ଶ୍ରୀହରିକୋଟା: ମହାକାଶ ଗବେଷଣା କ୍ଷେତ୍ରରେ ଇସ୍ରୋର ଆଉ ଏକ ମାଇଲଷ୍ଟୋନ । ଉତକ୍ଷେପଣ ହେଲା SSLV-D3 ରକେଟ୍ । ଆଜି ଦେଶର ସବୁଠୁ ଛୋଟ ରକେଟ 'ସ୍ମଲ ସାଟେଲାଇଟ ଲଞ୍ଚ ଭେହିକିଲ'ରେ (SSLV-D3 ) ଆର୍ଥ ଅବଜରଭେସନ ସାଟେଲାଇଟ (EOS-08) ଲଞ୍ଚ କରିଛି ଭାରତୀୟ ମହାକାଶ ଗବେଷଣା ସଂସ୍ଥା (ISRO) । ସକାଳ ୯ଟା ୧୭ ମିନିଟର ଶ୍ରୀହରିକୋଟାର (ଆନ୍ଧ୍ରପ୍ରଦେଶ) ସତୀଶ ଧୱନ ସ୍ପେସ ସେଣ୍ଟରରୁ ଏହାର ସଫଳ ଉତକ୍ଷେପଣ ହୋଇଛି ।
#WATCH | ISRO (Indian Space Research Organisation) launches the third and final developmental flight of SSLV-D3/EOS-08 mission, from the Satish Dhawan Space Centre in Sriharikota, Andhra Pradesh.
— ANI (@ANI) August 16, 2024
(Video: ISRO/YouTube) pic.twitter.com/rV3tr9xj5F
କ'ଣ ଏହି ସାଟେଲାଇଟ EOS-08:
ଆର୍ଥ ଅବଜରଭେସନ ସାଟେଲାଇଟ ( EOS-08) ଏକ କ୍ଷୁଦ୍ର ସାଟେଲାଇଟ୍ । ଏହାର ଓଜନ ୧୭୫.୫ କିଲୋଗ୍ରାମ ଓ ଏହାକୁ ଭୂପୃଷ୍ଠରୁ ୪୭୫ କିଲୋମିଟର ଉଚ୍ଚତାରେ ଅବସ୍ଥାପିତ କରିବ ଇସ୍ରୋ । ଏହି ସାଟେଲାଇଟ ପରିବେଶ ପର୍ଯ୍ୟବେକ୍ଷଣ, ପାଣିପାଗ ଓ ବିପର୍ଯ୍ୟୟ ପରିଚାଳନାରେ ସହାୟକ ହେବ । ୧୭୫.୫ କେଜି ବିଶିଷ୍ଟ ଏହି EOS-08ରେ ତିନୋଟି ଷ୍ଟେଟ-ଅଫ-ଦ ଆର୍ଟ ପେଲୋଡ ଅଛି ଯଥା, ଇଲେକ୍ଟ୍ରୋ ଅପଟିକାଲ ଇନଫ୍ରାରେଡ ପେଲୋଡ (EOIR), ଗ୍ଲୋବାଲ ନେଭିଗେସନ ସାଟେଲାଇଟ ସିଷ୍ଟମ ରିଫ୍ଲେକୋମେଟ୍ରି ପେଲୋଡ (GNSS-R) ଓ ସିଫ ୟୁବି ଡୋଜିମିଟର (SiC UV Dosimeter) । SSLV ରକେଟର ଲମ୍ବା ୩୪ ମିଟର ଓ ବ୍ୟାସ ୨ ମିଟର । SSLVର ଓଜନ ୧୨୦ ଟନ ଅଟେ । ଏସଏସଏଲବି ୧୦ରୁ ୫୦୦ କିଲୋର ପେଲୋଡସ୍କୁ ୫୦୦ କିଲୋମିଟର ପର୍ଯ୍ୟନ୍ତ ପହଞ୍ଚାଇ ପାରିବ । SSLV ମାତ୍ର ୭୨ ଘଣ୍ଟା ମଧ୍ୟରେ ପ୍ରସ୍ତୁତ ହୋଇଯାଏ ।
ପ୍ରକାଶ ଥାଉକି, SSLV-D3ରେ ଏହି ଆର୍ଥ ଅବଜରଭେସନ ସାଟେଲାଇଟକୁ ପ୍ରଥମେ ୧୫ ଅଗଷ୍ଟରେ ଲଞ୍ଚ କରାଯିବାର ଥିଲା । ହେଲେ ପରବର୍ତ୍ତୀ ସମୟରେ ଏହାକୁ ଗୋଟିଏ ଦିନ ଘୁଞ୍ଚାଯାଇଥିଲା । ଏହି ମିଶନ SSLV ରକେଟର ତୃତୀୟ ତଥା ଶେଷ ଡେଭଲପମେଣ୍ଟାଲ ଉଡାଣ । ପ୍ରଥମ ଉଡାଣ SSLV-D1 ୨୦୨୨ ଅଗଷ୍ଟ ୭ ଏବଂ ୨୦୨୩ ଫେବୃଆରୀରେ ଦ୍ବିତୀୟ ଉଡାଣ ହୋଇଥିଲା । ଆଜି ତୃତୀୟ ମିଶନ ସହିତ SSLV ଡେଭଲପମେଣ୍ଟ ପ୍ରୋଜେକ୍ଟ ସମ୍ପୂର୍ଣ୍ଣ ହେବ ଏବଂ ଏହା ନ୍ୟୁସ୍ପେସ ଇଣ୍ଡିଆ ଲିମିଟେଡ (NISL) ଓ ଭାରତୀୟ ଇଣ୍ଡଷ୍ଟ୍ରୀ ଦ୍ବାରା ଅପରେସନାଲ ମିଶନ ପାଇଁ ବ୍ୟବହାର କରାଯିବ ।
