ହାଇଦ୍ରାବାଦ: ଆଜି ଆକାଶରେ ଏକ ବିରଳ ଘଟଣା ଘଟିବାକୁ ଯାଉଛି । ଆପଣ ଚନ୍ଦ୍ରଗ୍ରହଣ ବିଷୟରେ ପୂର୍ବରୁ ଜାଣିଛନ୍ତି କିନ୍ତୁ ଶନି ଚନ୍ଦ୍ରଗ୍ରହଣ ବିଷୟରେ ଶୁଣିଛନ୍ତି କି ? ହଁ, ଆଜ୍ଞା ଏହା ସତ । ଆଜି ଏଭଳି କିଛି ବିରଳ ମହାଜାଗତିକ ଦୃଶ୍ୟ ଦେଖିବାକୁ ମିଳିବ । ଦୀର୍ଘ ୧୮ ବର୍ଷ ପରେ ଭାରତରେ ଏଭଳି ସୁଯୋଗ ଆସିଛି । ଆଜି ଅର୍ଥାତ୍ ୨୪ ଜୁଲାଇ ୨୦୨୪ର ରାତିରେ ଆମେ ସମସ୍ତେ ଏହି ଘଟଣାର ଦେଖିପାରିବା । ବୈଜ୍ଞାନିକଙ୍କ ଅନୁସାରେ, ରାତିରେ କିଛି ସମୟ ପାଇଁ ଚନ୍ଦ୍ର ପଛରେ ଲୁଚିଯିବ ଶନି ଏବଂ ଚନ୍ଦ୍ରର ପାର୍ଶ୍ୱ ଏକ ବଳୟ ପରି ଦେଖାଯିବ । ଏହି ଶନି ଚନ୍ଦ୍ରଗ୍ରହଣ ପ୍ରଭାବରେ ଅନେକ ରାଶି ମଧ୍ୟ ପ୍ରଭାବିତ ହେବ ।
ଶନି ଚନ୍ଦ୍ରଗ୍ରହଣ କେବେ ଦୃଶ୍ୟମାନ ହେବ ?
ଏହି ବିରଳ ଘଟଣା ୨୪-୨୫ ଜୁଲାଇ ମଧ୍ୟରାତ୍ରିରେ ଘଟିବାକୁ ଯାଉଛି । ବୈଜ୍ଞାନିକଙ୍କ ଅନୁଯାୟୀ ଏହି ସମୟରେ ରାତିରେ କିଛି ଘଣ୍ଟା ପାଇଁ ଆକାଶରେ ଦୃଶ୍ୟମାନ ହେବ । ଯେତେବେଳେ ଶନି ଚନ୍ଦ୍ର ପଛରେ ଲୁଚିଯିବ ସେତେବେଳେ ଚନ୍ଦ୍ରଗ୍ରହଣ ଘଟିବ। ଚନ୍ଦ୍ର ପଛରେ ଲୁଚି ରହିଥିବାରୁ ଶନି ଚନ୍ଦ୍ର ପାର୍ଶ୍ୱରୁ ଏକ ବଳୟ ପରି ଦେଖାଯିବ । ବୈଜ୍ଞାନିକମାନେ ଏହାକୁ ଶନି ଚନ୍ଦ୍ରଗ୍ରହଣ (Lunar Occultation of Saturn) ବୋଲି ନାମିତ କରିଛନ୍ତି ।
କେଉଁ ସମୟରେ ଦେଖାଯିବ ଶନି ଚନ୍ଦ୍ରଗ୍ରହଣ ?
ସୂଚନା ଅନୁଯାୟୀ, ଜୁଲାଇ ୨୪ରେ ମଧ୍ୟରାତ୍ରୀ ୧: ୩୦ମିନିଟରୁ ଏହି ବିରଳ ଦୃଶ୍ୟ ଧୀରେ ଧୀରେ ବୃଦ୍ଧି ପାଇବ ଏବଂ ୧୫ ମିନିଟ ମଧ୍ୟରେ ଚନ୍ଦ୍ର ଶନିକୁ ସମ୍ପୂର୍ଣ୍ଣ ରୂପେ ଲୁଚାଇଦେବ । ପ୍ରାୟ ୪୫ ମିନିଟ ପରେ ଅର୍ଥାତ୍ ରାତି ୨:୨୫ ମିନିଟରେ ଶନି ଚନ୍ଦ୍ର ପଛରୁ ବାହାରୁଥିବା ଦେଖାଯିବ । ଅର୍ଥାତ୍ ଏହି ବିରଳ ଦୃଶ୍ୟ ଆକାଶରେ ଆଜି ମଧ୍ୟରାତ୍ରି 1:30 ରୁ 2:25 ପର୍ଯ୍ୟନ୍ତ ଚାଲିବ ।
ଶନି ଚନ୍ଦ୍ରଗ୍ରହଣ କେଉଁଠାରେ ଦେଖାଯିବ ?
ଶନି ଚନ୍ଦ୍ରଗ୍ରହଣର ଦୃଶ୍ୟ କେବଳ ଭାରତରେ ନୁହେଁ ଅନ୍ୟ ପଡୋଶୀ ଦେଶରେ ମଧ୍ୟ ଦେଖାଯିବ । ତେବେ ବିଭିନ୍ନ ଦେଶ ଅନୁଯାୟୀ ସମୟ ମଧ୍ୟରେ କିଛି ପାର୍ଥକ୍ୟ ରହିବ । ଶନି ଚନ୍ଦ୍ରଗ୍ରହଣର ଘଟଣା ଶ୍ରୀଲଙ୍କା, ମିଆଁମାର, ଚୀନ୍ ଏବଂ ଜାପାନ ଭଳି ଦେଶରେ ମଧ୍ୟ ଦେଖିବାକୁ ମିଳିବ । ଆପଣ ଖୋଲା ଆଖିରେ ମଧ୍ୟ ଏହି ଘଟଣା ଦେଖିପାରିବେ । ତଥାପି, ଶନିଙ୍କ ବଳୟ ଦେଖିବା ପାଇଁ ଆପଣଙ୍କୁ ଟେଲିସ୍କୋପ ଆବଶ୍ୟକ ହୋଇପାରେ ।
ଅକ୍ଟୋବରରେ ଶନି ଚନ୍ଦ୍ରଗ୍ରହଣ ପୁନର୍ବାର ଘଟିବ
ତିନିମାସ ପରେ, ଶନି ଚନ୍ଦ୍ରଗ୍ରହଣର ଘଟଣା ୧୪ ଅକ୍ଟୋବର ୨୦୨୪ ରେ ପୁଣି ଥରେ ଆକାଶରେ ଦେଖାଯିବ । ମେଘୁଆ ଆକାଶ କିମ୍ବା 24-25 ଜୁଲାଇ 2024 ର ମଧ୍ୟରାତ୍ରିରେ ଯଦି ଆପଣ ଏହି ଘଟଣା ଦେଖିବାକୁ ସକ୍ଷମ ନୁହଁନ୍ତି, ତେବେ ଆପଣଙ୍କୁ ନିରାଶ ହେବାର ଆବଶ୍ୟକତା ନାହିଁ । ଅକ୍ଟୋବରରେ ଆପଣ ଏହାକୁ ପୁଣି ଦେଖିପାରିବେ ।
ଏହା ମଧ୍ୟ ପଢନ୍ତୁ: ଚନ୍ଦ୍ରଗ୍ରହଣର କାରଣ ଓ ନିୟମ କଣ ରହିଛି, ଜାଣନ୍ତୁ
ଶନି ଚନ୍ଦ୍ରଗ୍ରହଣ ଯୋଗୁଁ କେଉଁ ରାଶି ଉପରେ ପଡିବ ପ୍ରଭାବ ?
ଶନି ଚନ୍ଦ୍ର ଗ୍ରହଣ ଯୋଗୁଁ ୫ ରାଶିଙ୍କ ଉପରେ ପ୍ରଭାବ ପଡିପାରେ । ଜ୍ୟୋତିଷ ଶାସ୍ତ୍ର ଅନୁଯାୟୀ, ଶନି ଚନ୍ଦ୍ର ଗ୍ରହଣ ଯୋଗୁଁ କୁମ୍ଭ ରାଶି ସହ ମକର ରାଶି, ମୀନ ରାଶି, କର୍କଟ ଏବଂ ବୃଷ ରାଶି ପ୍ରଭାବିତ ହେବେ । ଏହି ସମୟରେ, ଶନି ଚନ୍ଦ୍ରଙ୍କ ସହ ରହିବେ, ଯାହାକି ବିଶ୍ୱ ଯୋଗର ମିଶ୍ରଣ ସୃଷ୍ଟି କରିବ । ଏହି କାରଣରୁ, ଏହି ରାଶିର ଲୋକମାନେ ଆର୍ଥିକ ଦୃଷ୍ଟିରୁ ଯତ୍ନବାନ ହେବା ଆବଶ୍ୟକ । ଭ୍ରମଣରେ ଅସୁବିଧା ହେବ । ସଫଳତା ହାସଲ କରିବାରେ ଅସୁବିଧା ହୋଇପାରେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
