମାଗିଥିବା ଦେଖିବାକୁ ମିଳିଛି ।

ନୀଳଗିରି ନିର୍ବାଚନ ମଣ୍ଡଳୀର କେସି ହାଇସ୍କୁଲ ପଡ଼ିଆରେ ଏକ ନିର୍ବାଚନୀ ସଭାରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଯୋଗଦେଇ ସାଂସଦ ପ୍ରାର୍ଥୀ ପ୍ରତାପ ଚନ୍ଦ୍ର ଷଡ଼ଙ୍ଗୀ ଏବଂ ନୀଳଗିରି ବିଧାୟକ ପ୍ରାର୍ଥୀ ସନ୍ତୋଷ ଖଟୁଆଙ୍କ ପାଇଁ ଜନତାଙ୍କୁ ଭୋଟ ଭିକ୍ଷା କରିଥିଲେ । ଏହି ସଭାରେ କେନ୍ଦ୍ରମନ୍ତ୍ରୀ ରାଜ୍ୟ ସରକାରଙ୍କୁ ଟାର୍ଗେଟ କରିଥିବା ବେଳେ ଏଥର ସରକାର ପରିବର୍ତ୍ତନ ହେବା ଆଵଶ୍ୟକ ବୋଲି ଆହ୍ବାନ ଦେଇଥିଲେ । ଅନୁରୂପ ଭାବେ ନୀଳଗିରିରେ ଆଜି ବିଜେଡିର ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ରୋଡ଼ ସୋ ମାଧ୍ୟରେ ସାଂସଦ ପ୍ରାର୍ଥିନୀ ଲେଖାଶ୍ରୀ ସାମନ୍ତ ସିଂହାର ଏବଂ ବିଧାୟକ ପ୍ରାର୍ଥୀ ସୁକାନ୍ତ ନାୟକଙ୍କ ପାଇଁ ଭୋଟ ମାଗିଥିଲେ । ସେହିପରି ସନ୍ଧ୍ୟାରେ କଂଗ୍ରେସ ସାଂସଦ ପ୍ରାର୍ଥୀ ଶ୍ରୀକାନ୍ତ ଜେନା ଏବଂ ସଦର ବିଧାୟିକା ପ୍ରାର୍ଥୀ ମୋନାଲିସା ସାମଲ ସହରର ଫାଣ୍ଡି ଛକରେ ପଥପ୍ରାନ୍ତ ସଭା କରି ଭୋଟ ଭିକ୍ଷା କରିବା ସହ ଏକ ଖୋଲା ଗାଡ଼ିରେ ରୋଡ଼ ସୋ କରିଥିବା ଦେଖିବାକୁ ମିଳିଥିଲା । ଆଗ ପଛରେ ବାଇକ ଶୋଭାଯାତ୍ରାରେ ପ୍ରାର୍ଥୀମାନେ ନିଜ ସପକ୍ଷରେ ଭୋଟ ମାଗିଥିଲେ ।

ଇଟିଭି ଭାରତ, ବାଲେଶ୍ବର