ଭୁବନେଶ୍ବର: ଶ୍ରାବଣ ମାସର ପ୍ରଥମ ସୋମବାରରେ ଆଜି ଭକ୍ତ ଭଗବାନଙ୍କର ମିଳନ ହୋଇଛି । ରାଉରକେଲାର ବିଭିନ୍ନ ଶିବ ମନ୍ଦିରରେ ଭକ୍ତଙ୍କ ଗହଳି ଲାଗିଥିଲା । ଶୈବକ୍ଷେତ୍ରରେ ଜଳାଭିଷେକ ଭଳି ପବିତ୍ର କାର୍ଯ୍ୟରେ ସାମିଲ ହେବା ପାଇଁ ଦୂରଦୂରାନ୍ତରୁ ଶ୍ରଦ୍ଧାଳୁମାନଙ୍କ ସୁଅ ଛୁଟିଥିଲା । ସକାଳୁ ସକାଳୁ ରାଉରକେଲା ସହରର ବିଭିନ୍ନ ଶିବ ମନ୍ଦିରରେ ଶ୍ରଦ୍ଧାଳୁମାନେ ଜଳାଭିଷେକ ପାଇଁ ପହଞ୍ଚିଥିଲେ । ଭଗବାନ ଶିବଙ୍କୁ ଜଳ ଅର୍ପଣ କରିବା ପାଇଁ ପୁରୁଷ, ମହିଳା ଓ ଶିଶୁମାନେ ଧୈର୍ଯ୍ୟ ଧରି ଅପେକ୍ଷା କରିଥିବାରୁ ପରିବେଶ ଭକ୍ତି ଓ ଆଧ୍ୟାତ୍ମିକ ଭାବନାରେ ଭରି ଯାଇଥିଲା । ଭକ୍ତଙ୍କ ସମାଗମକୁ ଦୃଷ୍ଟିରେ ରଖି ମନ୍ଦିର ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଥିବା ବେଳେ ସମସ୍ତଙ୍କ ପାଇଁ ସୁବ୍ୟବସ୍ଥା କରାଯାଇଥିଲା । ତେବେ ଆଜି ବେଦବ୍ୟାସ ପୀଠରେ ମଧ୍ୟ ଭଲ ଭକ୍ତଙ୍କ ଭିଡ଼ ଦେଖିବାକୁ ମିଳୁଛି ।
ଭଦ୍ରକ:ରାଜ୍ୟର ଅନ୍ୟତମ ଶୈବପୀଠ ବାବା ଆଖଣ୍ଡଳମଣିଙ୍କ ପୀଠରେ ମଧ୍ୟ ଶ୍ରାବଣ ଯାତ୍ରା ଆରମ୍ଭ ହୋଇଛି । ଏହି ପବିତ୍ର ଶ୍ରାବଣ ମାସ ପ୍ରଥମ ସୋମବାର ଅବସରରେ ବାବା ଆଖଣ୍ଡଳମଣିଙ୍କ ପୀଠକୁ ଜଳ ଲାଗି କରିବା ପାଇଁ ହଜାର ହଜାର କାଉଡିଆଙ୍କ ଭିଡ ଲାଗିଛି । କାଉଡିଆମାନଙ୍କ ବୋଲ ବମ୍, ହରହର ବମ ଧ୍ବନିରେ ପ୍ରକମ୍ଫିତ ହେଉଛି ସମଗ୍ର ପୀଠ । ଚଳିତ ବର୍ଷ ଶ୍ରାବଣ ଯାତ୍ରାରେ ଯେପରି ଶୃଙ୍ଖଳିତ ଭାବେ କାଉଡିଆମାନେ ଜଳ ଲାଗି କରି ପାରିବେ, ସେଥିପାଇଁ ମନ୍ଦିର ଭିତରେ ଏବଂ ବାହାରେ କଡା ସୁରକ୍ଷା ବ୍ୟବସ୍ଥା ସହ ସ୍ବତନ୍ତ୍ର ବାରିକେଟ କରାଯାଇଛି । ଅନ୍ୟ ପକ୍ଷରେ ମହିଳା କାଉଡିଆଙ୍କ ପାଇଁ ସ୍ବତନ୍ତ୍ର ଭାବେ ସୁରକ୍ଷା ବ୍ୟବସ୍ଥା ହୋଇଛି ।
ଏଥିସହ ପ୍ରତି ରବିବାର ଏବଂ ସୋମବାର ଦିନ ନିରିବିଚ୍ଛିନ୍ନ ବିଦ୍ୟୁତ ଯୋଗାଣ ସହିତ ଚବିଶ ଘଣ୍ଟିଆ ପାନୀୟ ଜଳ ଯୋଗାଣ, ସ୍ବାସ୍ଥ୍ୟ, ପରିମଳ, ଅସ୍ଥାୟୀ ଆଶ୍ରୟ ସ୍ଥଳୀ ବ୍ୟବସ୍ଥା ପାଇଁ ପ୍ରଶାସନ ପକ୍ଷରୁ ପଦକ୍ଷେପ ଗ୍ରହଣ କରାଯାଇଥିବା ଜଣାପଡିଛି । ତେବେ ହଜାର ହଜାର କାଉଡିଆ ଭକ୍ତ ମାନଙ୍କ ଭିଡକୁ ଦୃଷ୍ଟିରେ ରଖି ମନ୍ଦିରର ଦୈନନ୍ଦିନ ନୀତିକାନ୍ତିରେ ସାମାନ୍ୟ ପରିବର୍ତ୍ତନ କରାଯାଇଥିବା ସୂଚନା ମିଳିଛି ।
ଝାରସୁଗୁଡ଼ା: ଚଳଚଞ୍ଚଳ ହୋଇଉଠିଛି ଝାରସୁଗୁଡ଼ା ଜିଲ୍ଲାର ସମସ୍ତ ଶୈବପୀଠ । ମାନସିକଧାରୀ ଓ କାଉଡିଆମାନେ ପାଣି ଉଠାଇ ଭଗବାନ ଶିବଙ୍କ ଉଦ୍ଦେଶ୍ୟରେ ଜଳାଭିଷେକ କରିଛନ୍ତି । ଝାରସୁଗୁଡ଼ାର ଆରାଧ୍ୟ ଦେବ ଝାଡେଶ୍ବର ଶୈବ ପୀଠରେ ହଜାର ହଜାର ଭକ୍ତ ଦେବ ଦେବ ମହାଦେବଙ୍କୁ ଜଳାଭିଷେକ କରୁଛନ୍ତି । ଏହି ଐତିହାସିକ ଶୈବପୀଠ ପ୍ରତି ଲୋକଙ୍କ ଆସ୍ଥା ବଢ଼ିବାରେ ଲାଗିଛି । ଏଥର ଶ୍ରାବଣ ମାସର ପ୍ରଥମ ଦିନ ସୋମବାରରୁ ଆରମ୍ଭ ହୋଇଥିବା ବେଳେ ଶେଷ ଦିନ ମଧ୍ୟ ସୋମବାରରେ ଶେଷ ହେଉଛି । ଶ୍ରାବଣ ପ୍ରଥମ ସୋମବାରରେ ମନ୍ଦିରରେ ଏଥର ସ୍ୱତନ୍ତ୍ର ବ୍ୟବସ୍ଥା ଆୟୋଜନ ହୋଇଛି । ଝାଡେଶ୍ବର ମନ୍ଦିରରେ ପ୍ଲାଷ୍ଟିକକୁ ସମ୍ପୂର୍ଣ୍ଣ ବାରଣ କରାଯାଇଛି । ଆଜି ଭୋର ୩ଟାରୁ ବାବାଙ୍କ ମନ୍ଦିର ଖୋଲାଯାଇ ୧୦୮ କଳସରେ ଜଳ ଲାଗି କରାଯାଇଥିଲା ।
ବୌଦ୍ଧ: ଶ୍ରାବଣ ମାସର ପ୍ରଥମ ସୋମବାର ଉପଲକ୍ଷେ ବୌଦ୍ଧ ଜିଲ୍ଲାର ବିଭିନ୍ନ ଶୈବପୀଠରେ କାଉଡ଼ିଆ ଓ ଶ୍ରଦ୍ଧାଳୁଙ୍କ ଭିଡ଼ ପରିଲକ୍ଷିତ ହୋଇଛି । ଶ୍ରାବଣ ସୋମବାର ପାଇଁ ବିଭିନ୍ନ ଶୈବପୀଠରେ ଏଥିପାଇଁ ବ୍ୟାପକ ପ୍ରସ୍ତୁତି ମଧ୍ୟ କରାଯାଇଥିଲା । ଏକାଦଶ ରୁଦ୍ରଙ୍କ ବିଜେ ସ୍ଥଳୀ ରାମେଶ୍ବର ମନ୍ଦିର ଠାରେ ଶ୍ରଦ୍ଧାଳୁମାନେ ମହାନଦୀରୁ ପବିତ୍ର ଜଳ ଆଣି ଢାଳିଥିଲେ । ରାମେଶ୍ବର ମନ୍ଦିର ପରିସରରେ ଆଜି ସେବାୟତମାନେ ପ୍ରତ୍ୟୁଷରୁ ଠାକୁରଙ୍କ ନୀତିକାନ୍ତି ସମାପନ ପରେ କାଉଡ଼ିଆ ଓ ଶ୍ରଦ୍ଧାଳୁଙ୍କ ପାଇଁ ଜଳଲାଗି ଓ ସାଧାରଣ ଦର୍ଶନ ବ୍ୟବସ୍ଥା କରାଯାଇଥିଲା ।
ସେହିପରି ଜିଲ୍ଲାର ଅନ୍ୟତମ ପ୍ରାଚୀନ ଶୈବପୀଠ ଗନ୍ଧରାଡ଼ିର ହରିହର ମନ୍ଦିର ଠାରେ କାଉଡ଼ିଆ ଓ ଶ୍ରଦ୍ଧାଳୁମାନେ ଜଳଲାଗି ପାଇଁ ଦୂର ଦୂରାନ୍ତରୁ ଆସି ପହଞ୍ଚିଥିଲେ । ଏହାଛଡା ବୈଦ୍ଧର ଚନ୍ଦ୍ରଚୂଡ,ମାତଙ୍ଗେଶ୍ରର,କରଡି, ଧଳପୁର,ରାମଗଡ଼, କୁଜଙ୍ଗ, ହରଭଙ୍ଗା, ପୁରୁଣା କଟକ, ସରସରା, ଚଣ୍ଡିଗଡ, ବାଉଁଶୁଣୀ, ମଲ୍ଲିକପଡା, ଅମୁର୍ଡା,ଭଳି ଶତାଧିକ ଶୈବପୀଠରେ ଆଜି ଶ୍ରାବଣ ମାସର ପ୍ରଥମ ସୋମବାର ପାଇଁ ଶ୍ରଦ୍ଧାଳୁଙ୍କ ଭିଡ଼ ପରିଲକ୍ଷିତ ହୋଇଥିଲା ।
ଏହା ମଧ୍ୟ ପଢନ୍ତୁ....ଶ୍ରାବଣ ପ୍ରଥମ ସୋମବାର: ଶୈବପୀଠରେ ପ୍ରବଳ ଭିଡ, ୭୨ ବର୍ଷ ପରେ ପଡିଛି ଦୁର୍ଲଭ ସଂଯୋଗ, ଭୋଳା ବାବା ପୂରା କରିବେ ସବୁ ମନୋସ୍କାମନା ! - Sawan month star
ପୁରୀ: ଶିବ ଭକ୍ତଙ୍କ ପାଇଁ ଆଜିର ଦିନଟି ବଡ଼ ପବିତ୍ର ଦିନ । ପୁରୀର ଲୋକନାଥ ପୀଠରେ ପ୍ରାୟ ୮ ହଜାରରୁ ଊର୍ଦ୍ଧ୍ଵ କାଉଡ଼ିଆ ଭକ୍ତ ଜଳାଭିଷେକ କରିଛନ୍ତି । ଭକ୍ତଙ୍କ ଅହେତୁକ ଭିଡ଼କୁ ଦୃଷ୍ଟିରେ ରଖି ଶ୍ରୀଲୋକନାଥ ମନ୍ଦିର ଓ ପୋଲିସ ପ୍ରଶାସନ ପକ୍ଷରୁ ଗ୍ରହଣ କରାଯାଇଥିଲା ବ୍ୟାପକ ବ୍ୟବସ୍ଥା । କାଉଡ଼ିଆ ଭକ୍ତମାନେ ଟିକେଟ କାଟିବା ସହ ବ୍ୟାରିକେଡ଼ ମଧ୍ୟରେ ପ୍ରବେଶ କରି ପ୍ରଭୁ ଲୋକନାଥଙ୍କ ପାଖରେ ଜଳଲାଗି କରି ନିଜକୁ ଧନ୍ୟ ମନେ କରିଛନ୍ତି ।
ଶ୍ରାବଣ ମାସର ଆଜି ପ୍ରଥମ ସୋମବାର ଥିଲା ଶିବ ଭକ୍ତଙ୍କ ପାଇଁ ଏକ ପବିତ୍ର ଦିନ । ଆଜିର ଦିନରେ ଜଳାଭିଷେକ କରିବା ପାଇଁ କାଉଡ଼ିଆଙ୍କର ଗହଳି ଲାଗିଥିଲା ପୁରୀର ଶ୍ରୀଶ୍ରୀ ଲୋକନାଥଙ୍କ ପୀଠରେ । ତେବେ ପ୍ରଥମ ସୋମବାରରେ ପ୍ରାୟ ୮ ହଜାରରୁ ଊର୍ଦ୍ଧ୍ଵ କାଉଡ଼ିଆ ଭକ୍ତଙ୍କ ସମାଗମ ହୋଇଥିବା ବେଳେ ରାତି ସାଢେ ୧୨ ଟାରୁ ଦ୍ବାର ଫିଟା ଯାଇ ୧ଟା ୩୦ରେ ଜଳାଭିଷେକ ଆରମ୍ଭ ହୋଇଥିଲା ଏହି ପୀଠରେ । ସୁରକ୍ଷା ଓ ଶୃଙ୍ଖଳିତ ଦର୍ଶନ ପାଇଁ ୧୨ ପ୍ଲାଟୁନ ପୋଲିସ ଫୋର୍ସ ସହ ଜଣେ ଅତିରିକ୍ତ ଏସପି, ୬ ଜଣ ଆଇଆଇସିଙ୍କ ସହ ହୋମଗାର୍ଡ ମଧ୍ୟ ମୁତୟନ ହୋଇଥିଲେ । ସେହିପରି କାଉଡ଼ିଆ ଭକ୍ତମାନେ ୩୦ ଟଙ୍କା ଦେଇ ଟିକେଟ କରି ପ୍ରଭୁ ଲୋକନାଥଙ୍କ ମସ୍ତକରେ ଜଳଲାଗି କରିଥିଲେ ।
ଢେଙ୍କାନାଳ: ରାଜ୍ୟର ଅନ୍ୟତମ ପ୍ରସିଦ୍ଧ ଶୈବ ପୀଠ ଢେଙ୍କାନାଳର କପିିଳାଶ ପୀଠ ଚଳଚଞ୍ଚଳ ହୋଇଉଠିଛି । ପ୍ରଭୁଙ୍କ ପାଖରେ ଜଳ ଲାଗି କରିଭାକୁ ରାଜ୍ୟର ବିଭିନ୍ନ ଅଞ୍ଚଳରୁ କାଉଡ଼ିଆମାନଙ୍କର ସୁଅ ଛୁଟିଛି । ଏହି ପୀଠରେ ଚଳିତବର୍ଷ ପ୍ରଶାସନ ପକ୍ଷରୁ ଜଳଲାଗି ପାଇଁ ପ୍ଲାଷ୍ଟିକ ପାତ୍ର ଓ ପଲିଥିନକୁ ନିଷେଧ କରାଯାଇଛି । ଜଳଲାଗି ପାଇଁ ମାଟି ଅଥବା ଧାତୁ ନିର୍ମିତ ପାତ୍ର ବ୍ୟବହାର କରିବା ପାଇଁ ଦେବତ୍ତୋର ବିଭାଗ ପକ୍ଷରୁ ଶ୍ରଦ୍ଧାଳୁଙ୍କୁ ନିବେଦନ କରାଯାଇଛି । କାଉଡିଆ ମାନଙ୍କ ସୁବିଧା ପାଇଁ କପିଳାସ ପୀଠର ଘାଟିରାସ୍ତା ଓ ପାହାଚ ରାସ୍ତାକୁ ସମ୍ପୂର୍ଣ୍ଣ ଆଲୋକୀକରଣ କରାଯାଇଛି । ଶାନ୍ତିଶୃଙ୍ଖଳା ରକ୍ଷା ପାଇଁ ସଶସ୍ତ୍ର ପୋଲିସ ଫୋର୍ସ ମୁତୟନ କରାଯାଇଛି ।
ବଲାଙ୍ଗୀର: ଆଜି ଜିଲ୍ଲାର ସବୁ ଶୈବ ପୀଠରେ ଭକ୍ତଙ୍କ ପ୍ରବଳ ଭିଡ ଜମିଥିଲା । ବଲାଙ୍ଗୀରର ପ୍ରସିଦ୍ଧ ଶୈବ ପୀଠ ହରିଶଙ୍କର, ଟିଟିଲାଗଡ଼ କୁମୁଡା ପାହାଡ଼, ଯୁଗୀସୁରଡ଼ା ଶିବ ମନ୍ଦିରରେ ଆଜି ଭୋରରୁ ଭକ୍ତ ଓ ମାନସିକ ଧାରୀ ମହାଦେବଙ୍କ ଠାରେ ପାଣି ଢାଳିଥିଲେ । ଚଳିତ ବର୍ଷ ସଂଯୋଗ କ୍ରମେ ଶ୍ରାବଣ ମାସର ପ୍ରଥମ ସୋମବାର ଦିନ ଶ୍ରାବଣ ମାସ ଆରମ୍ଭ ହୋଇଛି । ସେହିପରି ଏହାକୁ ନେଇ ଶୈବ ଭକ୍ତଙ୍କ ମଧ୍ୟରେ ଖୁବ ଉତ୍ସାହ ଦେଖିବାକୁ ମିଳିଛି । ପ୍ରସିଦ୍ଧ ହରିଶଙ୍କର ପୀଠରେ ଆଜି ଭୋରରୁ ଭକ୍ତଙ୍କ ପ୍ରବଳ ଭିଡ ଜମିଥିଲା । ଯେଉଁଥିରେ ରାଜ୍ୟ ଓ ରାଜ୍ୟ ବାହାରୁ ଭକ୍ତ ମାନସିକ ଧାରୀ ଏଠି ଜଲ ଲାଗି କରିଥିଲେ। ସେହିପରି ଏଥର 72 ବର୍ଷ ପରେ ଏକ ସୁସଂଯୋଗରେ ଶ୍ରାବଣ ସମାବାରରୁ ହୋଇଥିବା ବେଳେ ଶେଷ ମଧ୍ୟ ସୋମବାରରେ ହେବ ।
ଇଟିଭି ଭାରତ, ରାଉରକେଲା/ଭଦ୍ରକ /ଝାରସୁଗୁଡ଼ା/ବୌଦ୍ଧ/ପୁରୀ/ଢେଙ୍କାନାଳ/ବଲାଙ୍ଗୀର
