ରାଉରକେଲା: ଶାବଳରେ ପିଟି ବାପାଙ୍କୁ ହତ୍ୟା କରିଛି ନାବାଳକ ପୁଅ । ଘରୋଇ କଳିକୁ କେନ୍ଦ୍ରକରି ଏହି ଅଘଟଣ ଘଟିଥିବା ସୂଚନା ମିଳିଛି । ଏହି ଘଟଣା ଜଣାପଡ଼ିବା ପରେ ସୁନ୍ଦରଗଡ଼ ଜିଲ୍ଲାରେ ଚାଞ୍ଚଲ୍ୟ ସୃଷ୍ଟି ହୋଇଛି । ତେବେ ମୃତକ ଜଣଙ୍କ ହେଲେ ସୁନ୍ଦରଗଡ଼ ଜିଲ୍ଲାର ନୂଆଗାଁ ବ୍ଲକ ହାତୀବାରି ଥାନା କୋକେରମା ପଞ୍ଚାୟତ ଅନ୍ତର୍ଗତ ସାହୁ ବସ୍ତିର କବରା କୁଲୁ । ତାଙ୍କ ବୟସ ୫୫ ବର୍ଷ । ତେବେ ଟଙ୍କା ଉଠାଣକୁ ନେଇ ବାପ, ପୁଅଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା । ପରେ ନାବାଳକ ପୁଅ ଉତ୍ତେଜିତ ହୋଇ ତାର ବାପା କବରାଙ୍କୁ ଶାବଳରେ ଆକ୍ରମଣ କରିଥିଲା । ଶାବଳ ମାଡ଼ରେ କବରା ତଳେ ବେହୋସ ହୋଇ ପଡିଯିବା ପରେ ନାବାଳକ ପୁଅ ତାଙ୍କ ମୁଣ୍ଡ ଓ ମୁହଁକୁ ପଥରରେ ଛେଚି ଛେଚି ହତ୍ୟା କରିଥିବା ସୂଚନା ମିଳିଛି ।
ଖବର ପାଇ ହାତୀବାରି ପୋଲିସ ଓ ସାଇଣ୍ଟିଫିକ୍ ଟିମ୍ ଘଟଣାସ୍ଥଳରେ ପହଞ୍ଚିଥିଲେ । ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ହାତୀବାରି ଡାକ୍ତରଖାନାକୁ ପଠାଇଥିଲା । ଅଭିଯୁକ୍ତ ପୁଅକୁ ପୋଲିସ ଥାନାରେ ଅଟକ ରଖିଥିବା ଜଣାପଡ଼ିଛି । ମୃତକଙ୍କ ଭାଇ ଜନ୍ କୁଲୁ ଥାନାରେ ଦେଇଥିବା ଏତଲା ଅନୁଯାୟୀ, କବରା ଗୁଜୁରାଟକୁ କାମ ପାଇଁ ଯାଇଥିଲେ । ସେ ସେଠାରୁ ରୋଜଗାର କରିଥିବା ଲକ୍ଷେ ଟଙ୍କା ନିଜ ସ୍ତ୍ରୀ ଗୁମୁଲାଙ୍କ ବ୍ୟାଙ୍କ ଆକାଉଣ୍ଟକୁ ପଠାଇଥିଲେ । ଏହାପରେ ନିଜେ ଗାଁକୁ ଫେରି ଆସିଥିଲେ । ଏଠାରେ ଶ୍ରମିକ କାମ କରି ପରିବାର ପୋଷଣ କରୁଥିଲେ । କିଛିଦିନ ପରେ ସେ ତାଙ୍କ ସ୍ତ୍ରୀଙ୍କୁ ପଠାଇଥିବା ଟଙ୍କା ମାଗିଥିଲେ । ପତ୍ନୀ ଟଙ୍କା ଦେଉ ନଥିବାରୁ ପ୍ରତିଦିନ ରାତିରେ ଘରେ ଗଣ୍ଡଗୋଳ ହେଉଥିଲା ।
