ବଲାଙ୍ଗୀର: ସଇଁତଳାରେ ବୁଲା କୁକୁରଙ୍କ ଦୌରତ୍ମ୍ୟ । କୁକୁର କାମୁଡାରେ 17 ଜଣ ଆହତ ହୋଇଛନ୍ତି । ସେମାନଙ୍କ ମଧ୍ୟରୁ 7 ଜଣଙ୍କ ଅବସ୍ଥା ଗୁରୁତର ରହିଛି । ସେମାନଙ୍କୁ ବଲାଙ୍ଗୀରର ଏମସିଏଚରେ ଭର୍ତ୍ତି କରାଯାଇଛି ।
ବୁଲା କୁକୁର ଆତଙ୍କ:
ବଲାଙ୍ଗୀର ସଇଁତଳା ଗ୍ରାମରେ ବୁଲା କୁକୁର ଆତଙ୍କ ଦେଖିବାକୁ ମିଳିଛି । ଗୋଟିଏ ବୁଲା କୁକୁର କାମୁଡ଼ାରେ ଏଠିକାର 17 ଜଣ ଆହତ ହୋଇଛନ୍ତି । ଆହତଙ୍କ ମଧ୍ୟରେ ମହିଳା ଓ ଶିଶୁ ମଧ୍ୟ ଥିବାର ଜଣାପଡ଼ିଛି । ତେବେ ଗତରାତି(ଶନିବାର)ରେ ସଇଁତଳା ଅଞ୍ଚଳର ଚରଚରା, ପିପ୍ରୁଟ, ଡୁମାଳ ପଡ଼ାରେ ଏକ ବୁଲା କୁକୁର ସମସ୍ତଙ୍କୁ କାମୁଡିଛି । ଯେଉଁଥିରେ ମୋଟ 17 ଜଣ ଆହତ ହୋଇଛନ୍ତି । ଆହତ ମଧ୍ୟରେ ଦୁଇ ଶିଶୁ ମଧ୍ୟ ଅଛନ୍ତି । ସେପଟେ ସମସ୍ତ ଆହତଙ୍କ ଚିକିତ୍ସା ସଇଁତଳା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର କରାଯାଇଥିଲା । ଏଥିରେ ସାତ ଜଣ ଗୁରୁତର ଥିବାରୁ ସେମାନଙ୍କୁ ବଲାଙ୍ଗୀର ଭୀମ ଭୋଇ ମେଡିକାଲ୍ କଲେଜ ଡାକ୍ତରଖାନାରେ ଭର୍ତ୍ତି କରାଯାଇଛି ।
ଯାହାକୁ ପାଇଲା ତାକୁ କାମୁଡିଲା ବୁଲା କୁକୁର:
ଗୋଟିଏ ବୁଲା କୁକୁର ସମଗ୍ର ଅଞ୍ଚଳରେ ଆତଙ୍କ ଖେଳାଇଥିଲା ଦେଖିବାକୁ ମିଳିଛି । ଗୋଟିଏ ଦିନରେ କିଛି ଘଣ୍ଟା ମଧ୍ୟରେ ବୁଲା କୁକୁରର ଦୌରାତ୍ମ୍ୟ ଏଠି ଦେଖିବାକୁ ମିଳିଥିବା ବେଳେ ତା ସମ୍ମୁଖରେ ଯିଏ ପଡ଼ିଲା ତାକୁ କୁକୁର କାମୁଡି ଚାଲିଥିଲା । ସାଧାରଣରେ ଏହାକୁ ନେଇ ଭୟ ଥିବା ବେଳେ ସଂପୃକ୍ତ କୁକୁରକୁ କାବୁ କରିବାକୁ ଲୋକେ ଦାବି କରିଛନ୍ତି । ସେହିପରି ଏହି ଅଞ୍ଚଳରେ ବୁଲା କୁକୁରଙ୍କ ସଂଖ୍ୟା ବଢ଼ି ଚାଲିଥିବା ବେଳେ ନୀତି ଦିନ ଲୋକେ କୁକୁର କାମୁଡ଼ାରେ ଆହତ ହେଉଥିବାର ଅଭିଯୋଗ ହୋଇଛି । ତେଣୁ ଏଠି ବୁଲା କୁକୁରଙ୍କ ବଂଶ ବୃଦ୍ଧି ରୋକିବାକୁ ମଧ୍ୟ ଦାବି ଉଠିଛି । ସେପଟେ ଏହି ଘଟଣାକୁ ନେଇ ଏଯାଏଁ କୌଣସି ପ୍ରଶାସନିକ ପ୍ରତିକ୍ରିୟା ମିଳିପାରିନାହିଁ । ଅନ୍ୟପଟେ ପ୍ରଶାସନ ଏହାକୁ ନେଇ ଶୀଘ୍ର ପଦକ୍ଷେପ ନେବ ଆଶା କରାଯାଉଛି ।
ଇଟିଭି ଭାରତ, ବଲାଙ୍ଗୀର
