ପୁରୀ: ଆଜି ଆଉଥରେ ଖୋଲିଲା ଶ୍ରୀମନ୍ଦିର ଭିତର ରତ୍ନଭଣ୍ଡାର । ଶୁଭବେଳା ସକାଳ ୯ଟା ୫୧ରୁ ୧୨ଟା ୧୫ ମଧ୍ୟରେ ଭିତର ଭଣ୍ଡାର ଖୋଲାଯାଇଛି । ଏହା ପରେ ଭିତର ରତ୍ନଭଣ୍ଡାରରୁ ଅଳଙ୍କାର ସ୍ଥାନାନ୍ତରଣ ପ୍ରକ୍ରିୟା ଶେଷ ହୋଇଛି । ନୂଆ ସିନ୍ଦୁକରେ ରଖାଯାଇଛି ଅଳଙ୍କାର । ଭିତର ରତ୍ନ ଭଣ୍ଡାରର ଅଳଂକାରକୁ ଶ୍ରୀମନ୍ଦିର ଭିତରେ ଖଟଶେଯ ଗୃହରେ ହୋଇଥିବା ଅସ୍ଥାୟୀ ଷ୍ଟ୍ରଙ୍ଗ ରୁମରେ ରଖାଯାଇଛି । କିଛି ପୁରୁଣା ଦେବାଦେବୀଙ୍କ ମୂର୍ତ୍ତି ଥିବା ସୂଚନା ରହିଛି । ସକାଳ 8ଟା ରୁ ଶ୍ରୀ ମନ୍ଦିର ଭିତରକୁ ଭକ୍ତ ପ୍ରବେଶ କଟକଣା ଲାଗିଥିଲା । ତେବେ ଶ୍ରୀ ମନ୍ଦିରକୁ ପ୍ରବେଶ କରିଥିଲେ ଶ୍ରୀମନ୍ଦିର ରତ୍ନ ଭଣ୍ଡାର ତଦାରଖ କମିଟିର 11 ଜଣ ପ୍ରଧିକୃତ୍ ସଦସ୍ୟ ଏବଂ ଗଜପତି ମହାରାଜା ଦିବ୍ୟସିଂହ ଦେବ ।
ପରେ ଗଜପତି ମହାରାଜା ଦିବ୍ୟସିଂହ ଦେବ କହିଛନ୍ତି ଯେ ରତ୍ନଭଣ୍ଡାର ମରାମତି ନିତାନ୍ତ ଆବଶ୍ୟକ । ରତ୍ନଭଣ୍ଡାର ଦେଖି ଫେରିଲା ପରେ ଗଜପତି ମହାରାଜାଙ୍କ ପ୍ରତିକ୍ରିୟା । ରତ୍ନଭଣ୍ଡାର ସଂପୂର୍ଣ୍ଣ ଖାଲି ହେଲା ପରେ ଲେଜର ସ୍କାନିଂ କରାଯିବ ।
ସୂଚନା ରହିଛି ଯେ, ଭିତର ରତ୍ନଭଣ୍ଡାରରେ ସିନ୍ଦୁକ ଓ ଆଲମିରାରେ ଗଚ୍ଛିତ ଥିବା ମହଣ ମହଣ ସୁନା, ରୂପା, ହୀରା ମୋତି ମାଣିକ୍ୟ ଆଦି ଦୁର୍ମୂଲ୍ୟ ରତ୍ନଅଳଙ୍କାରକୁ ଆଣି ଖଟଶେଜ ଘର ଅସ୍ଥାୟୀ ରତ୍ନଭଣ୍ଡାର ବା ଷ୍ଟ୍ରଙ୍ଗରୁମକୁ ସ୍ଥାନାନ୍ତର କରାଯାଉଛି । ଏହି ଅଳଙ୍କାର ସ୍ଥାନାନ୍ତରଣ ଓ ଭିତର ସ୍ଥିତି ଅନୁଧ୍ୟାନ ୧୧ ଜଣିଆ ପ୍ରତିନିଧି ଦଳ କରୁଛନ୍ତି । ଯାଞ୍ଚ ସମୟରେ ସବୁର ଟିକିନିଖି ଭିଡିଓଗ୍ରାଫି କରାଯିବ ।
ପୂର୍ବରୁ ଗତ ୧୪ ତାରିଖ ଦିନ ବାହାର ଓ ଭିତର ରତ୍ନଭଣ୍ଡାର ଖୋଲାଯାଇଥିଲା । ମାତ୍ର ୧୧ ଜଣିଆ ପ୍ରତିନିଧି ଦଳ ଭିତର ଭଣ୍ଡାରରେ ଥିବା ସିନ୍ଦୁକ ଓ ଆଲମିରା ଖୋଲିନଥିଲେ । ତେଣୁ ଆଜି ପୂର୍ବ ଏସ୍ଓପି ଅନୁସାରେ ଆଉଥରେ ଭିତର ରତ୍ନଭଣ୍ଡାର ଖୋଲାଯାଇ ରତ୍ନଅଳଙ୍କାର ସ୍ଥାନାନ୍ତରଣ ପାଇଁ ରତ୍ନଭଣ୍ଡାର ଯାଞ୍ଚ କମିଟି ନିଷ୍ପତ୍ତି ନେଇଥିଲା । ରତ୍ନଭଣ୍ଡାର ଖୋଲିବା ପାଇଁ ଯେଉଁ ପ୍ରତିନିଧି ଦଳ ଯିବେ, ସେମାନେ କୌଣସି ସ୍ବର୍ଣ୍ଣ ଅଳଙ୍କାର କିମ୍ବା ପଦାର୍ଥ ପରିଧାନ କରିଯିବେ ନାହିଁ । ଯାଞ୍ଚ ପରେ ଉଭୟ ଭିତର ଓ ବାହାର ରତ୍ନଭଣ୍ଡାର ଜଉମୁଦ ଦେଇ ସିଲ୍ କରାଯିବ ।
ପ୍ରତିନିଧି ଦଳ ପ୍ରଥମେ ବାହାର ରତ୍ନଭଣ୍ଡାର ଖୋଲିବା ପରେ ଭିତର ରତ୍ନଭଣ୍ଡାର ଖୋଲିବେ । ଭିତରେ ଭଣ୍ଡାରରେ ଥିବା ସିନ୍ଦୁକ ଓ ଆଲମିରାର ତାଲା ଚାବିରେ ନଖୋଲିଲେ ଏହାକୁ ଭାଙ୍ଗି ଦିଆଯିବ । ସମସ୍ତ ଅଳଙ୍କାରକୁ ନୂଆ ସିନ୍ଦୁକ ଓ ଆଲମିରାକୁ ପୁରାଇ ଷ୍ଟ୍ରଙ୍ଗରୁମକୁ ସ୍ଥାନାନ୍ତର କରାଯିବ । ଯେଉଁ ସ୍ଥାନରୁ ଯେଉଁ ସିନ୍ଦୁକ ଓ ଆଲମିରା ସ୍ଥାନାନ୍ତର ହୋଇଥିବ ସେ ସ୍ଥାନ ଚିହ୍ନଟ ହେବ ଓ ଏହାର ଭିଡିଓଗ୍ରାଫି କରାଯିବ । ଏଏସଆଇ ମରାମତି କାମ କରିବା ପରେ ପୁନର୍ବାର ଉଭୟ ରତ୍ନଭଣ୍ଡାରର ଯଥାସ୍ଥାନରେ ସିନ୍ଦୁକ ଓ ଆଲମିରା ରଖାଯିବ ।
ସେପଟେ ସୁରକ୍ଷା ଓ ଶୃଙ୍ଖଳାକୁ ଦୃଷ୍ଟିରେ ରଖି ସକାଳ ୮ଟାରୁ ଶ୍ରୀମନ୍ଦିରକୁ ଭକ୍ତଙ୍କ ପ୍ରବେଶ ବନ୍ଦ କରାଯାଇଛି । ରତ୍ନଭଣ୍ଡାର ଯାଞ୍ଚ ବେଳେ କେବଳ ସିଂହଦ୍ବାର ଖୋଲା ରହିବ । ଅନ୍ୟ ୩ଟି ଯାକ ଦ୍ବାର ବନ୍ଦ କରାଯିବ ।
ଇଟିଭି ଭାରତ, ପୁରୀ
