କଟକ: ଛତିଶଗଡ ସୀମାନ୍ତ ନୂଆପଡା ଜିଲ୍ଲାରେ ବଡ଼ଧରଣର ଜୁଆ ଆଡ୍ଡା ଉପରେ ଚଢ଼ାଉ କରିଛି ପୋଲିସ । ଏଥିରେ ୮୦ଜଣ ଅଭିଯୁକ୍ତଙ୍କୁ ଗିରଫ କରିବା ସହ ପ୍ରାୟ 30 ଲକ୍ଷରୁ ଅଧିକ ନଗଦ ଟଙ୍କା ଓ ଏକାଧିକ କାର ଓ ବାଇକ ଜବତ କରାଯାଇଛି । ନୂଆପଡା ଜିଲ୍ଲା ଜୋଙ୍କା ଥାନା ଅନ୍ତର୍ଗତ ଠେଲକୋବେଡା ଗ୍ରାମରେ ଗତକାଲି (ଶନିବାର) ରାତିରେ ଏଭଳି ବଡ଼ ଧରଣର ଚଢ଼ାଉ କରିଥିଲା । ବିପୁଳ ପରିମାଣର ନଗଦ ଟଙ୍କା ,୨୫ଟି କାର ଓ ୧୦ରୁ ଅଧିକ ବାଇକ ଜବତ କରିବାରେ ସଫଳ ହୋଇଛି ପୋଲିସ । ଏନେଇ ରାଜ୍ୟ ପୋଲିସ ମୁଖ୍ୟାଳୟ ପକ୍ଷରୁ ସୂଚନା ଦିଆଯାଇଛି ।
- ପୋଲିସ ହାତରେ ଲାଗିଥିଲା ଗୁଇନ୍ଦା ଇନପୁଟ୍:-
ଗତ କିଛି ମାସ ହେବ ଠେଲକୋବେଡା ଗ୍ରାମର ଗୋଶାଳା ପାଖରେ ଥିବା ଏକ ଘର ଭିତରେ ବଡଧରଣର ଜୁଆ ଆଡ୍ଡା ଚାକିଥିବା ନେଇ ପୋଲିସ ନିକଟରେ ସୂଚନା ପହଞ୍ଚିଥିଲା । ଗତକାଲି ରାତିରେ ପୋଲିସ ଟିମ ଉକ୍ତ ଆଡ୍ଡାରେ ଅତର୍କିତ ଚଢାଉ କରିଥିଲା । ନୂଆପଡା ଏସପିଙ୍କ ନେତୃତ୍ୱରେ ସଶସ୍ତ୍ର ପୋଲିସ ଫୋର୍ସ ଏହି ଚଢାଉ କରିଥିଲେ । 80 ଜଣଙ୍କୁ ଗିରଫ କରାଯାଇ ଥାନାରେ ରଖାଯାଇଛି । ସେମାନଙ୍କୁ ଜେରା କରାଯାଉଛି । ଆଜି ସେମାନଙ୍କୁ ସ୍ଥାନୀୟ କୋର୍ଟରେ ହାଜର କରାଯିବ । ଏହା ଏକ ସୀମାନ୍ତ ଏରିଆ ହୋଇଥିବାରୁ ପୋଲିସ ଏହି ମାମଲାରେ ଆନ୍ତରାଜ୍ୟ ଜୁଆଡିଙ୍କ ଭୂମିକାକୁ ମଧ୍ୟ ସନ୍ଦେହ କରୁଛି । ସେହି ଦିଗରୁ ତଦନ୍ତ ଜାରି ରହିଛି ।
ଖବର ଅପଡେଟ ଜାରି ରହିଛି...
