ଭୁବନେଶ୍ୱର: ପ୍ରି-ରଜରେ ବା ଜୁନ ୭ରେ ରିଲିଜ ହେବ ଓଡ଼ିଆ ଫିଲ୍ମ 'ଟିକେ ଟିକେ ଅଚିହ୍ନା ତୁ' । ଏହି ଫିଲ୍ମରେ ଲୋକପ୍ରିୟ ଓଡ଼ିଆ ତାରକା ସ୍ୱରାଜ ବାରିକ ଏବଂ ଭୂମିକା ଦାଶଙ୍କୁ ପୁଣିଥରେ ପରଦାରେ ଏକାଠି ଦେଖିବାକୁ ମିଳିବ । ତେବେ ଏହି ଫିଲ୍ମରେ ପୁଣି ଏହି ଯୋଡିକୁ ଦେଖିବାକୁ ଫ୍ୟାନ୍ସ ଉତ୍ସାହିତ ରହିଛନ୍ତି । ଏଥିସହ ଏହି ଫିଲ୍ମ ରଜ ମାହୋଲରେ ରିଲିଜ ହେବାକୁ ଥିବା ବେଳେ ଦର୍ଶକଙ୍କୁ ନିଶ୍ଚୟ ମନକୁ ଛୁଇଁବ ବୋଲି ଫିଲ୍ମର ପୁରା ଟିମ ଆଶାବାଦୀ ରହିଛନ୍ତି ।
'ଟିକେ ଟିକେ ଅଚିହ୍ନା ତୁ' କାହାଣୀ
ଆମର ଷ୍ଟୁଡିଓ ଓ ଡିକେ ମୁଭି ବ୍ୟାନରରେ ଚଳଚ୍ଚିତ୍ରଟି ପ୍ରସ୍ତୁତ ହୋଇଥିବା ବେଳେ ଫାମିଲି ଡ୍ରାମା ଲଭ ରୋମାନ୍ସ ସହ ଭରପୁର ମନୋରଞ୍ଜନକୁ ନେଇ ଗତିଶୀଳ ହୋଇଛି । ଏଥିରେ ତ୍ରିକୋଣୀୟ ଲଭଷ୍ଟୋରୀ ମଧ୍ୟ ଦେଖିବାକୁ ମିଳିବ । ତେବେ ଏହି ଫିଲ୍ମଟି ଯୁବ ପିଢିଙ୍କ ଜୀବନଚର୍ଯ୍ୟା ଓ ପରିବାରର ମୂଲ୍ୟକୁ ନେଇ ଗତିଶୀଳ ହୋଇଥିବା ବେଳେ ସବୁ ଗୀତ ଗୁଡିକ ବେଶ ସୁନ୍ଦର ହୋଇଛି ।
'ଟିକେ ଟିକେ ଅଚିହ୍ନା ତୁ' ଫିଲ୍ମର ଷ୍ଟାରକାଷ୍ଟ
ଏହି ଫିଲ୍ମରେ କେବଳ ଯେ ଭୂମିକା ଏବଂ ସ୍ୱରାଜ ନୁହଁ ବରଂ ଅନ୍ୟତମ ନାୟକ ଶୁଭମଙ୍କୁ ମୁଖ୍ୟ ଚରିତ୍ରରେ ଦେଖିବାକୁ ମିଳିବ । ତ୍ରିକୋଣୀୟ ପ୍ରେମ କାହାଣୀକୁ ନେଇ ଫିଲ୍ମଟି ନିର୍ମିତ ହୋଇଥିବା ବେଳେ ଗୀତ ମଧ୍ୟ ସାନଦାର ରହିଛି । ତେବେ ଲୋକପ୍ରିୟ ଗୀତିକାର ପ୍ରେମ ଆନନ୍ଦ ଗୀତଗୁଡିକୁ ଲେଖିଥିବା ବେଳେ ଗୀତ ସହ ଦମଦାର କାହାଣୀକୁ ନେଇ ରଜରେ ଫିଲ୍ମଟି ରାଜ କରିବ ବୋଲି କହିଛି ପ୍ରଯୋଜନା ସଂସ୍ଥା । ଫିଲ୍ମର ନିର୍ଦ୍ଦେଶନା ଦେଇଛନ୍ତି ତାପସ ସରଗରିଆ । ଆମର ଷ୍ଟୁଡିଓ ଏବଂ ଆନ୍ନା ପ୍ରଡକ୍ସନ ବ୍ୟାନରରେ ଫିଲ୍ମଟି ନିର୍ମିତ ହୋଇଛି । ସେହିପରି ସିନେମାର କାହାଣୀ, ଚିତ୍ରନାଟ୍ୟ ଏବଂ ସଂଳାପ ଲେଖିଛନ୍ତି ଭରଦ୍ୱାଜ ପଣ୍ଡା ।
ପୂର୍ବରୁ ମଧ୍ୟ ଏହି ଫିଲ୍ମରେ ସ୍ୱରାଜ-ଭୂମିକା ନଜର ଆସିଥିଲେ
'ଟିକେ ଟିକେ ଅଚିହ୍ନା ତୁ' ଏହି ଫିଲ୍ମ ପୂର୍ବରୁ ଭୂମିକା ଦାଶ ଏବଂ ସ୍ୱରାଜ ବାରିକଙ୍କ ଯୋଡି ବେଶ ଲୋକପ୍ରିୟ ହାସଲ କରିଥିଲେ । ଉଭୟ ୨୦୧୭ରେ ରିଲିଜ ହୋଇଥିବା ଫିଲ୍ମ 'ତୁ ମୋ ଲଭ ଷ୍ଟୋରୀ' ସହ ପ୍ରଥମ ଥର ପାଇଁ ପରଦାରେ ଏକାଠି ନଜର ଆସିଥିଲେ । ଏହି ଫିଲ୍ମ ଦର୍ଶକଙ୍କ ବେଶ ମନ ଜିତିଥିଲା । ଏହା ପରେ ଉଭୟ ପୁଣି 'ତୁ ମୋ ଲଭ ଷ୍ଟୋରୀ ୨'ରେ ନଜର ଆସିଥିଲେ । ଏହି ଫିଲ୍ମ ମଧ୍ୟ ହିଟ ହେବା ସହ ଲୋକପ୍ରିୟତା ହାସଲ କରିଥିଲା । ତେବେ ଏହି ଯୋଡିଙ୍କ ଫିଲ୍ମ 'ଟିକେ ଟିକେ ଅଚିହ୍ନା ତୁ' ମଧ୍ୟ ପୁଣି ସୁପରହିଟ ହେବ ବୋଲି ନିର୍ମାତା ଆଶାବାଦୀ ରହିଛନ୍ତି ।
ଏହା ମଧ୍ୟ ପଢନ୍ତୁ: ରଜରେ ଧମାକା କରିବେ ବାବୁସାନ, ରିଲିଜ ହେବ ଓଡ଼ିଆ ଫିଲ୍ମ 'ପାବାର'
ଇଟିଭି ଭାରତ, ଭୁବନେଶ୍ୱର
