ପରଜଙ୍ଗ ନିର୍ବାଚନ ମଣ୍ଡଳୀରେ ବିଜେପି ପ୍ରାର୍ଥୀଙ୍କ ପ୍ରଚାର ଅଭିଯାନ ଆରମ୍ଭ - Parjanga Assembly constituency

BJP CAMPAIGN: ଢେଙ୍କାନାଳ: ନିର୍ବାଚନ ଯେତିକି ପାଖେଇ ଆସୁଛି ରାଜନୀତି ସେତିକି ସରଗରମ ହେବାରେ ଲାଗିଛି । ଲୋକଙ୍କ ନିକଟତର ହେବ ପାଇଁ ଘର ଘର ବୁଲୁଛନ୍ତି ପ୍ରାର୍ଥୀ । ଢେଙ୍କାନାଳ ପରଜଙ୍ଗ ନିର୍ବାଚନ ମଣ୍ଡଳୀରୁ ବିଜେପି ପ୍ରାର୍ଥୀ ବିଭୂତି ଭୂଷଣ ପ୍ରଧାନ ନିଜର କର୍ମୀ ଓ ସମର୍ଥକଙ୍କ ସହ ରାଜନୈତିକ ପ୍ରଚାର ଅଭିଯାନ ଆରମ୍ଭ କରିଛନ୍ତି । ପରଜଙ୍ଗ ନିର୍ବାଚନ ମଣ୍ଡଳୀର ରୋଡ ପଞ୍ଚାୟତର ବିଭିନ୍ନ ଗ୍ରାମ ବୁଲି ଲୋକଙ୍କ ଆଶୀର୍ବାଦ ନେଇ ଭୋଟ ଭିକ୍ଷା କରିଛନ୍ତି  । ମୋଦିଜୀଙ୍କ ବିଭିନ୍ନ ଉନ୍ନୟନ ମୂଳକ କାର୍ଯ୍ୟକ୍ରମକୁ ନେଇ ତୃଣମୂଳ ସ୍ତରରେ କିଭଳି ଭାବରେ ଗାଁ ଗାଁରେ ଜନସାଧାରଣଙ୍କ ପାଖରେ ପହଞ୍ଚାଇ ପାରିବେ ସେ ଦିଗରେ ଗୁରୁତ୍ବ ଦେବେ ବୋଲି କହିଛନ୍ତି ବିଭୂତି ଭୂଷଣ ପ୍ରଧାନ ।  

ଏହା ମଧ୍ୟ ପଢନ୍ତୁ... ଷ୍ଟ୍ରଙ୍ଗରୁମକୁ ସ୍ଥାନାନ୍ତରିତ ହେଲା ଇଭିଏମ ଓ ଭିଭିପ୍ୟାଟ, ମେ ୨୫ରେ ଖୋର୍ଦ୍ଧା ଜିଲ୍ଲାରେ ନିର୍ବାଚନ - GENERAL ELECTION 2024

ସେ କହିଛନ୍ତି ଯେ, ଆମକୁ ଜନତାଙ୍କ ସମର୍ଥନ ମିଳୁଛି । ଭାରତୀୟ ଜନତା ପାର୍ଟି ସର୍ବାଦା ଗରିବ ଲୋକଙ୍କ କଲ୍ୟାଣ ପାଇଁ କାମ କରିଆସୁଛି । ବିଜେପି ଦଳ ପୁଣି ଥରେ ତାଙ୍କୁ ସୁଯୋଗ ଦେଇ ଥିବାରୁ ସେ କୃତଜ୍ଞ ପ୍ରକାଶ କରିଥିଲେ । ମୋଦିଜୀ ସବୁବେଳେ ଗରିବ ଶ୍ରେଣୀର ଲୋକମାନଙ୍କୁ ଗୁରୁତ୍ବ ଦେଇଥାନ୍ତି । ଏଥର ବିଜେଡି ଗଡ଼ରେ ବିଜେପି ପଦ୍ମ ଫୁଟାଇବେ ବୋଲି ସେ ଆଶା ରଖିଛନ୍ତି । ଏହି ପ୍ରଚାର କାର୍ଯ୍ୟକ୍ରମରେ ଶତାଧିକ ବିଜେପି ନେତା ଓ କର୍ମୀ ମାନେ ଯୋଗଦେଇଥିଲେ । ତେବେ ଆଗାମୀ ମେ 25ରେ ଢେଙ୍କାନାଳରେ ଭୋଟ ଗ୍ରହଣ ହେବାକୁ ଥିବା ବେଳେ ଜନତା କାହାକୁ ବାଛୁଛନ୍ତି ତାହା ସମୟ କହିବ ।

ଇଟିଭି ଭାରତ, ଢେଙ୍କାନାଳ