ଭୁବନେଶ୍ବର: ରାଜ୍ୟରେ ଉତ୍ପାତ କରୁଥିବା ତଥା ହିଂସ୍ର ଅମାନିଆ ହେଉଥିବା ହାତୀଙ୍କ ଦେହରେ ଲାଗିବ ରେଡିଓ କଲାର । ଏନେଇ ବନ ବିଭାଗ ପଦକ୍ଷେପ ଗ୍ରହଣ କରିଛି । ରାଜ୍ୟରେ କେତେ ହିଂସ୍ର ଓ ଅମାନିଆ ହାତୀ ରହିଛନ୍ତି, ପୂର୍ବରୁ କେତେ ହିଂସ୍ର ଓ ଅମାନିଆ ହାତୀଙ୍କ ଦେହରେ ରେଡିଓ କଲାର ଲାଗିବାର ଥିଲା ସେନେଇ ତଥ୍ୟ ମାଗିଛନ୍ତି ବନ୍ୟପ୍ରାଣୀ PCCF ସୁଶାନ୍ତ ନନ୍ଦ ।
ଉତ୍ପାତ କରୁଥିବା ହାତୀଙ୍କ ବେକରେ ଲାଗିବ ରେଡିଓ କଲାର:
ହିଂସ୍ର ଓ ଅମାନିଆ ହାତୀଙ୍କ ବେକରେ ଲାଗିବ ରେଡିଓ କଲାର । ଏହି ରେଡିଓ କଲାର ପ୍ରକ୍ରିୟା ସେପ୍ଟେମ୍ବରରୁ ଆରମ୍ଭ ହେବ । ବିଶେଷ ଭାବରେ ଉତ୍ପାତ କରୁଥିବା ବା ଜନବସତିକୁ ପଶି ଆସୁଥିବା ହାତୀଙ୍କଠାରେ ଲଗାଯିବ । ରେଡିଓ କଲାର ଦ୍ୱାରା ହାତୀଙ୍କ ଗତିବିଧି ଟ୍ରାକ୍ କରାଯାଇପାରିବ ବୋଲି ଚିଠିରେ ଉଲ୍ଲେଖ ରହିଛି ।
ହିଂସ୍ର ଓ ଅମାନିଆ ହାତୀ ଚିହ୍ନଟ:
ଏହା ପୂର୍ବରୁ ସମସ୍ୟାଗ୍ରସ୍ତ ହାତୀମାନଙ୍କୁ ରେଡିଓ-କଲାର କରିବାକୁ ନିଷ୍ପତ୍ତି ନିଆଯାଇଥିଲା । ହାତୀଙ୍କୁ ସ୍ଥାନାନ୍ତରିତ କରାଯିବା ସହ ଚିକିତ୍ସା ପାଇଁ ନିର୍ମିତ ହାତୀ ଶିବିରକୁ ସ୍ଥାନାନ୍ତର କରାଯାଇଥିଲା । ଏହି ସମ୍ପର୍କରେ ସାରା ରାଜ୍ୟରେ ୧୭ଟି ହିଂସ୍ର ଓ ଅମାନିଆ ହାତୀଙ୍କୁ ଚିହ୍ନଟ କରାଯାଇଛି । ସେଥିମଧ୍ୟରୁ ସମ୍ପୃକ୍ତ ଆରସିସିଏଫ ପକ୍ଷରୁ ୭ଟି ହାତୀ ପାଇଁ ପ୍ରସ୍ତାବ ଗ୍ରହଣ କରାଯାଇଥିଲା । ଯଦି ଉପରୋକ୍ତ ହାତୀଙ୍କର କୌଣସି କ୍ଷୟକ୍ଷତି ହୁଏ ତେବେ ସମ୍ପୃକ୍ତ ଆରସିସିଏଫ ଏବଂ ଡିଏଫ୍ଓମାନେ ଏହି କାରଣ ପାଇଁ ଦାୟୀ ରହିବେ ବୋଲି ଚିଠିରେ ଉଲ୍ଲେଖ ରହିଛି ।
ଏହା ମଧ୍ୟ ପଢନ୍ତୁ ...କାମ କରୁନାହାନ୍ତି ବନ ବିଭାଗ ସ୍କ୍ୱାର୍ଡ, ଗଲାଣି ୪୦ରୁ ଅଧିକ ହାତୀଙ୍କ ଜୀବନ - odisha forest department
କ୍ଷୟକ୍ଷତି ଉପରେ ତୁରନ୍ତ ପ୍ରସ୍ତାବ:
ସାମ୍ପ୍ରତିକ ସମୟରେ ଏହା ଲକ୍ଷ୍ୟ କରାଯାଇଥିଲା ଯେ ହିଂସ୍ର ଓ ଅମାନିଆ ହାତୀମାନଙ୍କ ମଧ୍ୟରେ କେତେକ ହାତୀ ବିଭିନ୍ନ ଘଟଣାରେ ମୁଖ୍ୟତ ବିଦ୍ୟୁତ୍ ସଂଯୋଗ ଦ୍ୱାରା ମୃତ୍ୟୁ ବରଣ କରିଛନ୍ତି । ସମସ୍ୟାର ସମ୍ମୁଖୀନ ହାତୀମାନଙ୍କର ଆଚରଣ ଅଧ୍ୟୟନ କରିବାର ସମୟ ଆସିଛି । ଯେଉଁମାନେ ସମ୍ପତ୍ତି ଏବଂ ଜୀବନ ନଷ୍ଟ କରୁଛନ୍ତି ଏବଂ ସେହି ଅନୁଯାୟୀ ସଂଶୋଧିତ ତାଲିକା ତୁରନ୍ତ ପ୍ରସ୍ତାବ ଦିଆଯିବା ଆବଶ୍ୟକ ବୋଲି ଚିଠିରେ ଉଲ୍ଲେଖ ରହିଛି । ଆସନ୍ତା 7 ଦିନ ମଧ୍ୟରେ ରେଡିଓ କଲାର ପାଇଁ ପ୍ରସ୍ତାବ ସହିତ ହିଂସ୍ର ଓ ଅମାନିଆ ହାତୀଙ୍କର ଏକ ସଂଶୋଧିତ ତାଲିକା ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି PCCF ସୁଶାନ୍ତ ନନ୍ଦ ।
କେଉଁ ସର୍କଲରେ ରହିଛନ୍ତି ହିଂସ୍ର ଓ ଅମାନିଆ ହାତୀ ?
ବନ୍ୟପ୍ରାଣୀ ବିଭାଗ ଦେଇଥିବା ତଥ୍ୟ ଅନୁଯାୟୀ, ରାଜ୍ୟରେ ୧୭ଟି ସର୍କଲରେ ୧୭ଟି ହିଂସ୍ର ଓ ଅମାନିଆ ହାତୀଙ୍କ ତଥ୍ୟ ସାମ୍ନାକୁ ଆସିଛି । ଅନୁଗୋଳ ସର୍କଲରେ ୩ଟି ହିଂସ୍ର ଓ ଅମାନିଆ ହାତୀଙ୍କ ରିପୋର୍ଟ ହୋଇଥିବାବେଳେ ବାରିପଦା ସର୍କଲାରେ ୩ଟି ହିଂସ୍ର ଓ ଅମାନିଆ ହାତୀଙ୍କ ରିପୋର୍ଟ ହୋଇଛି । ସେହିପରି ଭାବରେ ସମ୍ବଲପୁରରେ ୧, ରାଉଲକେଲାରେ ୫, ଭୁବନେଶ୍ୱର ଖୋର୍ଦ୍ଧା ସର୍କଲରେ ୨ ଏବଂ ଭୁବନେଶ୍ଵର ଚନ୍ଦକା ସର୍କଲରେ ୩ଟି ହିଂସ୍ର ଓ ଅମାନିଆ ହାତୀଙ୍କ ରିପୋର୍ଟ ହୋଇଛି ବୋଲି ଚିଠିରେ ଉଲ୍ଲେଖ କରାଯାଇଛି ।
ହାତୀ ଶରୀରରେ ଲାଗିଥିଲା ପ୍ରଥମକରି ରେଡିଓ କଲାର:
"ରାଜ୍ୟରେ ପ୍ରଥମ କରି ଅନୁଗୋଳ ଛେଣ୍ଡିପଦା ରେଞ୍ଜ୍ରେ ହାତୀ ଶରୀରରେ ଖଞ୍ଜା ଯାଇଥିଲା ରେଡିଓ କଲାର । ଏହାଦ୍ୱାରା ହାତୀର ଗତିବିଧି ଉପରେ ନଜର ରଖିପାରିବ ବନବିଭାଗ । ମାନବ-ହାତୀ ବିବାଦ ଥିବା ଅଞ୍ଚଳରେ ହାତୀକୁ ଟ୍ରାକ୍ କରିବାରେ ସାହାଯ୍ୟ କରିବ । ଯାହା ଦ୍ୱାରା ଏହିପରି ଦ୍ୱନ୍ଦ୍ୱକୁ ରୋକିବା ପାଇଁ ଠିକ୍ ସମୟରେ ପଦକ୍ଷେପ ନିଆଯାଇପାରିବ" ବୋଲି ସୂଚନା ଦେଇଛନ୍ତି PCCF ସୁଶାନ୍ତ ନନ୍ଦ ।
ଇଟିଭି ଭାରତ,ଭୁବନେଶ୍ବର
