କୋରାପୁଟ: ବିକାଶ ଠାରୁ ଆଜି ବି ଅନେକ ଦୂରରେ ରହିଛି ଅପହଞ୍ଚ ଇଲାକା ବା ଆଦିବାସୀ ଅଞ୍ଚଳ । ଆଧୁନିକ ଯୁଗରେ ଶିକ୍ଷା ଏବଂ ସ୍ୱାସ୍ଥ୍ୟର ବେଶ ଗୁରୁତ୍ୱ ରହୁଥିବା ବେଳେ ଏଥିରୁ ବଞ୍ଚିତ ରହୁଛନ୍ତି ଆଦିବାସୀ ଲୋକେ । ବିଶେଷ କରି ଏହି ଅଞ୍ଚଳଗୁଡ଼ିକରେ ଝିଅ ମାନେ ଅନେକ ଅସୁବିଧାର ସମ୍ମୁଖୀନ ହୋଇଥାଆନ୍ତି । ଏପରି ପରିସ୍ଥିତିରେ ଏଠାକାର ଲୋକଙ୍କ ବିକାଶ, ସଚେତନ ଏବଂ ଶିକ୍ଷା ଓ ସ୍ୱାସ୍ଥ୍ୟ ଲାଗି ଅଣ୍ଟା ଭିଡିଛନ୍ତି ଅନେକ ସାମାଜିକ କର୍ମୀ ।
ପ୍ରତି ଗାଁରେ ପରିବାରକୁ ଫୋକସ କରି କିଶୋରୀ ମାନଙ୍କ ବିକାଶ କରିବା ଦିଗରେ ଏକ କାର୍ଯ୍ୟକ୍ରମ ଆୟୋଜନ କରାଯାଇଥିଲା । କୋରପୁଟ ଜିଲ୍ଲାର ଲକ୍ଷ୍ମୀପୁର ବ୍ଲକର ୮ଟି ଗାଁକୁ ନେଇ ଖୁଦିପଦର ଠାରେ ଏକ ମହିଳା ନେତୃତ୍ୱ ସଂଗଠନ ୱାର୍ଡ ଦ୍ୱାରା ଏକ କାର୍ଯ୍ୟକ୍ରମରେ ଆୟୋଜିତ ହୋଇଥିଲା । ଏଥିରେ ସମାଜ ସେବୀ ଏବଂ ଅନ୍ତର୍ଜାତୀୟ ସ୍ତରରେ ମାନ୍ୟତା ଲାଭ କରିଥିବା ଜୟନ୍ତୀ ବୁରୁଦା ଏବଂ ପାରମ୍ପରିକ ବିହନ ସଂରକ୍ଷଣ ପାଇଁ ଅନ୍ତର୍ଜାତୀୟ ମାନ୍ୟତା ପାଇଥିବା ଜୟପୁରର ଅଷ୍ଟମ ଶ୍ରେଣୀୟ ଛାତ୍ରୀ ହର୍ଷିତା ପ୍ରିୟଦର୍ଶିନୀ ମହାନ୍ତି ସାମିଲ ହୋଇଥିଲେ । ଏଥିରେ ଉଭୟ ସାମିଲ ହୋଇ କିଶୋରୀ ଝିଅଙ୍କୁ ଶିକ୍ଷାର ବିକାଶ ଉପରେ ଆଲୋକପାତ କରିବା ସହ ସେମାନଙ୍କୁ ପ୍ରୋତ୍ସାହିତ କରିଥିଲେ ।
ବାଳିକାମାନଙ୍କ ପାଇଁ ଜୀବନ ଏବଂ ଜୀବିକା କୌଶଳ ଶିଖିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ କାରଣ ଏହା ସେମାନଙ୍କୁ ଜୀବନର ବିଭିନ୍ନ ଦିଗକୁ ସ୍ଵାଧୀନ ଭାବରେ ଚଳାଇବା, ଆର୍ଥିକ ସ୍ଵାଧୀନତା, ଆତ୍ମବିଶ୍ୱାସ ବଢ଼ାଇବା ଏବଂ ସେମାନଙ୍କ ପରିବାର ଏବଂ ସମ୍ପ୍ରଦାୟରେ ସକରାତ୍ମକ ଯୋଗଦାନ କରିବାରେ ସକ୍ଷମ କରିଥାଏ ବୋଲି ଓଡ଼ିଶାର ମାଲକାନଗିରି ଜିଲ୍ଲାର ୨୦୨୪ ଫୋର୍ବସ୍ ଇଣ୍ଡିଆ ଡବ୍ଲୁ-ପାୱାର ତାଲିକାରେ ଭାରତର ୨୩ ଜଣ ସ୍ୱୟଂ ନିର୍ମିତ ମହିଳାଙ୍କ ତାଲିକାରେ ସ୍ଥାନ ପାଇଥିବା ବିଶିଷ୍ଟ ମହିଳା ସାମାଜିକ କର୍ମୀ ଜୟନ୍ତୀ ବୁରୁଦା କହିଛନ୍ତି । ଏଥିରେ ସେ ୪୦ ଜଣ ଆଦିବାସୀ ଝିଅଙ୍କ ସହ କଥା ହୋଇ ଅନୁପ୍ରାଣିତ କରିଥିଲେ ।
ସେ ଆହୁରି କହିଛନ୍ତି, ଆଜି ବି ଅନେକ ଅଞ୍ଚଳର ଝିଅମାନେ ପଛୁଆ ରହିଛନ୍ତି । ଏହି କାର୍ଯ୍ୟକ୍ରମ ଗୁଡ଼ିକ ଦ୍ୱାରା ସେମାନେ କେବଳ ବ୍ୟକ୍ତିଗତ ବିକାଶକୁ ପ୍ରୋତ୍ସାହିତ କରନ୍ତି ନାହିଁ ବରଂ ଲିଙ୍ଗଗତ ପ୍ରତିବନ୍ଧକକୁ ଭାଙ୍ଗିବା ଏବଂ ଲିଙ୍ଗଗତ ସମାନତାକୁ ପ୍ରୋତ୍ସାହିତ କରନ୍ତି । ଏଥିସହ ଏହା ଝିଅ ମାନଙ୍କ କିଶୋର ଅବଧି ନୂତନତ୍ଵର ଆହ୍ୱାନ ଦେବା ସହ ସୁଯୋଗ ଉପସ୍ଥାପନ କରେ । ଚ୍ୟାଲେଞ୍ଜ ଗୁଡିକ ଶାରୀରିକ ଏବଂ ଭାବଗତ ପରିବର୍ତ୍ତନ, ସାଥୀ ଚାପ, ଏବଂ ପରିଚୟ ବିକାଶକୁ ନେଭିଗେଟ୍ କରିବା ଅନ୍ତର୍ଭୁକ୍ତ କରେ । ଅବଶ୍ୟ, ଏହି ଅବଧି ବ୍ୟକ୍ତିଗତ ଅଭିବୃଦ୍ଧି, ଆଗ୍ରହ ଏବଂ ପ୍ରତିଭା ଆବିଷ୍କାର, ବନ୍ଧୁତା ଗଢିବା ଏବଂ ସ୍ୱାଧୀନତା ଏବଂ ସ୍ଥିରତା ପାଇଁ ସୁଯୋଗ ମଧ୍ୟ ପ୍ରଦାନ କରେ । ଶିକ୍ଷା ଏକ ସକରାତ୍ମକ ଆଦର୍ଶ ଯୋଗାଇ ଝିଅମାନଙ୍କୁ ଏହି ଚ୍ୟାଲେଞ୍ଜ ଗୁଡିକୁ ପରିଚାଳନା କରିବାରେ ସାହାଯ୍ୟ କରିପାରିବ ବୋଲି ଜୟନ୍ତୀ କହିଛନ୍ତି ।
ସେହିପରି ସ୍ଥାୟୀ କୃଷି ପାଇଁ ପାରମ୍ପରିକ ବିହନ ସଂରକ୍ଷଣ ତଥା ସମାଜରେ ଗୁଣାତ୍ମକ ଖାଦ୍ୟ ବ୍ୟବହାରରେ କିଶୋରୀ ବାଳିକାମାନେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରନ୍ତି ବୋଲି ପାରମ୍ପରିକ ବିହନ ସଂରକ୍ଷଣ ପାଇଁ ଅନ୍ତର୍ଜାତୀୟ ମାନ୍ୟତା ପାଇଥିବା ଜୟପୁରରେ ଅଷ୍ଟମ ଶ୍ରେଣୀ ଛାତ୍ରୀ ହର୍ଷିତା ପ୍ରିୟଦର୍ଶିନୀ ମହାନ୍ତି କହିଛନ୍ତି । ସେ ଏଠାରେ ପାରମ୍ପରିକ ବିହନ ସଂରକ୍ଷଣର ମହତ୍ଵ ବିଷୟରେ ସଚେତନତା ସୃଷ୍ଟି କରିବା ସହ ବିହନ ସଂରକ୍ଷଣ, ସମ୍ପ୍ରଦାୟର ବିହନ ବ୍ୟାଙ୍କ ଏବଂ ଶିକ୍ଷାଗତ ପଦକ୍ଷେପ ଭଳି କାର୍ଯ୍ୟକଳାପରେ ସୋମାନେ ନିୟୋଜିତ ହୋଇପାରିବେ ବୋଲି ସେ କହିଛନ୍ତି ।
ଅନ୍ୟପଟେ ଜୈବ ବିବିଧତାକୁ ସୁରକ୍ଷିତ ରଖିବା ଏବଂ ସ୍ୱାସ୍ଥ୍ୟକର ଖାଦ୍ୟ ପସନ୍ଦକୁ ପ୍ରୋତ୍ସାହିତ କରି ସେମାନେ ଭବିଷ୍ୟତ ପିଢ଼ି ପାଇଁ ଅଧିକ ସ୍ଥାୟୀ ଏବଂ ସୁସ୍ଥ ଖାଦ୍ୟ ବ୍ୟବସ୍ଥାରେ ଯୋଗଦାନ କରନ୍ତି ବୋଲି ଅନ୍ତର୍ଜାତୀୟ ସ୍ତରରେ ଖ୍ୟାତି ସମ୍ପନ୍ନ ତାଲିମଦାତା ରାମକୃଷ୍ଣ ସୁରଦେବ ଜଣାଇଛନ୍ତି । କିଶୋରୀ ବାଳିକାମାନଙ୍କୁ ସେମାନଙ୍କ ପରିବାରର ଏକ ଅଂଶ ଭାବରେ ସୁଗମ କରିବା ପାଇଁ ଏହି କାର୍ଯ୍ୟକ୍ରମ ଲିନସି ଫାଉଣ୍ଡେସନ ସହଯୋଗରେ ଆରମ୍ଭ କରାଯାଇଛି ବୋଲି ୱାର୍ଡର ମୁଖ୍ୟ କାର୍ଯ୍ୟକର୍ତ୍ତା ପ୍ରୀତମୟୀ ଦାସ କହିଛନ୍ତି ।
ଏହା ମଧ୍ୟ ପଢନ୍ତୁ: ଆଦିବାସୀ ମହିଳାଙ୍କ ପାଇଁ ମାର୍ଗଦର୍ଶିକା ଜୟନ୍ତୀ ବୁରୁଦା, ଫୋର୍ବସରେ ସ୍ଥାନ ପାଇ ରାଜ୍ୟକୁ କଲେ ଗର୍ବିତ
କୋରାପୁଟ, ଇଟିଭି ଭାରତ
