ପୁରୀରେ ବଢୁଛି ଅପରାଧ, ନିର୍ବାଚନୀ ହିଂସା ରୋକିବାକୁ ବସ୍ତିରେ ସୁରକ୍ଷା ଦାବି - Security Demand For Slum Areas

Security Demand For Slum Areas: ପୁରୀରେ ଅପରାଧ ବଢିଚାଲିଥିବାବେଳେ ନିର୍ବାଚନ ସମୟରେ ଶାନ୍ତି ଶୃଙ୍ଖଳା ରକ୍ଷା ଏକ ବଡ଼ ଚ୍ୟାଲେଞ୍ଜ ହୋଇଛି । ତେଣୁ ଏ ଦିଗରେ ପୋଲିସ ସ୍ବତନ୍ତ୍ର ପଦକ୍ଷେପ ନେବାକୁ ବୁଦ୍ଧିଜୀବୀ ପରାମର୍ଶ ଦେଇଛନ୍ତି । ଅଧିକ ପଢନ୍ତୁ

ପୁରୀ: ବସ୍ତି ଅଞ୍ଚଳରେ ପୋଲିସ ପକ୍ଷରୁ ସ୍ଵତନ୍ତ୍ର ଡ୍ରାଇଭ ପାଇଁ ଦାବି । ନିର୍ବାଚନ ସମୟରେ ଶାନ୍ତି ଶୃଙ୍ଖଳା ରକ୍ଷା ଏକ ବଡ଼ ଚ୍ୟାଲେଞ୍ଜ ହୋଇଛି । ପୁରୀ ଜିଲ୍ଲାରେ ନିର୍ବାଚନକୁ ଶାନ୍ତି ଶୃଙ୍ଖଳାରେ ପରିଚାଳନା କରିବା ପାଇଁ ପୋଲିସ ପକ୍ଷରୁ ସ୍ବତନ୍ତ୍ର ପଦକ୍ଷେପ ନେବାକୁ ବୁଦ୍ଧିଜୀବୀ ପରାମର୍ଶ ଦେଇଛନ୍ତି । ବିଶେଷ କରି ପୁରୀ ସହରାଞ୍ଚଳରେ ଥିବା ବିଭିନ୍ନ ବସ୍ତି ଗୁଡ଼ିକ ଉପରେ ପୋଲିସ କଡ଼ା ନଜର ରଖିବାକୁ ପରାମର୍ଶ ଦେଇଛନ୍ତି ବୁଦ୍ଧିଜୀବୀ । "ନିର୍ବାଚନ ସମୟରେ ଅପରାଧୀମାନେ ବିଭିନ୍ନ ଅପରାଧିକ କାର୍ଯ୍ୟ କରିବା ପାଇଁ ବସ୍ତିଗୁଡ଼ିକୁ ସୁରକ୍ଷିତ ସ୍ଥାନ ଭାବେ ବାଛିଥାନ୍ତି । ସେଠାରେ ବିଭିନ୍ନ ମାରଣାସ୍ତ୍ର ଲୁଚାଇ ରଖିବା ସହ ବିଭିନ୍ନ ପ୍ରକାର ନିଶା ସାମଗ୍ରୀ ମଧ୍ୟ ମହଜୁଦ କରି ରଖିଥାନ୍ତି । ଯାହାକୁ ବ୍ୟବହାର କରି ନିର୍ବାଚନ ସମୟରେ ଗଣ୍ଡଗୋଳ ସୃଷ୍ଟି କରିଥାନ୍ତି । ବିଭିନ୍ନ ଥାନା ଅଧୀନରେ ଥିବା ବସ୍ତି ଗୁଡ଼ିକୁ ପୋଲିସ ପକ୍ଷରୁ ନିୟମିତ ବ୍ୟବଧାନରେ ଚଢ଼ାଉ କରାଯିବା ସହ ବାହାରୁ ଆସି ରହୁଛନ୍ତି ତାହାର ତାଲିକା ମଧ୍ୟ ପୋଲିସ ପାଖରେ ରହିବା ଉଚିତ । ସେହିପରି ଯଦି କୌଣସି ଅସାମାଜିକ ତତ୍ତ୍ଵ କିଛି କାର୍ଯ୍ୟ କରୁଥାନ୍ତି ତୁରନ୍ତ ପୋଲିସକୁ ଖବର ଦେବା ପାଇଁ ପ୍ରତି ବସ୍ତି ଅଞ୍ଚଳରେ ପୋଲିସ ପକ୍ଷରୁ ଗୁପ୍ତଚର ରଖାଯିବା ଉଚିତ୍" କହିଛନ୍ତି ବୁଦ୍ଧିଜୀବୀ ।

ପୁରୀ ଏସପି ପିନାକ ମିଶ୍ର କହିଛନ୍ତି, "ବସ୍ତି ଅଞ୍ଚଳରେ ସ୍ବତନ୍ତ୍ର ନଜର ରଖିବା ପାଇଁ ଏବଂ ନିଶା କାରବାର ଉପରେ ରୋକ ଲଗାଇବା ପାଇଁ ଉଭୟ ପୋଲିସ ଏବଂ ଅବକାରୀ ବିଭାଗ ପକ୍ଷରୁ ମିଳିତ ଭାବେ ନିୟମିତ ବ୍ୟବଧାନରେ ଚେକିଙ୍ଗ କରାଯାଉଛି ।‌ ତେବେ ଆଦର୍ଶ ଆଚରଣ ବିଧି ଲାଗୁ ହେବା ପରଠାରୁ ପୋଲିସ ଏବଂ ଅବକାରୀ ବିଭାଗ ମୋଟ ୪ ହଜାର ୬୭୫ ଲିଟର ଦେଶୀ ଓ ବିଦେଶୀ ମଦ ଜବତ କରିସାରିଛି । ସହରାଞ୍ଚଳରେ ବିଭିନ୍ନ ବସ୍ତି ଗୁଡ଼ିକ ଉପରେ କଡ଼ା ନଜର ରଖାଯାଇଥିବାବେଳେ ବିଭିନ୍ନ ବ୍ଲକ ଅଞ୍ଚଳରେ ସ୍ବତନ୍ତ୍ର ଟିମ ଗଠନ କରାଯାଇ ଚୋରା ମଦ କାରବାର ଉପରେ ରୋକ ଲଗାଯାଉଛି । ଅପରାଧ ମୂଳକ କାର୍ଯ୍ୟକୁ ଦମନ କରିବା ପାଇଁ ୨୪ ଘଣ୍ଟିଆ ପାଟ୍ରୋଲିଂ ଗାଡି ରହିଛି ।"

ଯଦି କୌଣସି ଅଞ୍ଚଳରେ ନିଶା କାରବାର କିମ୍ବା ଅପରାଧୀକ ବ୍ୟକ୍ତି ମାନେ ଅପରାଧିକ କାର୍ଯ୍ୟକଳାପ ନେଇ ଯୋଜନା କରିଛନ୍ତି ତୁରନ୍ତ ସ୍ଥାନୀୟ ଥାନାରେ ତୁରନ୍ତ ଖବର ଦେବାକୁ ପୁରୀ ଏସପି ଜନସାଧାରଣଙ୍କୁ ନିବେଦନ କରିଛନ୍ତି । ପୁରୀ ଜିଲ୍ଲାରେ ନିର୍ବାଚନ ଆଚରଣବିଧି ଲାଗୁ ହେବା ପରେ ୬ଟି ନିର୍ବାଚନ ମଣ୍ଡଳୀରେ ମୋଟ ୨୦ଟି ଫ୍ଲାଇଙ୍ଗ ସ୍କ୍ୱାଡ୍ ବିଭିନ୍ନ ବେଆଇନ କାର୍ଯ୍ୟକଳାପ ଉପରେ ନଜର ରଖିବା ପାଇଁ ୨୪ ଘଣ୍ଟିଆ କାର୍ଯ୍ୟ କରୁଛନ୍ତି ।‌ ତେବେ ଗତ କିଛିଦିନ ହେବ ପୁରୀ ସହରରେ ଦୁଇ ଦୁଇଟି ବୋମାମାଡ ଏବଂ ଏକ ହତ୍ୟାକାଣ୍ଡ ଘଟିଥିବାବେଳେ ଅପରାଧିକ କାର୍ଯ୍ୟକଳାପ ଉପରେ ନିୟନ୍ତ୍ରଣ ପାଇଁ ପୋଲିସ ଆହୁରି ବ୍ୟାପକ ଭାବେ କାର୍ଯ୍ୟ କରିବାକୁ ଦାବି ହୋଇଛି ।

ଇଟିଭି ଭାରତ, ପୁରୀ