କେନ୍ଦୁଝର: ଜିଲ୍ଲାରେ ଶୁଆକାଟୀ-ଗୁହାଳଡିହି ନୂତନ ରେଳ ପ୍ରକଲଳ୍ପକୁ ବିବୋଧ । ପ୍ରତିବାଦରେ ୧୮ରେ କେନ୍ଦୁଝର ବନ୍ଦ ଡାକରା ଦେଲେ ଟ୍ରକ ମାଲିକ ସଙ୍ଘ । ଶୁଆକାଟିରୁ ଗୁହାଳଡିହି ପର୍ଯ୍ୟନ୍ତ ପ୍ରସ୍ତାବିତ ରେଳ ସଂଯୋଗ ପ୍ରକଳ୍ପକୁ ବିରୋଧ କରି ଗତକାଲି (ରବିବାର) କେନ୍ଦୁଝର ଜିଲ୍ଲା ଟ୍ରକ ମାଲିକ ସଙ୍ଘ ଆହ୍ଵାନକ୍ରମେ ମଣ୍ଡୁଆସ୍ଥିତ ଜିଲ୍ଲା ସଂସ୍କୃତି ଭବନଠାରେ ଏକ ଆଲୋଚନାଚକ୍ର ଅନୁଷ୍ଠିତ ହୋଇଥିଲା ।
ଖଣିଜ ସମ୍ପଦରେ ପରିପୂର୍ଣ୍ଣ କେନ୍ଦୁଝର ଜିଲ୍ଲାବାସୀ ଓ ପଡୋଶୀ ଜିଲ୍ଲାବାସୀ ସାଧାରଣତଃ ଟ୍ରକ ବ୍ୟବସାୟକୁ ନିଜର କରି ଜୀବିକା ନିର୍ବାହ କରନ୍ତି । ଜିଲ୍ଲାର ହଜାର ହଜାର ବେକାର ଶିକ୍ଷିତ ଯୁବକ ଚାକିରି ନପାଇ ବ୍ୟାଙ୍କରୁ ଋଣ କରି ଗାଡି ବ୍ୟବସାୟ ଦ୍ବାରା ପରିବାର ପ୍ରତିପୋଷଣ କରିଥାନ୍ତି । ଯଦି ଏହି ପ୍ରସ୍ତାବିତ ରେଳପଥ ନିର୍ମାଣ ହୋଇ କାର୍ଯ୍ୟକ୍ଷମ ହୁଏ, ତାହେଲେ ହଜାର ହଜାର ଟ୍ରକ ମାଲିକ ସେମାନଙ୍କ ଜୀବିକା ହରାଇବା ନେଇ ଅଭିଯୋଗ କରିଛନ୍ତି । ଯଦି ଶୁଆକାଟୀ-ଗୁହାଳଡିହିକୁ ରେଳ ସଂଯୋଗୀକରଣ କରାଯାଏ, ତାହେଲେ ଜିଲ୍ଲା ଅର୍ଥନୈତିକ ପ୍ରଗତିରେ ପ୍ରତିଦିନ ଆନୁମାନିକ ୮ରୁ ୧୦ କୋଟି ଟଙ୍କାର କ୍ଷତି ହେବା ସହ ବେକାରୀ ସମସ୍ୟା ଦୃତ ଗତିରେ ବଢିବ ବୋଲି ଅଭିଯୋଗ କରିଛନ୍ତି ଟ୍ରକ ମାଲିକ ସଙ୍ଘ । ଏହା ସହିତ ପ୍ରତ୍ୟକ୍ଷ ଓ ପରୋକ୍ଷ ଭାବରେ ଜିଲ୍ଲାର ଲକ୍ଷାଧିକ ଲୋକ ରୋଜଗାର ହରାଇବା ସମ୍ଭାବନା ରହିଛି ବୋଲି ସଙ୍ଘ ପକ୍ଷରୁ କୁହାଯାଇଛି ।
ସେପଟେ ୮ ହଜାରରୁ ଊର୍ଦ୍ଧ୍ୱ ଟ୍ରକ ମାଲିକଙ୍କ ବ୍ୟବସାୟ ବୁଡିବା ସହ ପ୍ରତି ମାଲିକ ହାରାହାରି ୪୦ ଲକ୍ଷରୁ ଊର୍ଦ୍ଧ୍ୱ ଟଙ୍କା ଋଣରେ ବୁଡିବା ସମ୍ଭାବନା ରହିଥିବା କୁହାଯାଇଛି । ଏହାସହ ଟ୍ରକ ଉପରେ ନିର୍ଭର କରି ବଞ୍ଚୁଥିବା ୧ ଲକ୍ଷରୁ ଊର୍ଦ୍ଧ୍ଵ ସମସ୍ତ ଛୋଟ ବଡ଼ ବ୍ୟବସାୟୀ ମଧ୍ୟ ସିଧାସଳଖ ପ୍ରଭାବିତ ହେବେ । ସବୁଠାରୁ ଗୁରୁତ୍ବପୂର୍ଣ୍ଣ ପ୍ରସଙ୍ଗ ହେଲା ଜିଲ୍ଲାର କୋଣ ଅନୁକୋଣରେ ଥିବା ଗାଡି ମାଲିକମାନେ ଆର୍ଥିକ ଚାପ ଓ ପରିବାର ବୋଝକୁ ସହି ନପାରି ଜୀବନ ହାରିବା ପରି ଚରମ ପନ୍ଥା ଅବଲମ୍ବନ କରିବା ଆଶଙ୍କା ପ୍ରକଟ କରିଛନ୍ତି ଟ୍ରକ ମାଲିକ ।
ତେଣୁ ଏପରି ଏକ ସମ୍ବେଦନଶୀଳ ପ୍ରସଙ୍ଗର ସ୍ଥାୟୀ ସମଧାନ ସହ ପାଇପ ଲାଇନରେ ଖଣିଜ ସାମଗ୍ରୀ ପରିବହନକୁ ତୁରନ୍ତ ବନ୍ଦ କରାଯାଉ ବୋଲି ଦାବି ହୋଇଛି । ଏହି କାର୍ଯ୍ୟକ୍ରମରେ ସଦର ବିଧାୟକ ମୋହନ ଚରଣ ମାଝୀ, ଆଶିଷ ଚକ୍ରବର୍ତ୍ତୀ, କୈଳାସ ଚନ୍ଦ୍ର ପଣ୍ଡା, ସଙ୍ଗୀତା ସିଂହ, ଆଲୋକ ମିଶ୍ର, ସୁରେଶ ଚନ୍ଦ୍ର ପଟ୍ଟନାୟକଙ୍କ ସମେତ ବହୁ ବୁଦ୍ଧିଜୀବୀ ନିଜର ବକ୍ତବ୍ୟ ପ୍ରଦାନ କରିଥିଲେ ।
ଇଟିଭି ଭାରତ, କେନ୍ଦୁଝର
