ବ୍ରହ୍ମପୁର: ପୁଣି ଅଶାନ୍ତ ହେଲା ବ୍ରହ୍ମପୁର । ହାଉସିଂ ବୋର୍ଡରେ ସଂଘବଦ୍ଧ ଆକ୍ରମଣ କରି ଯୁବକଙ୍କୁ ହତ୍ୟା ଅଭିଯୋଗ । ରକ୍ତ ଜୁଡୁବୁଡୁ ଅବସ୍ଥାରେ ଯୁବକଙ୍କୁ ଉଦ୍ଧାର କରାଯାଇ ହସ୍ପିଟାଲ ନିଆଯାଇଥିବା ବେଳେ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଛନ୍ତି । ସେପଟେ ହତ୍ୟାକାଣ୍ଡର କାରଣ ଏବେ ସୁଦ୍ଧା ସ୍ପଷ୍ଟ ହୋଇନଥିବା ବେଳେ ପୂର୍ବ ଶତ୍ରୁତାର ହତ୍ୟା କରାଯାଇଥିବା ଅନୁମାନ କରାଯାଉଛି । ସେପଟେ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛି ।
ଗଞ୍ଜାମ ଜିଲ୍ଲା ବ୍ରହ୍ମପୁର ସହରର ଗୋଷାଣୀନୂଆଗାଁ ଥାନା ଅନ୍ତର୍ଗତ ହାଉସିଂବୋର୍ଡ ସ୍ଥିତ ପ୍ରଥମପାର୍କ ନିକଟରୁ ମଙ୍ଗଳବାର ରାତିରେ ଯୁବକଙ୍କୁ ମରଣାନ୍ତକ ଆକ୍ରମଣ ହୋଇଛି । କିଛି ବ୍ୟକ୍ତି ସଂଘବଦ୍ଧ ଭାବେ ଆକ୍ରମଣ କରିଥିବା ସୂଚନା ରହିଛି । ଏନେଇ ପୋଲିସ ଖବର ପାଇବା ପରେ ରକ୍ତ ଜୁଡୁବୁଡୁ ଅବସ୍ଥାରେ ଯୁବକଙ୍କୁ ଉଦ୍ଧାର କରି ଆମ୍ବୁଲାନ୍ସ ଯୋଗେ ବ୍ରହ୍ମପୁର ଏମ୍.କେ.ସି.ଜି ମେଡିକାଲରେ ଭର୍ତ୍ତି କରିଥିବା ବେଳେ ସେଠାରେ ଡାକ୍ତର ମୃତ ଘୋଷଣା କରିଥିଲେ ।
ମୃତ ଯୁବକଜଣକ ବ୍ରହ୍ମପୁର ସହରର ଖଲାସି ସାହିର ଟୁନା ଦାସ ବୋଲି ଜଣାପଡିଛି । ଅନ୍ୟପଟେ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା ବେଳେ ତେବେ କାହିଁକି ଟୁନା ହାଉସିଙ୍ଗ୍ ବୋର୍ଡ ଅଞ୍ଚଳକୁ ଆସିଥିଲେ ତାହା ଜଣାପଡିନାହିଁ । ଏବେସୁଦ୍ଧା ହତ୍ୟା କାରଣ ମଧ୍ୟ ଜଣାପଡିନାହିଁ । ତେବେ ପୂର୍ବ ଶତ୍ରୁତାକୁ ନେଇ ଏହି ହତ୍ୟାକାଣ୍ଡ ଘଟିଥିବା ଅନୁମାନ କରାଯାଉଥିବା ବେଳେ ଏଥିରେ ଅନ୍ୟ କିଛି କାରଣ ଯଦି ରହିଥାଏ ତେବେ ତାହା ପୋଲିସ ତଦନ୍ତ ପରେ ସ୍ପଷ୍ଟ ହେବ ବୋଲି ଆଶା କରାଯାଉଛି ।
ଟୁନା ହାଉସିଂ ବୋର୍ଡ ଅଞ୍ଚଳକୁ ଆସିଥିବା ବେଳେ ତାର ଗତିବିଧିକୁ ଅନୁଧ୍ୟାନ କରି କିଛି ଯୁବକ ଆସି ଏଭଳି ଆକ୍ରମଣ କରିଥିବା କୁହାଯାଇଛି । ସେପଟେ ଏହି ଘଟଣାକୁ ନେଇ ବ୍ରହ୍ମପୁର ପୋଲିସର ଏକ ଟିମ୍ ଏବଂ ଗୋଷାଣୀ ନୂଆଗାଁ ଥାନା ପୋଲିସ ଘଟଣାସ୍ଥଳରେ ପହଁଚି ତଦନ୍ତ କରୁଥିବା ଜଣାପଡିଛି ।
ଗଞ୍ଜାମ ଜିଲ୍ଲା ବ୍ରହ୍ମପୁର ସହରରେ ଦିନକୁ ଦିନ ବୃଦ୍ଧି ପାଇବାରେ ଲାଗିଛି ଅପରାଧିକ କାର୍ଯ୍ୟ । ଆଇନକୁ ଖୁଲମଖୁଲା ଉଲ୍ଲଂଘନ କରି ଏଠାରେ ହତ୍ୟା, ଚୋରୀ ଭଳି ଅପରାଧିକ ମାମଲା ଘଟିଚାଲିଛି । ଅପରାଧରେ ରୋକ ଲଗାଇବା ପୋଲିସ ପାଇଁ ବଡ ଚ୍ୟାଲେଞ୍ଜ ପାଲଟିଛି ।
ଇଟିଭି ଭାରତ, ବ୍ରହ୍ମପୁର
