ରାଇରଙ୍ଗପୁର(ମୟୂରଭଞ୍ଜ): ରାଷ୍ଟ୍ରପତି ହେବା ପରେ ପ୍ରଥମ ଥର ନିଜ ଜନ୍ମମାଟିରେ ପାଦ ଦେଇଛନ୍ତି ମହାମହିମ ଦ୍ରୌପଦୀ ମୁର୍ମୁ । ଯେଉଁ ସ୍କୁଲରେ ପଢୁଥିଲେ ସେହି ସ୍କୁଲକୁ ଯାଇ ଛାତ୍ରଛାତ୍ରୀମାନଙ୍କୁ ଗୁରୁମନ୍ତ୍ର ଦେଇଛନ୍ତି । ଉପରବେଡ଼ା ଏକ ଗାଁ ନୁହେଁ, ମୋ ପରିବାର ବୋଲି କହିଛନ୍ତି ରାଷ୍ଟ୍ରପତି ।
ମାଆ ମାଟିରେ ମହାମହିମ:
କାର୍ଯ୍ୟସୂଚୀ ଅନୁଯାୟୀ ଆଜି ଠିକ୍ ୧୧ଟା ୦୫ ମିନିଟ ସମୟରେ ରଙ୍ଗମାଟିଆ ସ୍ଥିତ ଅସ୍ଥାୟୀ ହେଲିପ୍ୟାଡରେ ପହଞ୍ଚିଥିଲେ ମହାମହିମ । ସ୍ବତନ୍ତ୍ର କାରକେଡ ଯୋଗେ ସଡ଼କ ପଥରେ ଉପରବେଡ଼ା ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟ ଆସିଥିଲେ । ସେଠାରେ ଆୟୋଜିତ କାର୍ଯ୍ୟକ୍ରମରେ ଯୋଗ ଦେଇଥିଲେ ମହାମହିମ । ନିଜ ଅଭିଭାଷଣରେ ସର୍ବ ପ୍ରଥମେ ବଡ଼ମାନଙ୍କୁ ପ୍ରଣାମ, ସାଙ୍ଗମାନଙ୍କୁ ନମସ୍କାର ଓ ଛୋଟ ପିଲାମାନଙ୍କୁ ସ୍ନେହ ଜଣାଇବା ସହିତ ନିଜ ମା' ମାଟିକୁ ପ୍ରଣାମ ଜଣାଇଥିଲେ ।
'ଦେବାଦେବୀଙ୍କ ଆଶୀର୍ବାଦ ରହିଛି'
ରାଷ୍ଟ୍ରପତି ଦ୍ରୌପଦୀ ମୁର୍ମୁ ନିଜ ଅଭିଭାଷଣରେ କହିଛନ୍ତି ଯେ, ଉପରବେଡା ଗାଁର ସମସ୍ତ ଦେବାଦେବୀଙ୍କ ଆଶୀର୍ବାଦ ମୋ ଉପରେ ରହିଛି । ସ୍କୁଲ ଯାଇ ତଳେ ବସି ପଢୁଥିଲେ । ଘରେ ଓ ସ୍କୁଲରେ ଗୋବର ମଧ୍ୟ ଲେପି ଥିବାର କହିଛନ୍ତି । ପିଲାଦିନେ ପ୍ରତ୍ୟେକ ଅଗଷ୍ଟ ୧୫ ଓ ଜାନୁଆରୀ ୨୬ ତାରିଖ ଦିନ ପଞ୍ଚାୟତର ଗାଁ ଗାଁ ବୁଲି ସମସ୍ତଙ୍କ ଘରକୁ ଯାଉଥିବାର କହିଛନ୍ତି ମହାମହିମ । ଲେଖିବା ପାଇଁ କଲମ, ଖାତା ନଥିଲା । ସିଲେଇ କରି ଖାତା ତିଆରି କରି ପାଠ ପଢିଥିବା କହିଛନ୍ତି ମାଡାମ ପ୍ରେସିଡେଣ୍ଟ ।
ସଂଘର୍ଷର କାହାଣୀ କହିଲେ ମହାମହିମ:
ରାଷ୍ଟ୍ରପତି ଆହୁରି କହିଛନ୍ତି, "ବର୍ତ୍ତମାନ ସମୟରେ ଶିକ୍ଷାର ବହୁତ ଆବଶ୍ୟକତା ରହିଛି । ପାଠ ପଢ଼ିବାକୁ ହେଲେ ଉତ୍ତମ ପରିବେଶର ଆବଶ୍ୟକତା ରହିଛି । ଘରେ ଘରେ ସମସ୍ତେ ଶିକ୍ଷିତ ହେବା ହିଁ ମୁଖ୍ୟ ଉଦ୍ଦେଶ୍ୟ । ସେତେବେଳେ ପଢ଼ିବାର ଆଗ୍ରହ ଥିଲା ହେଲେ ସେ ସମୟରେ ଗାଁରେ ବିଦ୍ୟୁତ୍ ସଂଯୋଗ ନଥିଲା । ଡିବି ଆଲୁଅ ଜଳାଇ ପାଠ ପଢୁଥିଲି । ୩ କ୍ଲାସ , ୫ କ୍ଲାସରେ ସ୍କଲାରସିପ ମଧ୍ୟ ମିଳିଥିଲା । ବର୍ତ୍ତମାନ ସମାଜର ଭବିଷ୍ୟତ ହେଉଛନ୍ତି କୁନି କୁନି ପିଲାମାନେ । ଆସନ୍ତାକାଲିର ବି ଭବିଷ୍ୟତ ସେମାନେ। ବାପା ମାଆ ବହୁ ପରିଶ୍ରମ କରିଛନ୍ତି, ତେଣୁ ଛାତ୍ରଛାତ୍ରୀମାନଙ୍କୁ ମନ ଦେଇ ପାଠ ପଢ଼ନ୍ତୁ ।"
ଏହା ବି ପଢନ୍ତୁ...ଜନ୍ମମାଟି ଉପରବେଡ଼ାରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ, ଭବ୍ୟ ସ୍ବାଗତ
ଏହା ବି ପଢନ୍ତୁ...ଜନ୍ମମାଟି ଯିବେ ରାଷ୍ଟ୍ରପତି: ସଜେଇ ହେଉଛି ରାଇରଙ୍ଗପୁର ମହିଳା ମହାବିଦ୍ୟାଳୟ
ଏହା ବି ପଢନ୍ତୁ...ଗୋଟିଏ କ୍ଲିକରେ ଜାଣନ୍ତୁ ରାଷ୍ଟ୍ରପତିଙ୍କ ମୟୂରଭଞ୍ଜ ଗସ୍ତ, ଜନ୍ମମାଟି ଯିବେ ମହାମହିମ
ଶିକ୍ଷକ, ଛାତ୍ରଛାତ୍ରୀ ଓ ବନ୍ଧୁଙ୍କୁ ଭେଟିଲେ :
ରାଷ୍ଟ୍ରପତି ପିଲାଦିନର ସ୍ମୃତି ମନେ ପକାଇ କହିଛନ୍ତି ଯେ, ଭୁବନେଶ୍ବରରେ ପଢୁଥିବା ସମୟରେ ପୂରା ଗାଁ ତାଙ୍କ ପରିବାର ଭଳି ଲାଗୁଥିଲା। ଏବେ ସ୍ନେହ ଭାବ ଦେଖାଯାଉନି । ଆମକୁ ଏକତା ବଜାୟ ରଖିବାକୁ ପଡିବ। ପ୍ରତିଦିନ ସନ୍ଧ୍ୟାରେ ଭଗବାନଙ୍କ ନା ନେବାକୁ ପରାମର୍ଶ ଦେଇଛନ୍ତି । ସେତେବେଳେ ସବୁ ମାଟି ଘର ଥିଲା। ପାଣିର ବ୍ୟବସ୍ଥା ନଥିଲା। ପୋଖରୀରୁ ପାଣି ଆଣୁଥିବାର କହିଛନ୍ତି । ପିଲାମାନଙ୍କୁ ଆଗକୁ ବଢାଇବାର କେବଳ ଶିକ୍ଷକଙ୍କ କାମ ନୁହେଁ, ଅଭିଭାବକ ଓ ସମାଜର ମଧ୍ୟ କାମ। ଏହି ସ୍କୁଲକୁ ଆସିବା ପାଇଁ ବହୁ ପ୍ରୟାସ ପରେ ଆଜି ସଫଳ ହୋଇଥିବାର କହିଛନ୍ତି।
ଛାତ୍ରଛାତ୍ରୀଙ୍କୁ ଉପହାର ଦେଲେ:
ସ୍କୁଲ ଛାତ୍ରଛାତ୍ରୀଙ୍କ ପାଇଁ ଉପହାର ଭେଟି ଦେଇଛନ୍ତି ରାଷ୍ଟ୍ରପତି । ମହାମହିମଙ୍କୁ ପଢାଇଥିବା ଶିକ୍ଷକମାନଙ୍କୁ ମଧ୍ୟ ସମ୍ମାନିତ କରିଛନ୍ତି ନିଜେ ମହାମହିମ ଦ୍ରୌପଦୀ ମୁର୍ମୁ । ସାଙ୍ଗସାଥିମାନଙ୍କୁ ମଧ୍ୟ କିଛି କିଛି ଉପହାର ପ୍ରଦାନ କରିଥିଲେ ମହାମହିମ । ସେଠାରୁ କାର୍ଯ୍ୟକ୍ରମର ସମାପନ ପରେ କମଳା ବିମଳା ଉଚ୍ଚ ବିଦ୍ୟାଳୟ ଯାଇଥିଲେ । ସେଠାରୁ ମହାମହିମ ନିଜ ଘରକୁ ଯାଇଥିଲେ। ପାରମ୍ପରିକ ରୀତିନୀତି ଅନୁସାରେ ମହାମହିମଙ୍କୁ ସ୍ବାଗତ କରିଥିଲେ ଗ୍ରାମବାସୀ ଓ ପରିବାରବର୍ଗ । ଆଉ ମହାମହିମଙ୍କୁ ଘରକୁ ପାଛୋଟି ନେଇଥିଲେ ପରିବାର ସଦସ୍ୟ ।
ଇଟିଭି ଭାରତ, ମୟୂରଭଞ୍ଜ
