ଭୁବନେଶ୍ବର: ଆଜି ୨୦୨୪-୨୫ ଶିକ୍ଷାବର୍ଷରେ ୟୁଜି ନାମଲେଖା ନେଇ ବିଜ୍ଞପ୍ତି ପ୍ରକାଶ ପାଇଛି । ଆସନ୍ତା ଜୁନ୍ ୩ ତାରିଖ ଅପରାହ୍ନ ୪ଟା ସମୟରୁ ଅନଲାଇନ ମାଧ୍ୟମରେ ଆବେଦନ ଆରମ୍ଭ ହେବ । samsodisha.gov.inରେ ଜୁନ୍ ୧୭ ପର୍ଯ୍ୟନ୍ତ ଏହି ଆବେଦନ ଗ୍ରହଣ କରାଯିବ । ସେହିପରି ଭାବରେ ଜୁନ୍ ୧୮ ତାରିଖରୁ ୧୯ ତାରିଖ ମଧ୍ୟରେ CAFର ତ୍ରୁଟି ସୁଧାରି ପାରିବେ । ଜୁନ୍ ୨୫ ତାରିଖ ଅପରାହ୍ନ ୪ଟାରେ ପ୍ରକାଶ ପାଇବ ପ୍ରଥମ ମେଧାବୀ ତାଲିକା । ତେବେ ଜୁନ ୨୫ ତାରିଖରୁ ୨୮ ତାରିଖ ଯାଏଁ Slide/ Freeze/ Float ଅପ୍ସନ ଚୟନ କରିପାରିବେ ଛାତ୍ର ଛାତ୍ରୀ ।
ସେହିପରି ଜୁନ୍ ୨୬ ତାରିଖରୁ ୨୯ ତାରିଖ ପର୍ଯ୍ୟନ୍ତ କଲେଜକୁ ଯାଇ ରିପୋର୍ଟ କରିବେ ଛାତ୍ରଛାତ୍ରୀ । ଜୁଲାଇ ୫ ତାରିଖ ଅପରାହ୍ନ ୪ଟାରେ ଦ୍ବିତୀୟ ପର୍ଯ୍ୟାୟ ମେଧାବୀ ତାଲିକା ପ୍ରକାଶ ପାଇବ। ତେବେ ଜୁଲାଇ ୫ ତାରିଖରୁ ୮ ତାରିଖ ଯାଏଁ Slide/ Freeze/ Float ଅପ୍ସନ ଚୟନ କରିପାରିବେ ଛାତ୍ରଛାତ୍ରୀ । ଜୁଲାଇ ୬ ତାରିଖରୁ ୯ ତାରିଖ ପର୍ଯ୍ୟନ୍ତ ଦ୍ବିତୀୟ ପର୍ଯ୍ୟାୟ ନାମଲେଖା ରିପୋର୍ଟ କରିବେ । ଜୁଲାଇ ୧୫ ତାରିଖ ଅପରାହ୍ନ ୪ଟାରେ ତୃତୀୟ ପର୍ଯ୍ୟାୟ ମେଧାବୀ ତାଲିକା ପ୍ରକାଶ ପାଇବ । ତେବେ ରାଜ୍ୟର ୩ ବିଶ୍ୱବିଦ୍ୟାଳୟ ଯଥା ଗଙ୍ଗାଧର ମେହେର ବିଶ୍ଵବିଦ୍ୟାଳୟ, ଉତ୍କଳ ବିଶ୍ୱବିଦ୍ୟାଳୟ ଏବଂ ରେଭେନ୍ସା ବିଶ୍ଵବିଦ୍ୟାଳୟ, ଏହା ସହ ୩ ସ୍ୱୟଂ ଶାସିତ କଲେଜ ଯଥା ଏସସିଏସ ପୁରୀ, ଏମପିସି କଲେଜ ବାରିପଦା ଏବଂ ଫକିରି ମୋହନ କଲେଜ ବାଲେଶ୍ଵରରେ ୪ ବର୍ଷିଆ ପାଠ୍ୟକ୍ରମ ପାଇଁ ଆବେଦନ କରାଯାଉଛି। ସେଗୁଡିକ ହେଲା ଇଣ୍ଟିଗ୍ରେଟେଡ୍ ବି.ଏ, ବି.ଇଡି ଏବଂ ବି.ଏସସି ପାଇଁ ନାମଲେଖା ଯାଉଛି।
ସୂଚନା ଅନୁଯାୟୀ, ରାଜ୍ୟରେ ସ୍ଵୟଂଶାସିତ କଲେଜ ଏବଂ ଯୁକ୍ତ ତିନି ମୋଟ କଲେଜ ସଂଖ୍ୟା ହେଉଛି ୧୦୩୭ । ସେଥିରେ ୨ ଲକ୍ଷ ୭୩ ହଜାର ୧୫ଟି ସିଟ ରହିଛି । ତେବେ ଚଳିତ ବର୍ଷ ଗଞ୍ଜାମ ଜିଲ୍ଲାରେ ସର୍ବାଧିକ ୨୪ ହଜାର ୫୫୨ ସିଟ ରହିଥିବା ବେଳେ ଦ୍ଵିତୀୟ ସର୍ବାଧିକ କଟକ ଜିଲ୍ଲାରେ ୨୧ ହଜାର ୮୧୨ ସଂଖ୍ୟାକ ସିଟ ରହିଛି । ସେପଟେ ଖୋର୍ଦ୍ଧା ଜିଲ୍ଲାରେ ୨୧ ହଜାର ୧୨୩ ସିଟ ରହିଛି । ତେବେ ଯଦି ନଜର ପକାଇବା ୨୦୨୩-୨୪ ଶିକ୍ଷାବର୍ଷରେ ତେବେ ୧୦୪୭ କଲେଜରେ ୨ ଲକ୍ଷ୍ୟ ୭୧ ହଜାର ୯୧ ସିଟ ରହିଥିଲା। ସେଥିମଧ୍ୟରୁ ୧ ଲକ୍ଷ୍ୟ ୮୭ ହଜାର ୩୮୪ ସିଟ ପୂରଣ ହୋଇଥିଲା । ତେବେ ପାଖାପାଖି ୮୩ ହଜାର ୭୦୭ ସିଟ ନାମଲେଖା ପୂରଣ ହୋଇପାରିନଥିଲା । ୨୦୨୨-୨୩ ଶିକ୍ଷାବର୍ଷ ନାମଲେଖା ନଜର ପକାଇଲେ ରାଜ୍ୟରେ ମୋଟ ୧ ହଜାର ୨୪ ଟି କଲେଜ ଥିଲା। ସେଥିମଧ୍ୟରୁ ସିଟ ସଂଖ୍ୟା ରହିଥିଲା ୨ ଲକ୍ଷ ୫୫ ହଜାର ୯୮୦, କିନ୍ତୁ ଉକ୍ତ ଶିକ୍ଷା ବର୍ଷରେ ସିଟ ବଳକା ହୋଇଥିଲା ୬୨ ହଜାର ୯୧୦ । ଯୁକ୍ତ ଦୁଇରେ ପାସ ହାର ସଂଖ୍ୟା ବୃଦ୍ଧି ପାଇବା ସହ ଯୁକ୍ତ ତିନିରେ ସିଟ ସଂଖ୍ୟା ବୃଦ୍ଧି ପାଉଛି, କିନ୍ତୁ ନାମାଲେଖାଇବା ସମୟରେ ଦେଖାଯାଉଛି ଅନେକ କଲେଜରେ ସିଟ ଖାଲି ପଡୁଛି।
ଇଟିଭି ଭାରତ, ଭୁବନେଶ୍ବର
