ଭୁବନେଶ୍ବର/ଗଞ୍ଜାମ : ବିଜେଡି ପାଇଁ ଖଲ୍ଲିକୋଟରେ ବଢିଲା ଅଡୁଆ । ସୂର୍ଯ୍ୟମଣୀ ବୈଦଙ୍କୁ ପ୍ରାର୍ଥୀ କରିବା ପରେ ବିଜେପିରେ ସାମିଲ ହେଲେ ପୂର୍ବତନ ବିଧାୟିକା ତଥା ରାଣୀ ସ୍ବର୍ଗତ ସୁଜ୍ଞାନ କୁମାରୀ ଦେଓଙ୍କ ଶତାଧିକ ସମର୍ଥକ । ଖଲ୍ଲିକୋଟ ବ୍ଲକ ଉପାଧ୍ୟକ୍ଷଙ୍କ ସମେତ ଏକାଧିକ ପଞ୍ଚାୟତର ସରପଞ୍ଚ ନିଜ ନିଜର ସମର୍ଥକଙ୍କ ସହ ଆଜି ବିଜେପିରେ ସମିଲ ହୋଇଛନ୍ତି । ରାଜ୍ୟ ବିଜେପି କାର୍ଯ୍ୟଳୟରେ ଦଳର ରାଜ୍ୟ ସଭାପତି ମନମୋହନ ସାମଲ, ବ୍ରହ୍ମପୁର ସାଂସଦ ପ୍ରାର୍ଥୀ ପ୍ରଦୀପ ପାଣିଗ୍ରାହୀ, ଆସ୍କା ସାଂସଦ ପ୍ରାର୍ଥୀନୀ ଅନିତା ଶୁଭଦର୍ଶିନୀଙ୍କ ଉପସ୍ଥିତିରେ ସମସ୍ତେ ବିଜେପିରେ ସାମିଲ ହୋଇଛନ୍ତି ।
ଖଲ୍ଲିକୋଟ ବ୍ଲକ ଉପାଧ୍ୟକ୍ଷ କାଳୁରାମ ମହାରଣାଙ୍କ ନେତୃତ୍ବରେ ଆଜି ସମସ୍ତେ ବିଜେପିରେ ସାମିଲ ହୋଇଛନ୍ତି । ଏହାସହ ଖଲ୍ଲିକୋଟ ଏବଂ ଚିକିଟିର ଏକାଧିକ ସରପଞ୍ଚ, ପୂର୍ବତନ ସରପଞ୍ଚ ଓ ସମିତିସଭ୍ୟ ବିଜେପିରେ ଯୋଗ ଦେଇଛନ୍ତି । ସେହିପରି ୨୦୧୪ ନିର୍ବାଚନରେ କବିସୂର୍ଯ୍ୟନଗରର କଂଗ୍ରେସ ବିଧୟାକ ପ୍ରାର୍ଥୀ ସୀତାରାମ ପାଣିଗ୍ରାହୀ ପରବର୍ତ୍ତୀ ସମୟରେ ବିଜେଡିରେ ଯୋଗ ଦେଇଥିଲେ । ସେ ଗତକାଲି ବିଜେଡିରୁ ଇସ୍ତଫା ଦେବା ପରେ ଆଜି ଶତାଧିକ କର୍ମୀଙ୍କ ସହ ବିଜେପିରେ ସାମିଲ ହୋଇଛନ୍ତି । ପିସିସି ମୁଖପାତ୍ର ପୀତବାସ ପଣ୍ଡାଙ୍କ ସହ ଗଞ୍ଜାମ ବାର କାଉନସିଲ୍ର ଏକାଧିକ ଆଇନଜୀବୀ ମଧ୍ୟ ଆଜି ବିଜେପିରେ ଯୋଗ ଦେଇଛନ୍ତି ।
ଏହି ମିଶ୍ରଣ ପର୍ବରେ ରାଜ୍ୟ ବିଜେପି ସଭାପତି ମନମୋହନ ସାମଲ କହିଛନ୍ତି, "ଗତ ୧୦ ବର୍ଷର ମୋଦି ଶାସନରେ ଭାରତବର୍ଷର ଗାରିମା ବିଶ୍ବ ଦରବାରରେ ବୃଦ୍ଧି ପାଇଛି । ପ୍ରତ୍ୟେକଟି କ୍ଷେତ୍ରରେ ଭାରତବର୍ଷର ବିକାଶ ହୋଇଛି । ବିକଶିତ ଭାରତ ଗଠନ ପାଇଁ ସଂକଳ୍ପ ମୋଦି ନେଇଛନ୍ତି ଏବଂ ଏଥିପାଇଁ କାର୍ଯ୍ୟରତ । ମାତ୍ର ୨୪ ବର୍ଷର ଅପାରଗ ଓ ସ୍ଥାଣୁ ବିଜେଡି ସରକାର ପାଇଁ ରାଜ୍ୟର ବିକାଶ ବାଧାପ୍ରାପ୍ତ ହୋଇଛି । ବିକାଶ ନାଁରେ ବିନାଶର ରାଜନୀତି କରୁଛି ବିଜେଡି । ମୋଦି ଗ୍ୟାରେଣ୍ଟିର ସୁଲଭ ସମଗ୍ର ଦେଶରେ ଅନୁଭବ ହେଉଥିବାବେଳେ ବିଜେଡି ସରକାର କାରଣରୁ ଓଡିଶାବାସୀ ବଞ୍ଚିତ ହୋଇଛନ୍ତି । ମୋଦି ଗ୍ୟାରେଣ୍ଟିକୁ ପ୍ରତ୍ୟେକ ଓଡିଶାବାସୀଙ୍କ ନିକଟରେ ପହଞ୍ଚାଇବା । ଆମେ ସମସ୍ତେ ଏକାଠି ହେବା ଏବଂ ଓଡିଶାରେ ବିଜେପିର ଡବଲ୍ ଇଞ୍ଜିନ ସରକାର ଗଠନ କରିବା । ମୋଦିଙ୍କ ପ୍ରତି ଓଡିଶାବାସୀଙ୍କ ଭଲ ପାଇବା ପ୍ରତିଦିନ ବୃଦ୍ଧି ପାଉଛି । ପ୍ରଧାନମନ୍ତ୍ରୀ ମୋଦିଜୀଙ୍କ ନୀତି ଓ ଆଦର୍ଶରେ ଅନୁପ୍ରାଣିତ ହୋଇ ରାଜ୍ୟର କୋଣ ଅନୁକୋଣରୁ ପ୍ରତ୍ୟେକ ଦିନ ବିଜେଡି ଓ କଂଗ୍ରେସ ଦଳ ପରିତ୍ୟାଗ କରି ହଜାର ହଜାର ସଂଖ୍ୟାରେ କର୍ମୀମାନେ ବିଜେପିରେ ସାମିଲ ହେଉଛନ୍ତି ।" ଏହି ଧାରା ଜାରି ରହିବ ଏବଂ ଓଡିଶାରେ ଏଥର ବିଜେପି ସରକାର ସୁନିଶ୍ଚିତ ବୋଲି ମନମୋହନ କହିଛନ୍ତି।
ଇଟିଭି ଭାରତ, ଭୁବନେଶ୍ବର
