ପୁରୀ: ସହଜ ହେବ ମହାପ୍ରଭୁଙ୍କ ଦର୍ଶନ । ଭକ୍ତମାନଙ୍କୁ ଚତୁର୍ଦ୍ଧାମୂର୍ତ୍ତିଙ୍କ ଦର୍ଶନ ବେଳେ ଆଉ ସମସ୍ୟା ଭୋଗିବାକୁ ପଡ଼ିବ ନାହିଁ । ଦିବ୍ୟାଙ୍ଗ, ବରିଷ୍ଠ ନାଗରିକ, ମହିଳା ଏବଂ ଅନ୍ୟ ଭକ୍ତମାନଙ୍କ ପାଇଁ ଧାଡ଼ି ଦର୍ଶନ ବ୍ୟବସ୍ଥା କାର୍ଯ୍ୟକାରୀ ହେବ । ଆସନ୍ତା ଜାନୁଆରୀ ୨୦ ତାରିଖରୁ ଶ୍ରୀମନ୍ଦିର ନାଟମଣ୍ଡପ ଭିତରେ ଅସ୍ଥାୟୀ ବ୍ୟାରିକେଡ଼ କରାଯାଇ ଧାଡ଼ି ଦର୍ଶନ ବ୍ୟବସ୍ଥା କାର୍ଯ୍ୟକାରୀ କରାଯିବ । ସେପଟେ ପୁରୀକୁ ଦୈନିକ ଏକ ଲକ୍ଷ ଭକ୍ତ ଓ ପର୍ଯ୍ୟଟକଙ୍କ ଆଗମନ ନେଇ ଭିତ୍ତିଭୂମୀ ବ୍ୟବସ୍ଥା ହେବ । ଏହାସହ ଶ୍ରୀମନ୍ଦିର ପରିକ୍ରମା ପ୍ରକଳ୍ପର ଡିଜାଇନରେ ମଧ୍ୟ ପରିବର୍ତ୍ତନ କରାଯାଇ ପରିକ୍ରମା ମାର୍ଗ ଭିତରେ ଅନ୍ନ ଯଜ୍ଞ, ଜ୍ଞାନ ଯଜ୍ଞ ଏବଂ ଘୃତ ଯଜ୍ଞ ମଣ୍ଡପ କରାଯିବ ବୋଲି ସୂଚନା ଦେଇଛନ୍ତି ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ।
ସହଜ ହେବ ମହାପ୍ରଭୁଙ୍କ ଦର୍ଶନ:
ପୁରୀ ଶ୍ରୀମନ୍ଦିରରେ ଭକ୍ତମାନଙ୍କ ଶୃଙ୍ଖଳିତ ଦର୍ଶନ ପାଇଁ ଆସନ୍ତା ୨୦ ତାରିଖରୁ ଧାଡ଼ି ଦର୍ଶନ ବ୍ୟବସ୍ଥା ଲାଗୁହେବ । ଭକ୍ତମାନେ ମୋଟ ୬ଟି ଲାଇନ୍ରେ ଯାଇ ମହାପ୍ରଭୁଙ୍କ ଦର୍ଶନ କରି ପ୍ରତ୍ୟାବର୍ତ୍ତନ କରିବେ । ମହାପ୍ରଭୁଙ୍କ ନୀତିକାନ୍ତି ସମୟରେ ଏହି ଅସ୍ଥାୟୀ ବ୍ୟାରିକେଡ଼କୁ ଖୋଲି ଦିଆଯିବ । କେବଳ ଦର୍ଶନ ସମୟରେ ହିଁ ଏହି ଧାଡ଼ି ଦର୍ଶନ ବ୍ୟବସ୍ଥା କାର୍ଯ୍ୟକାରୀ କରାଯିବ । ଏନେଇ ଓବିସିସି ପକ୍ଷରୁ ଏକ ସ୍ବତନ୍ତ୍ର ଧରଣର ଅସ୍ଥାୟୀ ବ୍ୟାରିକେଡ଼ ନିର୍ମାଣ ହୋଇଥିବା ବେଳେ ଏହା କାର୍ଯ୍ୟକାରୀ ହେଲେ ଶୃଙ୍ଖଳିତ ଦର୍ଶନ ହୋଇପାରିବ ବୋଲି ଆଶା ରଖିଛନ୍ତି ଆଇନମନ୍ତ୍ରୀ ପୃଥ୍ୱୀରାଜ । ସେପଟେ ଶ୍ରୀମନ୍ଦିର ବରିଷ୍ଠ ସେବାୟତ ମଧ୍ୟ ଏହାକୁ ସ୍ବାଗତ କରିଛନ୍ତି । କିନ୍ତୁ ଏହି ବ୍ୟବସ୍ଥା ଦ୍ବାରା ଭକ୍ତଙ୍କୁ ବହୁତ୍ ସମୟ ଅପେକ୍ଷା କରିବାକୁ ପଡ଼ିବ ।
ସେ ଆହୁରି କହିଛନ୍ତି, ‘ତେଣୁ ଶ୍ରୀମନ୍ଦିର ନିକଟରେ ଭକ୍ତମାନଙ୍କ ପାଇଁ ଏକ ଅଭ୍ୟର୍ଥନା କେନ୍ଦ୍ର କରାଯାଇ ବସିବା ବ୍ୟବସ୍ଥା ସହ ପାନୀୟ ଜଳ, ଟଏଲେଟର ବ୍ୟବସ୍ଥା ହେବା ଉଚିତ ବୋଲି କହିଛନ୍ତି ବରିଷ୍ଠ ସେବାୟତ । ସେହିପରି ଭକ୍ତମାନଙ୍କ ପାଇଁ ଅଭ୍ୟର୍ଥନା କେନ୍ଦ୍ରରେ ମହାପ୍ରଭୁଙ୍କ ନୀତିକାନ୍ତି ସମ୍ପର୍କରେ ସୂଚନା ଦେବା ସହ ଶ୍ରୀମନ୍ଦିରର ଐତିହ୍ୟ ଓ ପରମ୍ପରା ବିଷୟରେ ମଧ୍ୟ ଏଲଇଡି ସ୍କ୍ରିନ ମାଧ୍ୟମରେ ପ୍ରଦର୍ଶନ କରିବାର ଆବଶ୍ୟକତା ରହିଛି । ମହାପ୍ରଭୁଙ୍କ ଦର୍ଶନ ପରେ କିଭଳି ଭକ୍ତମାନେ ଭଲରେ ସୁଲଭ ମୂଲ୍ୟରେ ମହାପ୍ରସାଦ ପାଇପାରିବେ ସେ ଦିଗରେ ମଧ୍ୟ ସରକାର ପଦକ୍ଷେପ ନେବା ଉଚିତ୍ ବୋଲି ସେବାୟତ କହିଛନ୍ତି ।
ପରିକ୍ରମା ପ୍ରକଳ୍ପର ଡିଜାଇନରେ ପରିବର୍ତ୍ତନ:
ସେପଟେ ଶ୍ରୀମନ୍ଦିର ପରିକ୍ରମା ପ୍ରକଳ୍ପର ଡିଜାଇନରେ ମଧ୍ୟ ପରିବର୍ତ୍ତନ କରାଯିବ । ପରିକ୍ରମା ମାର୍ଗ ଭିତରେ ଅନ୍ନ ଯଜ୍ଞ, ଜ୍ଞାନ ଯଜ୍ଞ ଏବଂ ଘୃତ ଯଜ୍ଞ ମଣ୍ଡପ କରାଯିବ । ଭକ୍ତମାନେ ଅନ୍ନ ଯଜ୍ଞ ମଣ୍ଡପରେ କିଭଳି ଭଲଭାବେ ମହାପ୍ରସାଦ ସେବନ କରିବେ ସେନେଇ ବ୍ୟବସ୍ଥା ହେବ । ଆଗାମୀ ଦିନରେ ଦୈନିକ ଏକଲକ୍ଷ ଭକ୍ତ ଏବଂ ପର୍ଯ୍ୟଟକ ପୁରୀକୁ ଆସିବା ଭଳି ସମସ୍ତ ବ୍ୟବସ୍ଥା ସହିତ ଭିତ୍ତିଭୂମୀ କରାଯିବ ବୋଲି ଆଇନମନ୍ତ୍ରୀ କହିଛନ୍ତି । ପୁରୀକୁ ଭାରତର ସର୍ବଶ୍ରେଷ୍ଠ ତୀର୍ଥକ୍ଷେତ୍ର ଭାବେ ପ୍ରତିଷ୍ଠିତ କରିବା ପାଇଁ ରାଜ୍ୟ ସରକାରଙ୍କ ଲକ୍ଷ୍ୟ ଥିବା ଆଇନମନ୍ତ୍ରୀ ସୂଚନା ଦେଇଛନ୍ତି । ତେବେ ଆସନ୍ତା ଜାନୁଆରୀ ୨୦ ତାରିଖରୁ ଶ୍ରୀମନ୍ଦିର ନାଟମଣ୍ଡପ ଭିତରେ ଧାଡ଼ି ଦର୍ଶନ ବ୍ୟବସ୍ଥା କାର୍ଯ୍ୟକାରୀ ହେବାକୁ ଥିବାରୁ ଆଗାମୀ ଦିନରେ ଭକ୍ତମାନେ ଶୃଙ୍ଖଳିତ ଭାବରେ ମହାପ୍ରଭୁଙ୍କର ଦର୍ଶନ ପାଇବେ ବୋଲି ଆଶା ରଖିଛନ୍ତି ଆଇନମନ୍ତ୍ରୀ ।
ଦୈନିକ 1 ଲକ୍ଷ ଭକ୍ତଙ୍କ ଆଗମନ ନେଇ ବ୍ୟବସ୍ଥା:
ଶ୍ରୀମନ୍ଦିର ଧାଡ଼ି ଦର୍ଶନ ପ୍ରସଙ୍ଗରେ ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ କହିଛନ୍ତି, "ପୁରୀ ସହରକୁ ଅଧିକରୁ ଅଧିକ ଭକ୍ତ ଓ ପର୍ଯ୍ୟଟକଙ୍କ ଆଗମନ ବଢ଼ିବାରେ ଲାଗିଛି । ତେଣୁ ପୁରୀ ସହରକୁ ବିକଶିତ କରାଯାଇ ଦେଶର ଏକ ପ୍ରମୁଖ ତୀର୍ଥାଟନ ବା ପର୍ଯ୍ୟଟନସ୍ଥଳି ଭାବରେ ଏହାର ବିକାଶ ପାଇଁ ସରକାର ସମ୍ପୂର୍ଣ ଯୋଜନା କରୁଛନ୍ତି । ପୁରୀ ହୋଟେଲ୍ ଆସୋସିଏସନ୍, ବୁଦ୍ଧିଜିବୀଙ୍କ ସହ ଏନେଇ ଆଲୋଚନା ହେବ । ଯେଭଳି ପ୍ରତିଦିନ ପୁରୀକୁ ଏକ ଲକ୍ଷରୁ ଅଧିକ ଭକ୍ତ ଓ ପର୍ଯ୍ୟଟକ ପୁରୀ ଆସି ପାରିବେ ସେନେଇ ସବୁ ଭିତ୍ତିଭୂମୀ ସରକାର କରିବେ । ଆଗାମୀ ଦିନରେ ପୁରୀ ଓଡ଼ିଶାର ଏକ ଆତିଥ୍ୟର କେନ୍ଦ୍ର ହୋଇ ଠିଆ ହେଉ । ସେହି ସ୍ଥିତିକୁ ନେବା ପାଇଁ ସରକାର ଯୋଜନା କରିଛନ୍ତି ।
20ରୁ ଧାଡି ଦର୍ଶନ ବ୍ୟବସ୍ଥା:
ମନ୍ତ୍ରୀ ଆହୁରି କହିଛନ୍ତି ‘ଆସନ୍ତା ୨୦ ତାରିଖରୁ ଶ୍ରୀମନ୍ଦିରରେ ଧାଡ଼ି ଦର୍ଶନ ବ୍ୟବସ୍ଥା କାର୍ଯ୍ୟକାରୀ କରାଯିବ ନେଇ ସବୁ ବ୍ୟବସ୍ଥା ହୋଇଛି । ଭକ୍ତମାନେ ମହାପ୍ରଭୁଙ୍କୁ ଭଲରେ ଦର୍ଶନ କରିପାରିବେ । ଶ୍ରୀମନ୍ଦିର ରତ୍ନଭଣ୍ଡାର ମରାମତି କାର୍ଯ୍ୟ ଧାର୍ଯ୍ୟ ସମୟରେ ସାରିବା ପାଇଁ ଏଏସଆଇ (ASI)କୁ କୁହାଯାଇଛି । ଏହି କାର୍ଯ୍ୟ ସରିବା ପରେ ମହାପ୍ରଭୁଙ୍କ ରତ୍ନ ଅଳଙ୍କାରର ଗଣତି କରାଯିବ । ଶ୍ରୀମନ୍ଦିର ପରିକ୍ରମା ମାର୍ଗରେ ବ୍ୟାଖ୍ୟାନ କେନ୍ଦ୍ର, ଗବେଷଣା କେନ୍ଦ୍ର, ଅନ୍ନ, ଘୃତ୍, ଜ୍ଞାନ ଓ ଯଜ୍ଞ ମଣ୍ଡପ ନିର୍ମାଣ ନେଇ ଡିପିଆର୍ ପ୍ରସ୍ତୁତ କରାଯାଉଛି । ବିଭିନ୍ନ ବ୍ୟକ୍ତି ବିଶେଷଙ୍କ ମତାମତ ନିଆଯାଇ ଏହାକୁ ଚୁଡାନ୍ତ କରାଯିବା ପରେ ଏହାକୁ କାର୍ଯ୍ୟକାରୀ କରାଯିବ ।"
ଭକ୍ତଙ୍କ ପାଇଁ ଅଭ୍ୟର୍ଥନା ଦାବି:
ପୁରୀ ସହରର ବୁଦ୍ଧିଜୀବୀ ଶ୍ରୀମନ୍ତ ଦାଶ କହିଛନ୍ତି, "ପୁରୀକୁ ଦୈନିକ ଏକ ଲକ୍ଷ ଭକ୍ତ ଓ ପର୍ଯ୍ୟଟକ ଆସିବା ଭଳି ବ୍ୟବସ୍ଥା କାର୍ଯ୍ୟକାରୀ କରାଯିବା ନେଇ ଆଇନ ମନ୍ତ୍ରୀ ଯେଉଁ ମତ ରଖିଛନ୍ତି ତାହା ବହୁତ ସ୍ବାଗତଯୋଗ୍ୟ । ଭକ୍ତ ଓ ପର୍ଯ୍ୟଟକ ପୁରୀକୁ ଅଧିକ ଆସିଲେ ରିକ୍ସା ବ୍ୟବସାୟୀ ଠାରୁ ଆରମ୍ଭ କରି ହୋଟେଲ୍ ମାଲିକମାନେ ମଧ୍ୟ ଫାଇଦା ପାଇବେ । ପୁରୀର ଅର୍ଥନୀତି ମଜଭୁତ । ଲୋକ ରୋଜଗାର ପାଇବେ । ତେବେ ଏକ ଲକ୍ଷ ଭକ୍ତ, ପର୍ଯ୍ୟଟକଙ୍କ ଆଗମନ ପାଇଁ ଭିତ୍ତିଭୂମୀ ସୁଦୃଢ ହେବ ଦରକାର । ଶ୍ରୀମନ୍ଦିର ଚାରିଦ୍ବାରା ଖୋଲିଥିଲେ ମଧ୍ୟ ଠିକରେ ଦର୍ଶନ ବ୍ୟବସ୍ଥା ହୋଇ ପାରୁନାହିଁ । ଫଳରେ ଭକ୍ତ ଅସନ୍ତୋଷ ପ୍ରକାଶ କରୁଛନ୍ତି । ତେଣୁ ସବୁ ଭକ୍ତ ଯେଭଳି ଭଲରେ ମହାପ୍ରଭୁଙ୍କ ଦର୍ଶନ ପାଇବେ, ସେ ଦିଗରେ ସ୍ବତନ୍ତ୍ର ବ୍ୟବସ୍ଥା ହେବା ଉଚିତ । ଭକ୍ତଙ୍କ ପାଇଁ ପୁରୀ ସହର ବ୍ୟାପକ ପାନୀୟ ଜଳ, ଟଏଲେଟ୍ ବ୍ୟବସ୍ଥା ହେବା ଦରକାର । ଭୁବନେଶ୍ବରରୁ ଅଧିକ ବସ ସ୍ୱଳ୍ପ ମୂଲ୍ୟରେ ଚାଲିବା ଆବଶ୍ୟକ । ପୁରୀ ସହରର ରାସ୍ତା ଘାଟ ସମ୍ପ୍ରସାରଣ ହେବା ଉଚିତ । ପୁରୀରେ ବିମାନବନ୍ଦରକୁ ଶୀଘ୍ର କାର୍ଯ୍ୟକାରୀ ଦରକାର । ଶ୍ରୀମନ୍ଦିର ନିକଟରେ ଭକ୍ତଙ୍କ ପାଇଁ ଅଭ୍ୟର୍ଥନା କେନ୍ଦ୍ର ହେବା ଉଚିତ । ଏହାଦ୍ଵାରା ଦର୍ଶନରେ ବିଳମ୍ବ ହେଲେ ଭକ୍ତମାନେ ଅଭ୍ୟର୍ଥନା କେନ୍ଦ୍ରରେ ବିଶ୍ରାମ ନେଇ ପାରିବେ ।"
୬ ଥାକିଆ ଧାଡ଼ି ଦର୍ଶନ ବ୍ୟବସ୍ଥା:
ଶ୍ରୀମନ୍ଦିର ବରିଷ୍ଠ ସେବାୟତ ଗଣେଶ୍ୱର ମହାସୁଆର କହିଛନ୍ତି, "ଶ୍ରୀମନ୍ଦିରରେ ଧାଡ଼ି ଦର୍ଶନ ବ୍ୟବସ୍ଥା କାର୍ଯ୍ୟକାରୀ ପାଇଁ ସରକାର ପଦକ୍ଷେପ ନେଉଛନ୍ତି । ମୋଟ ୬ ଥାକିଆ ଧାଡ଼ି ଦର୍ଶନ ବ୍ୟବସ୍ଥା ରହିବ । ପ୍ରଥମ ଧାଡିରେ ଦିବ୍ୟାଙ୍ଗ ଓ ବରିଷ୍ଠ ନାଗରିକ, ପରେ ମହିଳା ଓ ଅନ୍ୟ ବ୍ୟାରିକେଡ଼ ଅନ୍ୟ ଭକ୍ତଙ୍କୁ ଛଡ଼ା ଯିବାର ଯୋଜନା ରହିଛି । ଯେହେତୁ ନୂଆ ବର୍ଷରେ ଭିଡ଼ ରହିବ କୌଣସି ସମସ୍ୟା ଯେଭଳି ନ ହୁଏ ସେଥିପାଇଁ ଏହାକୁ ଆସନ୍ତା ୨୦ ତାରିଖରୁ ପରୀକ୍ଷା ମୂଳକ ଭାବେ କାର୍ଯ୍ୟକାରୀ କରାଯିବ । ଏହା ଏକ ସ୍ବାଗତଯୋଗ୍ୟ ପଦକ୍ଷେପ । ଧାଡ଼ି ଦର୍ଶନ ପାଇଁ ଅନ୍ୟାନ୍ୟ ଆନୁଷଙ୍ଗିକ ବ୍ୟବସ୍ଥା ହେବା ଉଚିତ୍ । ଶ୍ରୀମନ୍ଦିର ଚାରିଦ୍ବାରରେ ଭକ୍ତଙ୍କ ବସିବା ସହ ପାନୀୟ ଜଳ, ଅସ୍ଥାୟୀ ଶୌଚାଳୟ ବ୍ୟବସ୍ଥା ରହିବା ଉଚିତ । କାରଣ ଧାଡ଼ି ଦର୍ଶନ ଆରମ୍ଭ ହେଲେ ଦର୍ଶନରେ ବିଳମ୍ବ ହେବ । ତେଣୁ ଭକ୍ତମାନଙ୍କୁ ଅପେକ୍ଷା କରି ରହିବା ପାଇଁ ଅଭ୍ୟର୍ଥନା କେନ୍ଦ୍ର ରହୁ । ସେହିପରି ଏକ ସୁଲଭ ମୂଲ୍ୟରେ ଭକ୍ତମାନେ କିଭଳି ମହାପ୍ରସାଦ ପାଇବେ ସେ ଦିଗରେ ମଧ୍ୟ ସରକାର ପଦକ୍ଷେପ ନେବା ଉଚିତ ।"
ଭକ୍ତଙ୍କ ପ୍ରତିକ୍ରିୟା:
ଶ୍ରୀମନ୍ଦିରକୁ ଉତ୍ତର ପ୍ରଦେଶରୁ ଆସିଥିବା ଜଣେ ଭକ୍ତ ରାଜମର ତିୱାରୀ କହିଛନ୍ତି, ରାମ ଜନ୍ମଭୂମିରେ ଯେଉଁ ଦର୍ଶନ ବ୍ୟବସ୍ଥା ରହିଛି ତାହା ଶ୍ରୀମନ୍ଦିରରେ କାର୍ଯ୍ୟକାରୀ କରାଯାଉ । ରାଜ୍ୟ ସରକାରଙ୍କ ପକ୍ଷରୁ ଭଲ ବ୍ୟବସ୍ଥା ରହିଛି । ସ୍ଥାନୀୟ ପ୍ରଶାସନର ଅବହେଳା ଯୋଗୁ ଭଲରେ ଭକ୍ତମାନେ ଦର୍ଶନ କରିପାରୁନାହାନ୍ତି । ଶ୍ରୀମନ୍ଦିର ଭିତରେ ଧାଡ଼ି ଦର୍ଶନ ବ୍ୟବସ୍ଥା ହେବା ଉଚିତ । ମହିଳା ଓ ପୁରୁଷଙ୍କ ପାଇଁ ଅଲଗା ଧାଡ଼ି ବ୍ୟବସ୍ଥା ହେବା ଉଚିତ । ଏହି ବ୍ୟବସ୍ଥା ନଥିବାରୁ ଭକ୍ତମାନେ ଠେଲାପେଲାରେ ତଳେ ପଡିଯାଇ ଆହତ ହେଉଛନ୍ତି । ମୋର ପ୍ରଶାସନକୁ ଅନୁରୋଧ ଧାଡ଼ି ଦର୍ଶନ ବ୍ୟବସ୍ଥା କରାଯାଉ । ବହୁତ ଦୂରରୁ ବହୁତ ଭକ୍ତ ଟଙ୍କା ଖର୍ଚ୍ଚ କରି ମହାପ୍ରଭୁଙ୍କ ଦର୍ଶନ ପାଇଁ ଆସୁଛନ୍ତି । ଯଦି ଭକ୍ତଙ୍କୁ ଦର୍ଶନ ସଠିକ ଭାବରେ ମିଳି ନ ପାରିବ ତେବେ ଏଠାକୁ ଆସିବା କୌଣସି ଲାଭ ହେବନାହିଁ ।"
ଏହା ମଧ୍ୟ ପଢ଼ନ୍ତୁ...ନୂଆବର୍ଷରୁ ଶ୍ରୀମନ୍ଦିରରେ ଧାଡି ଦର୍ଶନ ବ୍ୟବସ୍ଥା, ଖୁବଶୀଘ୍ର ହେବ ଟ୍ରାଏଲ ରନ୍ ଏହା ମଧ୍ୟ ପଢ଼ନ୍ତୁ...ପୁରୀରେ ପ୍ରବାସୀଙ୍କ ଭିଡ, ମହାପ୍ରଭୁଙ୍କ ଦର୍ଶନ ସହ ନେଉଛନ୍ତି ଭ୍ରମଣ ମଜା |
ସେହିପରି ବେଙ୍ଗାଲୁରୁରୁ ଆସିଥିବା ଜଣେ ଭକ୍ତ ମୋନା ସିଂ କହିଛନ୍ତି, "ଶ୍ରୀମନ୍ଦିର ଭିତରେ ଦର୍ଶନ ବେଳେ ପ୍ରବଳ ଭିଡ଼ ହେଉଛି । ମହିଳାଙ୍କ ପାଇଁ କିଛି ସ୍ବତନ୍ତ୍ର ଲାଇନ ନାହିଁ । ମହିଳାମାନେ ଠେଲାପେଲାରେ ଦର୍ଶନ କରୁଛନ୍ତି । ମହିଳା, ବରିଷ୍ଠ ନାଗରିକମାନେ ତଳେ ପଡ଼ିଯାଉଥିବା ବେଳେ ସେମାନଙ୍କୁ ସହାୟତା ପାଇଁ କୌଣସି ବ୍ୟବସ୍ଥା ନାହିଁ । ଶ୍ରୀମନ୍ଦିରରେ ଶୃଙ୍ଖଳିତ ଦର୍ଶନ ପାଇଁ ମହିଳା, ବରିଷ୍ଠ ନାଗରିକମାନଙ୍କ ପାଇଁ ସ୍ବତନ୍ତ୍ର ଲାଇନର ଆବଶ୍ୟକ ରହିଛି । ଆମେ ବହୁତ୍ ଦୂରରୁ ମହାପ୍ରଭୁଙ୍କୁ ଦର୍ଶନ ପାଇଁ ଆସିଥିଲୁ । ହେଲେ ଶ୍ରୀମନ୍ଦିର ଭିତରେ ମାତ୍ର କିଛି ସେକେଣ୍ଡ ଠିଆ ହେବାକୁ ସୁଯୋଗ ମିଳିଲା । ଭକ୍ତଙ୍କୁ ଭଲରେ ଟିକେ ମହାପ୍ରଭୁଙ୍କ ଦର୍ଶନ ପାଇଁ ସରକାର ଓ ପ୍ରଶାସନ ପଦକ୍ଷେପ ନେବା ଉଚିତ ।"
ଇଟିଭି ଭାରତ, ପୁରୀ
