ନିମାପଡ଼ା: କେରଳ ୱାୟନାଡରେ ଓଡ଼ିଆ ଡାକ୍ତର ବିଷ୍ଣୁ ପ୍ରସାଦ ଚିନାରାଙ୍କ ମୃତ୍ୟୁକୁ ୩ ଦିନ ବିତି ସାରିଲାଣି । ହେଲେ ଏ ଯାଏଁ କେରଳରୁ ତାଙ୍କର ମୃତଦେହ ଓଡ଼ିଶା ଫେରି ପାରିନାହିଁ । ଏଣେ ପୁଅକୁ ଶେଷ ଥର ପାଇଁ ଟିକିଏ ଦେଖିବାକୁ ଅନାଇ ବସିଛନ୍ତି ପରିବାର ଲୋକେ । ପୁଅର ମୃତ୍ୟୁ ଖବର ଶୁଣି ପାଇଁ ଦୁଃଖରେ ଭାଙ୍ଗି ପଡିଥିବା ପରିବାର ଓ ବନ୍ଧୁ ପରିଜନ ତାଙ୍କର ମରଶରୀର ଯଥାଶୀଘ୍ର କେରଳରୁ ଜନ୍ମମାଟିକୁ ଫେରାଇ ଆଣିବାକୁ ସରକାରଙ୍କୁ ଆକୁଳ ନିବେଦନ କରିଛନ୍ତି । ବିଷ୍ଣୁପ୍ରସାଦଙ୍କ ମୃତ୍ୟୁ ଖବର ଜଣାପଡିବା ପରେ ପୁରା ଗାଁରେ ଶୋକାକୂଳ ପରିବେଶ ସୃଷ୍ଟି ହୋଇଛି ।
ଜନ୍ମଦିନ ପାଇଁ ବୁଲିବାକୁ ଯାଇଥିଲେ ଡାକ୍ତର
ଡାକ୍ତର ବିଷ୍ଣୁପ୍ରସାଦଙ୍କ ଘର ପୁରୀ ଜିଲ୍ଲା ଗୋପ ବ୍ଲକ ଅନ୍ତର୍ଗତ ପରାଳ ଗ୍ରାମରେ । ସେ ଭୁବନେଶ୍ଵରର ଏକ ଘରୋଇ ହସ୍ପିଟାଲରେ ହାଉସ୍ ସର୍ଜନ ଭାବେ କାର୍ଯ୍ୟରତ ଥିବାବେଳେ ମେଡିସିନରେ ପିଜି କରୁଥିଲେ । ଜୁଲାଇ ୨୭ରେ ତାଙ୍କର ଜନ୍ମଦିନ ଥିଲା । ତେଣୁ ସେ ନିଜର ପତ୍ନୀ ପ୍ରିୟଦର୍ଶିନୀ, ବନ୍ଧୁ ସ୍ବାଧୀନ ଓ ଜଣେ ବାନ୍ଧବୀଙ୍କ ସହିତ ୨୬ ତାରିଖରେ କେରଳର ୱାୟନାଡ ବୁଲିବାକୁ ଯାଇଥିଲେ । ଘରୁ ଯିବାବେଳେ ବାପା ପ୍ରମୋଦ ପୁଅ ବୋହୂଙ୍କୁ ବୁଲାବୁଲି କରିବା ସମୟରେ ସତର୍କ ରହିବାକୁ ପରାମର୍ଶ ଦେଇଥିଲେ । ହେଲେ ବିଧିର ବିଧାନ ଥିଲା ଅଲଗା । କିଏ ଜାଣିଥିଲା ପୁଅ ଆଉ ଘର ବାହୁଡିବ ନାହିଁ ବୋଲି ।
ପୁଅକୁ ହରାଇ କାନ୍ଦୁଛି ଗାଁ:
ବିଷ୍ଣୁ ପ୍ରସାଦ ନିଜ ପତ୍ନୀ ଓ ବନ୍ଧୁ ସହ ୱାୟନାଡରେ ପହଞ୍ଚି ଏକ ଘରୋଇ ହୋଟେଲରେ ରାତ୍ରିଯାପନ କରିଥିଲେ । ହେଲେ ଜନ୍ମଦିନ ପାଳନ ପୂର୍ବରୁ ଅର୍ଥାତ୍ ୨୬ ତାରିଖ ରାତିରେ ହଠାତ୍ ଭୂସ୍ଖଳନ ଘଟିଥିଲା । ଏଥିରେ ବିଷ୍ଣୁ ପ୍ରସାଦଙ୍କ ମୃତ୍ୟୁ ହୋଇଥିବାବେଳେ ପତ୍ନୀ ପ୍ରିୟଦର୍ଶିନୀ କୌଣସି ମତେ ବଞ୍ଚିଯାଇଥିବା ସୂଚନା ମିଳିଛି । ସେହିପରି ସ୍ଵାଧୀନ ଏ ପର୍ଯ୍ୟନ୍ତ ନିଖୋଜ ଥିବାବେଳେ ତାଙ୍କର ବାନ୍ଧବୀ ବଞ୍ଚିଥିବା ଜଣାପଡ଼ିଛି । ଏହି ଖବର ତାଙ୍କ ଗାଁରେ ପହଞ୍ଚିବା ପରେ ପରିବାର ଲୋକେ ଦୁଃଖରେ ଭାଙ୍ଗି ପଡିଛନ୍ତି । ଗାଁ ଲୋକେ କୋହଭରା କଣ୍ଠରେ ବିଷ୍ଣୁଙ୍କ ମୃତଦେହ ଜନ୍ମମାଟି ପରାଳ ଗ୍ରାମକୁ ଫେରାଇ ଆଣିବାକୁ ଗଣମାଧ୍ୟମ ଜରିଆରେ ରାଜ୍ୟ ସରକାରଙ୍କୁ ଆକୁଳ ନିବେଦନ କରିଛନ୍ତି ।
ଇଟିଭି ଭାରତ, ନିମାପଡ଼ା
